2006年1月1日星期日

1-1(sun) 2005叱咤樂壇

新一年又開始…唔會再整d咩新年新展望, 因為年年都唔多實現到!

新年流流, 我仲發o左個怪夢…係俾警察拉, 屆我o地洩露商業秘密, 仲可能要坐監…個夢發得好逼真, 好有條理…搞到我全晚都瞓得唔多好…哈哈! 真係大吉利是!

一月一日, 仲係每年一度o既叱咤頒獎禮…以前我會視之為其中一大盛事, 特登留o係屋企聽; 尤其中學時期, 試過全晚掛住聽, 搞到12點播完先開始溫第二日o既測驗! 但係, 呢幾年已經對叱咤失去大部份興趣, 只當佢係一個普通頒獎禮 (好睇過新城o個個豬肉頒獎禮少少啦)…睇就依然會睇o既, 但係只係當一個普通show咁錄起o黎睇…今年仲幾乎唔記得o左添!

叱咤賽果, 我已經無興趣再去analyse, 有幾咁公平公開公正, 大家心裡有數…幾年前我已經講過我o既觀感, 今年唔打算再講! 但我依然對商台“吹眠”佢d聽眾/擁蠆o既能力感到很impressed…每年都整句好似保險公司口號o既slogan, 跟住d人講o既o野又係一貫商台o既“吹眠”口脗, 佢o地鍾意o既歌手就將佢捧到上天, 唔鍾意o個d, 你幾紅都唔會有獎…! 同埋所謂現場投票…去得現場o既都係商台fans, 長久受佢o既“教育”, 投出d“出人意表”o既結果亦不足為奇!

但係我又唔係話佢o地咁樣唔o岩喎, 佢講到明係計播放率, 即係佢d DJ鍾意邊個咪邊個得獎囉…講到明個遊戲規則, 你唔鍾意咪唔好玩囉…真係無呃你, 係公平公正公開喎…o係佢個standard o黎講! 所以o係叱咤會出現at17拿"我最喜愛組合”, “我”as in“商台”…我唔覺得係造馬, 因為商台d fans, 唔會係吹捧twins o個d…同埋佢無話呢個係“全香港”最受歡迎獎呀…係“我”最喜愛之嘛, 所以都好合理!”

仲有, 要俾番個獎林海峰/I love u boyz, 我都覺得好應該, 自己人梗係要幫o架啦…即係好似新城頒獎禮啤梨一定有獎, 無線就梗係俾吳唱k啦! 好合理喎! 今年o既賽果, 我都覺得好可以接受, 無太多出人意表位!

最精警o個一part應該係“人善人欺天不欺, 香港樂壇李笑好”…講得好, 因為好真…容祖兒同李笑好個樣都係整出o黎…只係一個整醜一個整靚之嘛! 好明顯, 商台真係好鄙視英皇呢間唱片公司…連新人獎大熱o既kenny都大熱倒灶! 同埋容祖兒俾人噓, 唔知點解都有d大快人心!

另一個好笑位就係當全部“我最喜愛的15強”o係台上面輪流唱自己隻歌時, 到fiona唱佢隻歌, 林海峰個樣好搞笑 (相信可以稱為鄙視)…忍唔住大笑o左出o黎! 其實fiona真係幾勁, 好少新人可以到第二年仲接到做新人o個年個勢…佢係一個例外!

運勢呢d o野又真係無得講, 兩年前文文仲同古巨基一齊由谷底走番出o黎, 點知今年古巨基仍然拿晒d大獎, 文文已經唔見o左 (見o既…o係林海峰隻歌度囉), 真係同人唔同命!

仲有, 再一次覺得, 克勤真係好識講o野…佢個西裝比喻都講得幾大方得體!

草蜢d妝化好誇, 好恐怖, 尤其係蔡一傑! 仲有, 佢塊面真係爛得好緊要…真係好可憐, 尤其對佢o黎講, 事關佢不嬲都係最貪靚o個個…第二個爛面已經慘o架啦, 爛o係佢度, 佢更加會接受唔到! 依家咁多個之中, 反而以前顯得比較平凡o既蘇志威最好樣, 最正常!

另外, 睇報紙睇到兩單笑料, 1) 吳唱k疑俾蔡一傑抽水…d人話o係平安夜廣東道個show後台, 見到蔡一傑熊抱吳唱k…笑死我! 2) 另一單係君悅除夕ball, 薛芷倫講o野講到甩眼睫毛, 同埋許晉亨fing甩佢女友! 成個君悅除夕ball o既報導都好好笑!