2010年10月30日星期六

10-30(sat) 2010草蜢廿五周年演唱會

嘩! 草蜢25周年演唱會…你唔係無睇呀?! 經過我呢幾年o既熱烈推介之後, 我身邊有一部份比較喜歡扮細+比較孤陋寡聞的朋友 (嘩哈哈…:p) 已經由話: “嘩, 你唔係連呢d老餅演唱會都啱呀?” 到呢兩年個個都話: “你就好啦, 我又想去睇呀!”…哈哈! 可見草蜢呢幾年o既入屋程度又再提升咗…今次我身邊係無論20頭到40頭o既朋友都有去睇…仲同樣係high爆囉! 而我o係現場所見, 有無數我阿爸阿媽年紀o既朋友都有企起身跳得好興奮, 亦有好幾個係我阿爺阿嫲年紀o既朋友雖然企唔到, 但坐o係到揮動pong pong都揮得好投入…嘩! 真係無見過演唱會氣氛可以好成咁!



嗱! 都係o個句, 如果之前無睇過芒姐關於草蜢演唱會o既評論, 可以去睇d background information先…最主要係, 芒姐作為一個non-草蜢fans…都覺得草蜢演唱會的確係我睇過最好睇o既演唱會!!!


2005-10-20(thurs) 草蜢-我們的演唱會(上)



2005-10-21(fri) 草蜢-我們的演唱會(中)



2005-10-22(sat) 草蜢-我們的演唱會(下)



2006-9-5(tues) 草蜢2006演唱會



2007-2-3(sat) 草蜢forever grasshopper in concert (part 2)


2009-4-4(sat) happy950000…十九白金+草蜢忘我演唱會2009



咁當然, 如果你要我rank, 最好睇嗰次依然係2005年, 因為係"孤陋寡聞"的我咁大個人第一次去睇草蜢演唱會 (真失禮...明明佢哋係屬於我個年代, 但我居然細個無去過睇佢哋咁精彩o既演唱會)...完全無expect會咁好睇之下...一大大驚喜囉!

今次雖然唱好多"別人的歌", 預咗會無咁咁咁好睇...因為"食老本"呢家嘢, 精粹係在於"一成不變"呀嘛...所以佢o地始終都係唱番自己d歌令大家最high...不過好彩佢哋揀o既"別人的歌"大部份都好啱我心水! 真係帶番我返我最喜愛的80年代…"深愛著妳", "馬路天使", "歲月無聲", "每天愛妳多一些", "難得有情人"等...全部都好正!!! 同埋氣氛依然係咁好, 全場無坐低過...攰到呢! 真係high到我夜晚返到屋企雖然個身軀極疲累, 但居然3點幾都瞓唔著, 個腦不停咁o係度轉, d歌仲不停螢繞住我...心情到第二日都平復唔到…實在太好睇啦!


所以作為一個平均三個星期睇一次演唱會的"演唱會精", 芒姐依然認為草蜢演唱會係我so far睇過最好睇的演唱會 (bearing in mind我唔係草蜢fan屎, 我細個係比較鍾意beyond的...:p), 氣氛真係好到無人能及...即使5年內去睇第5次, 都依然咁好睇...連"內斂"的芒姐都受現場氣氛感染...由開場跳到散場...幾乎無坐低過! 唯獨草蜢演唱會, 可以令平時睇其他演唱會時比喻為一尊佛的芒姐, 變成一粒跳豆…hohoho! 同過我睇其他演唱會的朋友都感到十分難以置信囉!

挑剔的芒姐今次唔止要俾佢100分...直頭要私人醒多5分...105分!!! yeah!!!!!!



真係實不相瞞, 我“瘋狂”到去咗睇第二次添呀! 因為又想睇尾場呀嘛! 估唔到去睇第二次依然咁好睇! 我兩場坐唔同位, 第一次坐好前, 氣氛超好...由一開場跳到散場...第二場就坐$250, o係“半山”又係另一番景像, 因為第一場其實唔係太睇到個台同埋舞台設計...第二場終於睇到成個production! 當然, 論氣氛就梗係前面好好多啦!

嘩…我睇睇吓有一吓 (尤其係“永遠愛著你”玩人浪o個part)直頭覺得睇草蜢演唱會猶如參加邪教集會囉…wahahaaha! 萬幾人好齊咁一邊叫囂一邊揮動棒棒, 由開場唔停咁做到散場…好似中咗降咁…hohoho! 我相信所有睇完草蜢o既朋友, 都同我一樣停唔到! 真係好似中咗降咁, 係咁repeat佢哋d歌...一d都無誇張...至少我身邊有十九幾個朋友都有同樣徵狀, 仲要係男男女女咩年齡層都有...好詭異!!!

我去睇o個兩晚嘉賓係明哥同古天樂…即係雖然古仔係好靚仔…但都有d九唔撘八...如果係軟硬/big4/古惑仔就更好啦...點解我去睇兩場都撞唔中是但一group o架?! 不過話時話, 古仔唱哥哥o既”想妳”出奇地唱得比平時好好多, 差d唔認得係佢...但我依然懷念"今期流行"同"男朋友"年代五音不全o既佢多d…



嘩…又係唔睇番都唔記得…佢哋今次又係無encore, 連尾場你諗住實會encore好耐啦, 點知都只係唱咗“abc”同埋”飛躍千個夢”, 之後大家狂叫10分鐘佢哋都誓死唔出o黎…真係好忍心囉! 頭先睇番之前d日記先記得原來呢個係佢o地一貫的practice, 07同09年都係咁…oh, 如果我睇咗先去, 有心理準備之下就唔會失望啦…:p


(傑仔又係幾靚仔o既...)