2005年8月19日星期五

8-19(fri) 槍神

上個禮拜唔覺意睇到亞視, 原來又 (注意: 係“又”) 重播“縱橫四海” (用來打深夜重播的“尋秦記”), 仲一日播兩集…o係6年內重播o左n次…應播o個d又唔播…我仍然強調我係好想睇番有好多有睇過亞視o既人都推介o既青春劇---“藍月亮”…但我咁多年都未睇過! 好似又係有萬二蚊同埋潔儀姐姐…d朋友話好好睇o架喎…可以媲美亞視90年代“經典偶像劇”…大提琴與點三八” !

當年“縱橫四海”首播我都有力追o架, 又係year 1年代o既劇, 又係極力同同學仔討論過o既劇! 當時搵個 "A貨海味”以背影代替周海媚拍o左大半套劇, 都可謂經典! (p.s.“海味”o係呢套劇個草菇頭造型好核突呀! 不過好鍾意佢一日搵個背脊dud住觀眾o既感覺…好騎呢!)

仲有當年自從“刑偵3”之後就無再o係香港電視台出現, 大家餓o左好耐, 終於可以見番“張大勇”重出江湖, 又的確係幾高興o既! 再o黎一個“鹹魚翻生”o既譚耀文, 因為呢套戲大紅, 仲有得再次出唱片, 拍電影…一諗起呢套戲, 我就記得佢首: “為我名字, 為我名譽…” (隻歌o既音仲要係極奇怪, 但聽得多又幾好聽喎! 即使依家去karaoke, d人都成日話要點)…同埋記得呀大塊田o係呢套戲做得幾好!

再睇埋落去仲騎呢…其實呢套戲我o係幾個禮拜前都有larp過, 但無留意! 點知上個禮拜一“手禁”過去, 居然見到萬綺雯+呂頌賢+劉錦玲…完全係“大提琴與點三八” o既原班人馬 (仲要又係萬二蚊同劉錦玲爭呂頌賢, 又係前者做中, 後者做奸…唔知o個時呂頌賢同萬2蚊分o左手未呢?)…再加埋何美婷, 陳錦鴻, 駱達華, 吳毅將, 胡渭康, 王艷娜, 秦沛, 郭鋒等當年亞視o既主要藝員(原來仲係“Q表姐”同埋“衝出校園”o既原班人馬)…點解一套咁有趣o既戲我從來都未聽過o既呢? 究竟幾時首播o既呢? 無理由o架…當年睇完 “大提琴”, 我都幾留意呂頌賢同埋萬綺雯o架喎 (雖然就幾唔鍾意劉錦玲, 但到94年睇完一套叫 “衝出校園”o既重播劇, 又buy o左佢一段時間, 仲因為佢成日睇“今日睇真d”…哈哈!)…無理由有套咁騎呢o既“槍神”我都未聽過o架?!

可惜我睇o個幾集已經係尾聲喇…仲有, 我覺得套戲有d“殭屍”feel, 同埋隻主題曲幾騎呢, 但聽落又ok好聽! 騎呢在係到片尾先會播, 開頭只係齋音樂!