2006年6月13日星期二

6-13(tues) 2006世界盃

不經不覺世界盃又開鑼…上個禮拜五晚已經第一場…我真係幾乎唔知添! 雖然我唔係點睇波, 什麼“插花”, “笠死”我真係一竅不通 (可以解釋到俾我聽o既朋友, 真係請賜教…萬分感激!)…但係世界盃呢d四年一度o既盛事, 點都會去睇o下+感染下個熱烈氣氛o既! 不過等到準決賽先啦!

剛剛聽到無記首世界杯主題曲…由新“四星”林峰+鄭嘉穎+吳唱k+mk wong主唱…都幾唔好聽o下! 仲騎呢過兩年前“奧運六星”o個首“遇強愈勇”! 不過平心而論, 我o地都不大buy o既唱k o係呢首歌度都唱得唔差…反而我o地好喜歡o既“老前輩”嘉穎仔其實唱功真係…不如專注做戲算罷啦!

襯世界盃熱潮, post一段98年無線世界盃o既“精彩片段”…好鍾意阿叔, 更加鍾意李克勤o既抵死反應, 同埋在場人士o既爆笑樣…好好笑!



(俾d時間阿叔食d o野…)

其實對於我呢d“非典型球迷”…每年睇世界杯, 最鍾意睇o既並唔係個迷賽本身, 而係開場前或者中段d嘉賓同主持o既對話…次次都笑死我! 尤其有克勤主持就最好啦…佢o既急才同埋抵死係我最欣賞o既! 仲有我記得98年仲未俾有線霸晒d轉播權o既時候, 無線晚晚深夜都有得播…o個年又咁o岩又考完a-level, 超relaxed的一個暑假, 所以晚晚都有捕住o係電視機旁邊係咁睇!

最鍾意係兩場中間時間, 有已經離開o左無線o既潘宗明返o黎客串主持世界盃, 仲要親自去到主辦國主持…你真係估唔到佢原來係咁放咁funny囉…仲好笑過克勤, 真係笑爆嘴! 以前以為佢係好認真o個隻, 點知自98世界杯之後, 發現原來佢係超級瘋狂…好懷念阿潘啊! (hohoho, 一講之下, 居然o岩o岩聽到遠在加拿大o既阿潘phone in無線個世界盃節目…真係邪!)

原來前幾日開始無線已經晚晚12:15有個“頂CUP世界盃晚晚有德FUN”節目…有d藝員上去吹o下水講o下波…miss o左幾晚添! 最緊要係睇克勤嘛…佢真係講得兩嘴, 好過上次tvb無啦啦搵老鼠安主持奧運, 聽佢語無倫次一番…佢做得辛苦, 大家又睇得辛苦…何苦呢?! 今年仲加埋新聞部o既伍晃榮…佢又係funny o既! 仲有另一個笑匠林敏驄…上屆佢明明同克勤反o左面…今年仲要一齊主持世界盃, 唔知佢o地係咪面和心不和呢?!

仲要個個主持著住件橙色褸仔…都幾醒神呀! 不過最鍾意都係克勤件deep v…男人之家佢都算最低胸! 唔知點解佢自上屈開始“行性感”, day day o係件褸裡面都著低胸背心…好趣緻!

除o左deep v克勤, 個節目最騎呢就係每人前面夾硬擺個杯面同埋汔水…我知係sponsor…但真係過份突兀囉!

呢期世界盃真係變成全城熱話…尋晚行過中環蘭桂坊d酒吧同埋皇后戲院出面個大電視, 都有直播球賽, 仲有好多人企晒o係條街度睇…真係好眾志成城, 好好氣氛…搞到夜夜都唔願[目訓]!

連麥記都搞o左個世界盃遊戲, 買滿17蚊就獎你一張世界盃卡, 如果張卡上面隊球隊前一晚贏/和波, 第二日就可以唔知點以優惠價買飯tastic餐…我有一張阿根廷, 一張法國…但係無留意佢o地幾時有球賽添…大家如果知道佢o地贏/和波…唔該記得話一話我知…等我第二日去食飯tastic…!!!

講開睇波, 諗番起咁多年來最“落力”去睇o既一場波…哈哈! 初時我仲學do姐話: “唔明點解成班男人追住個波四圍走, 都好無厘頭o者!” 點知睇完o個場球賽, 連我呢d“非典型球迷”都話: “原來成班男人追住個波四圍走, 其實一d都唔無厘頭o架…仲可以好好睇添!”

回顧:


http://hejnom3.blogspot.com/2003_08_07_hejnom3_archive.html

“八月 07, 2003 -- 黃馬”

“我本身一d都唔係足球fans (淨係會o係d大型賽事, 好似世界盃o既時候, 先會留意o下;同埋“捕”o係個電視前面感染o下個眾志成城o既熱烈氣氛!)…如果唔係皇馬o黎香港顯技, 我分分鐘連呢支球隊有咩人都唔係太知 (依家都只係知比較出名o個幾位)! 見到d妹妹仔o係個機場度叫到聲嘶力竭, 又跑又追…仲有d球迷為o左去睇佢o地踢波, 搞到大熱天時要[目訓]幾晚街 (最終仲要未必買到飛喎!)…明我就真係唔係幾明o架喇, 學Dodo姐話齋:“波我就真係無咩興趣睇…成班男人追住個波四圍走, 都好無厘頭o者!” (睇呢段新聞o既時候覺得好搞笑, Do姐果然係有佢o既point, 仲好抵死添…所以要quote出o黎同大家分享!)! ”




http://hejnom3.blogspot.com/2003_08_08_hejnom3_archive.html

“八月 08, 2003 -- 4:2-香港人的驕傲”

“嘩! 勁~勁~勁! 真係好勁!

原來成班男人追住個波四圍走, 其實一d都唔無厘頭o架…仲可以好好睇添! 今日o個場香港十年難得一見o既足球盛事, 真係令我呢個“非球迷”對足球賽事大大改觀, 直頭嘆為觀止!

從來未試過可以“全神貫注”咁睇晒成場球賽, 即使係世界盃決賽, 我往往都係睇睇o下忍唔住走o左去做第二d o野! 但係今次o既90分鐘裡面, 完全係目不暇給…尤其係上半場, 真係粒粒巨星, 基乎連眼都唔敢眨!

中港聯隊o既表現就簡直令人喜出望外啦! 本來諗住以港隊o既實力, 簡直係“小學生”同“大學生”鬥, 都唔知要輸幾多球…尤其見一開場無耐就俾人入o左第1球, 跟住未到15分鐘又入多球, 諗住之後實有排數啦! 如果繼續係咁平均6分鐘入1球, 到完場咪要輸成15球?! 其實輸幾多球都無咩所謂, 只要唔好輸得太離譜, 就已經算有個交代喇! 輸少當贏嘛…如果中港聯可以入到1球, 就真係要還神…香港聽晚直頭應該放煙花啦!

本來諗住開住冷氣舒舒服服咁坐o係梳化度睇, 但係因為實在太緊湊, 一開場已經忍唔住冒住幅射o既危險, 全場企o左o係個電視機隔離睇! 仲要d球員走去邊, 我對眼就跟到去邊, 成場都係咁跟住…前所未有地全情投入; 好似我平時睇勁歌總選或港姐o既“認真”態度!

港隊o係上半場破蛋o既時候, 簡直高興得叫o左出o黎, 仲拍晒手掌…從未試過睇一場波睇得咁投入! 到後尾港隊居然可以入到第2球, 真係發夢都估唔到! 本來可以o係黃馬手上?到1球, 都已經係贏o左咁款o架啦; 居然未到下半場再整多粒…好勁呀! 拉到個比數咁近, 之後仲可以守足成個下半場…簡直係香港人的驕傲!!!

今次o既球賽完值回票價啦…香港呢個城市, 好似好耐都無試過咁好氣氛!”