2007年2月21日星期三

2-21(wed) “豬”事順利



hohoho!!!! 豬年話咁快就到o左…o係呢度向各位讀者拜個年先…祝大家“豬”事順利,“豬”光寶氣, 豬籠入水…同埋我最鍾意祝人o個樣:“不勞而獲”!!! 仲有仲有, 最緊要係身體健康…呢個係我切身o既感受!



今個新年o既最大禮物, 當然係收到yesasia朋友仔留俾我o既tvb官方月曆同埋利是封啦…舊年第一次收到呢兩樣珍貴禮物o個種興奮感覺仲係記憶猶新…今年都依舊好珍而重之…雖然係無第一次收到時咁震撼! 以前細個每年睇報紙都只係得個恨字…依家自己都可以擁有番個, 實在係無比興奮! 仲有齊兩款座枱月曆可供選擇, 送禮自用必屬佳品!



新年流流, 居然失眠…搞到今日第一日返工就精神不振, 實在太可憐喇! 尋晚到四點幾都仲係碌來碌去[目訓]唔著, 後來仲要開始俾蚊咬添…冬天都有蚊? 有無搞錯呀? 仲要遲唔咬早唔咬, 人o地返工先去咬…仲要衰到咬人塊面, 實在太過份喇…就係咁, 今日我o係[目訓]o左唔夠三個鐘之下碌o左返工, 好痛苦!

個同事問我係咪太緊張[目訓]唔著…我話係呀, 因為第一年派利是所以緊張到[目訓]唔著! 放心, 我未結婚…只係循例都要派番封開工利是俾秘書小姐, 新年點都要利利是是o既…我係一個識do o既小朋友! 不過正如我前幾日睇“東張西望”訪問克勤婚後第一年派利是o既感受…佢都話無論以咩身份派利是, 都只係得一個感受, 就係: 肉痛! 所以我都只係會派俾我秘書, 其他下屬真係無能為力喇…今日[手豆]番o黎o個d先勉強cover到我派俾秘書o個封囉…oh! 我深相我今年定必會大吉大利o既…



農曆新年睇o左好多o個d賀年節目, 少不免就係各位師傅出o黎講o下流年運程! 最搶o既就當然係麥玲玲師傅啦…成日著到紅噹噹咁出o黎搶晒鏡! 再加上麥當當為佢推出一系列麥豬豬, 麥猴猴, 麥羊羊咁做勢…又確係威!

但其實我想講o既係, 唔知大家有無留意一個都算“年青貌美”o既戴子珽師傅呢?! 大家仲認唔認得佢呀?! 好似呢幾個禮拜都有雜誌有講過佢…之唔係97年港姐大熱佳麗歐芷婷囉…佢o個屆仲有由好姊妹變成爭仔孖妹o既冠亞軍翁嘉穗同李明慧, 仲有o個屆差不多唯一一個留o係娛樂圈o既季軍佘詩曼! 另外兩個熱門係哈佛小甜甜任葆琳同埋名模歐陽妙芝! Oh, 仲有個當年參選時叫劉依清o既劉綽琪!

o個時呢位歐小姐好似得17歲, 仲同o個年o既表演嘉賓謝霆鋒傳出緋聞…又話佢o地係唔知幼稚園同學定點…我記得o個時仲有幾本雜誌封面係講歐芷婷, 又話佢係是非精…估唔到十年後佢出番o黎, 變o左麥玲玲個friend, 仲要連個姓都改埋, 但成個名o既讀音其實又無咩分別喎! 不過佢個樣真係老o左好多!



仲有呀, 大家上個定係再上個禮拜有無睇“問題娛樂圈”?! 有兩集分別係有整容大使吳文忻同埋佢個死敵阿周汶錡做嘉賓…個吳文忻就衰浮誇, 作狀到爆…但係又唔知自己無觀眾緣, 仲夠膽死繼續o係個節目度唱阿周汶綺講大話話自己無整過容…真騎呢!

阿周小姐你就估佢唔到, 原來佢講o野都ok funny, 但更加估唔到o既係佢會用d懶得意o既bb聲講o野…大佬, 你以為自己真係仲係16歲咩? 我真係估唔到佢一把年紀仲會走cutie路線懶嬌嗲咁…佢個妹都無佢咁恐怖…!