10-29(mon) “爆足一周”之…「咁算唔算腰斬？」

 “咁算唔算腰斬?”…咁當然算腰斬啦! 播咗四個禮拜就被腰斬已經好爆…但最爆係…d主持居然到錄完都唔知!

呢單可算係“爆足一周”爆咁多單所謂料之中最爆的一單 (如果其他o個d都算係料的話)! 小欣姐今次真係"火羅"到核爆! 我仲以為為咗面子, tbb點都會俾”爆足一周”死撐到最後添…點知做咗四集就腰斬咗! 真係點能夠唔入今年十大娛聞呀?

莊思敏仲用口形問小欣姐﹕「咁算唔算腰斬？」…救命…點解班主持可以"火羅"成咁?!

《爆足一周》宣佈腰斬 莊思敏呆鳥
《爆足一周》今晚真正猛料就係——查小欣喺節目最尾分零鐘宣佈，節目腰斬喇……唔係，佢係話，後會有期，2013年再同大家見面喎。但就唔肯直接話俾人聽停播。
小欣姐話，呢個節目開播以來，「收到好多觀眾迴響，我哋會聽晒，我哋係抱住一個好虛心聆聽，從善如流，同埋我哋會徹底檢討。好多謝你哋嘅寶貴意見，我哋會喺節目上做一個調整，然後2013年初我哋會再見。」，但就死都唔肯話係「停播」。
且慢，呢個未係最爆。最爆係﹕主持之一莊思敏聽完小欣姐咁講之後，呆咗一呆，個鏡頭明明仲對住自己，但佢都忍唔住用口形問﹕「咁算唔算腰斬？」、「吓？腰斬咗呀﹗」
哦，原來莊思敏今日傍晚喺微博煞有介事話有料爆，就係爆原來佢呢個所謂主持，今朝錄影嗰陣，都唔知自己個節目俾人腰斬呀﹗
莊思敏呢個節目主持，竟然今日錄影嗰陣都唔知自己個節目會被腰斬，仲用口形問小欣姐﹕「咁算唔算腰斬？」

今次真係tbb近年罕有o既英明果斷決定, 係咪繼30幾年前”輪流轉”之後腰斬得最狠o既一次呢? 腰斬實屬明智之舉, 雖然會令大家每星期少咗好多"娛樂"囉! 其實平心而論, 今個星期係進步咗o既…起碼拉姑段訪問都幾ok...但話實我諗大家最頂唔順o既…係阿小欣姐嗰種認屎認屁o既態度! ok, 我當d人真係為咗俾面你先接受訪問, 但你自己咁樣次次要emphasize呢樣嘢都真係好肉酸…真係有料/有地位o既人, 邊駛自吹自擂o架! 核突咗!

同埋阿小欣姐短短幾個月俾兩個機構接連收皮兩次…2 combo喎…以後仲點喺呢行立足呢? 雖然都真係有d可憐!

其實個節目既然都咁樣俾人摺法, 應該玩舖勁…例如叫佢d好有”遠見”又識"讀心"o既主持們一齊討論吓點解個節目咁快俾人摺咗? 又或者討論吓小欣姐點解會俾商台收完皮咁快又encore俾tbb收多一次皮…甚至即場打俾志雲對質吓咁咪仲爆! 反正都last一次喇, 唔怕玩盡佢呀…! 同埋既然”爆足一周”終於摺咗…係咪可以有番”娛樂頭條”o架喇?!

又o黎全民公投: 究竟大家又覺得點解"爆足一周"會咁快被爆開了呢?



而同”爆足一周”同期首播但係反應南轅北轍o既”最佳男主角”…上個禮拜最好睇o既除咗霆鋒之外, 仲有我一向都幾like o既"家咩姐"張家輝 (哈哈…唔知點解直至現在, 見親佢都依然好想大叫“家咩姐呀?! 我姓甘o架~~~!”) 佢除咗funny之外, d經歷亦都ok傳奇, 尤其佢段講過唔少次o既南非歷險, 同埋佢個人仲幾sweet添! 如果有睇過佢同關詠荷o既愛情故事, 同埋之前我講過o既"回到未紅時"97年關詠荷攞完視后o個集…就知道阿"家咩姐"佢冧女真係有一手!

而佢o係個訪問度話自己o個次易容去睇番自己套戲都幾funny…佢個人真係幾搞笑…其實佢同關詠荷兩個我都好like!

睇咗"男人如衣服"…出奇哋ok喎! 我以為會好似”翡翠明珠”或者黃百鳴近年d賀歲片咁爛…但turn out又真係唔差下, 幾好笑, 仲有啲meaning添! 值得推介! 但我想講, 林峯個緋聞女友吳千語…唔係唔靚, 而係好似一個小朋友, 一d”味道”都無! 我個人認為, 如果我係男人, 其實潘霜霜呀, 唱k個張馨予呀咁…都真係會吸引好多! 哈哈!