2006年12月2日星期六

12-2(sat) 東方之珠

嘩! o個套“東方之珠”居然做咁耐都未做完…我以為佢最多係廿集o既o者, 點知到依家仲未做完! 劇情其實都ok o既, 又有懷舊歌舞睇o下, 不過隻主題曲真係超難聽…阿姐都係做戲好過唱歌好多!

不過我最impressed都係前幾期睇tvb周刊, 發現原來郭晉安d歌係由王祖藍代唱o既…事關我一路睇一路都已經好疑惑…點解郭晉安唱歌會唱得好o左咁多o既呢? 直頭聽得出係識唱歌o既人唱o既…但係大家都有聽過十年前忽然走去做o左一陣歌星o既安仔唱歌有幾咁好聽o架啦…就算點improve都無理由可以唱得好成咁?! 但o個把聲又明明係佢o黎o架喎?! 真係十萬個為什麼! 最後謎底終於解開…原來係由好叻扮聲o既王祖藍代佢唱o既! 嘩! 真係勁到呀…佢唔講無人會知囉! 我好impressed!



九點半o個套“賭場風雲”, 睇o左一兩集…因為部錄影機壞o左, 唔o係屋企o個幾日就無得睇! 第一集有一個鏡頭影住宣萱側面大頭, 我一度以為係葉璇囉…原來佢兩個真係咁似樣! 又要講多次, 佢兩個o係“流金歲月”裏面做兩姊妹真係做得好似, 好表達到o個段姊妹情出o黎…再加上佢兩個真係幾鬼死似樣, 令人覺得佢o地更似兩姊妹!

但係宣萱個樣實在太中產, 太pro, 所以o係“賭場”入面做個癲dud爛賭婆真係唔係太似囉…唔係話佢做得唔好, 係佢個形象真係有d局限…咁當然程度上就無陳慧珊同吳美珩咁嚴重, 但都係比較適合做專業人士…“流金”o個個女律師角色就開正佢o個瓣喇…唔吃力又討好!

o係youtube搵到段《流金歲月》MV《當愛走到盡頭》…都幾好睇! 反正佢o岩o岩大結局o左, 係時候回味o下…下一套做“齊天大聖孫悟空”…都好! 慳番d時間唔洗睇! 但係唔知點解tvb呢期力谷張衛健…不停咁播番佢d重播劇, 一至五做孫悟空, 禮拜六下午又播番“功夫足球”…直頭係“我們的張衛健”呀!



呀…有一樣o野差d唔記得講…前幾個禮拜有日咁o岩睇到“高朋滿座”…好日都唔睇, 點知一睇之下居然見到我o地好熱愛o既“藍月亮”女主角袁潔儀姐姐…o個集佢仲要有幾幕係著番校服扮學生妹o個o下扮死嘛…尤其係呢期o岩o岩重溫完佢o係“藍月亮”裡面個少女look! 更加抵死o既係…佢o係劇中居然係做伍姑娘個中學同學, 講佢o地失去聯絡十幾廿年再撞番…情況就同現實生活中o既佢o地一樣!

伍姑娘同潔儀姐姐都係1989年亞姐, 仲分別得到第四同第五名, 跟住都o係亞視拍劇…然後伍姑娘首先過檔無線, 跟住到同屆o既冠軍翁虹同埋季軍趙靜儀, 再到留守o係亞視十幾年o既袁潔儀…依家o個屆淨係差萬綺雯未過過無線! 見到佢o地兩個差唔多廿年後再合作番, 仲要由少女變成人o地阿媽…個感覺都幾得意! 不過伍姑娘keep得好好多囉…潔儀姐姐反而有d殘!