2007年2月27日星期二

2-27(tues) 溫拿33演唱會

講番前幾日提過o既溫拿演唱會先…年初一走o左去睇呢個唔係屬於我年代o既演唱會, 但一樣咁好睇! 無錯, 的確唔係我個年代…佢o地走紅o既時候, 我直頭未出世…唔好講話勉強可以食住八十年代譚、張、梅三國鼎立o既水尾…第一次認識溫拿, 我懷疑係88年佢o地為紀念15周年合唱“千載不變”得到金曲o個時囉! O個時我先知道原來譚詠麟除o左係“最受歡迎男歌星”, 仲係前樂隊成員…而佢o既隊友居然有o個期唱“香腸蚊脹機關槍”o既b哥哥, 同埋後來唱o左隻大家笑o左好耐o既兒歌“蒙羅麗莎小雞雞”o黎歌頌o個期熱爆一時o既他媽歌池o既彭健新叔叔!!!! 真係驚人發現!!!

雖然話我不嬲都活在上一個年代, 但溫拿係我上上上上上三個年代o既組合…不過佢o地d歌, 我又真係大部份都識唱…唔知點解! 其實我一路以為應該人人都識唱o架嘛, 但係大學某年走去上我最鍾意的通識教育堂, 講youth culture…老師講番呢幾十年來o既流行文化, 有一堂好似講到 “l-o-v-e”呢隻歌…個老師同埋d同學仔見我可以一字不漏咁o翕晒成首歌d歌詞出o黎, 好似覺得我癡線咁…但係在此以前, 我以為應該人人都會識…原來我真係活在一個錯誤年代…!

其實之前都未必識咁多首溫拿o既歌, 可能因為98年去o左睇佢o地個25周年演唱會, 覺得好好睇, d歌又幾好聽又幾易上口, 仲幾得意添…所以返到去就買o左隻佢o地o既精選碟, 收錄晒大部份歌曲, 亦都成為我考a-level時期其中一隻陪伴我溫書o既碟…就係咁聽完又聽, 唔識都變識啦!



其實我最欣賞溫拿o既o野, 並唔係佢o地o個d極富七十年代色彩o既歌舞 (雖然呢樣都係我好欣賞o既o野)…而係佢o地o個種“友情相關照”o既感覺! 雖然以前好似話阿b同陳友曾經不和, 主要應該係因為前b嫂o既關係, 所以依家應該ok o既!

佢o地五個o個種互相照顧, 互補不足o既感覺好令人欣賞 (我諗唔係扮o卦?!)…感覺係friend過草蜢或者面和心不和o既軟硬…所以我都好鍾意睇呢五位年過半百o既叔叔o既演唱會!

當中其實我最欣賞o既反而係最唔出o既阿強同埋陳友…不嬲都係buy d企o係後面o既多過d主角…鋤強扶弱或者係其中一個原因! 阿強o個種“與世無爭”, very “not into it”o既感覺好趣怪…無論係跳舞, 唱歌, 講o野, 佢都充份發揮到呢種精神…咁樣反而可以配合到鍾意出風頭o既阿倫同阿b!



仲有陳友我就更加欣賞…細個時認識佢係因為八十年代如“精裝追女仔”o個隻片, 但一路都唔知佢係band友o黎…點知睇98年演唱會, 佢居然打得一手好鼓 (at least ok啦)…最欣賞人識打鼓o架喇…好鬼型! 所以大學年代都胡亂走去學人上o左兩個semesters o既鼓班…d同學仔就個個o係library溫書, 我就走去學打鼓同埋去lib摷陳年雜誌o黎睇…佢o地覺得我超不知所謂…真係抵我有今日o既“成就”…哈! 陳友雖然唔係話打得超級勁, 但佢唔係成日打都有呢個水準…算係咁o架喇! 仲有發覺佢講o野都ok抵死! 跳舞…其實都唔太差呀!

不過佢個港男仔仔陳良韋就真係唔多掂囉…陳友都好落力咁想去幫個仔爭取暴光, 仲行埋去同佢合照等d記者會影o下佢, 點知我見第二日報紙都係無登到…真係可憐! 最抵死係阿倫仲話:“點呀, 陳仔! 讀訓練班讀成點呀?!”…好賤!

一開場佢o地五個好唔pro地跳o左成廿分鐘medley…都算係好得o架喇, 仲有o個jar歌都聽得人好興奮! 雖則有d一片混亂…不過我仍然幾鍾意睇佢o地跳舞…有時d o野, 唔洗太pro反而效果幾好呀! 阿倫話佢o地呢part叫「滿城盡跳黃金舞」…個gag係爛d, 不過唔知點解又ok好笑喎! 至於佢o個jar快歌medley…我最鍾意都係“love”,“sha la la”,“陪著她”,“玩o下啦”同埋“齊心就事成””…oh, 仲有“友情相關照”! 慢歌就當然係“千載不變””啦!




之後有一part係紀念佢o地恩師黃霑 o既“大家樂”, 仲一邊播番香港o係七十年代o既片段…呢part本來個主題好好, d片亦都好好睇…因為我一向最鍾意呢d“大事回顧/集體回憶七十年代”形式o既片段o架嘛…點知拖得太長, 仲好混亂, 好似無咩點排過, 好求其咁, o徙o左成個theme! 葛文輝又做得唔係太似霑叔, 佢o地五個扮年青又真係有d惡頂…仲有佢o地成日都著o既格仔衫又真係好肉酸…俾人一種好老套o既感覺!

其實播o下“大家樂”o既電影舊片段, 再唱番幾隻戲裡面o既歌, 講o下大家當初點相識咪算囉…演繹一次出o黎但又做到唔湯唔水咁…真係好難受! 本來跳完medley氣氛好高漲, 一下子就悶晒, 變成廁所位!

聽聞呢套戲都幾好睇, 又有香港特色…真係好想買番隻碟o黎睇添! 仲有, 不得不讚多次…霑叔真係好有才華, 中文詞寫得好, 連英文詞都得…顯淺而明, 但又寫到個精粹…真係一代鬼才!



仲有一part係每人搵d o野solo下, 一開始當然係播番阿倫連續幾年得到“最受歡迎男歌星”o既風光片段, 跟住佢再出o黎唱番首“或睡或現閃[礫]不停”o既“霧之戀”(跟住應該又係王貽興同徐淑敏一邊抬住d桃花一邊走出o黎話俾大家聽應該係讀“閃爍不停”o既時候喇)…同埋我好鍾意o既“愛在深秋”…每次聽到呢隻我第一隻識唱晒成首o既歌, 都會諗起細個時o既片段…無憂無慮o既童年, 真令人懷念啊!!! 跟住再到阿b同健仔輪流solo自己o既歌…不過當然, 現場反應同倫伯係差一截o既…畢竟人o地都曾經係八十年代最受歡迎男歌手…

其實我好想睇番佢o地o既“溫拿狂想曲”…點解tvb深夜永遠都淨係播“電視大贏家”同埋“爆笑急轉彎”…我睇o左n字喇…其實可以考慮o下重播“溫拿狂想曲”呀!

好彩新年走o左去睇溫拿…如果唔係呢d咁悶o既節日真係唔知可以點過? 其實某幾個歌手係特別適合o係呢個合家歡節日開o下演唱會, 搞o下氣氛…校長係其中一個, 佢個愛徒克勤係另外一個…佢o地兩個夾埋差不多霸o左近八年o既新年檔期, 不過佢o地搞呢d氣氛又係有一手o既…好似上年o既克勤得心應手演唱會, 同埋三年前o既“左倫右李”演唱會part2…佢o地仲可以順手自己[手豆]番一jar利是…何樂而不為呢?