3-11(sat) 斷背山

終於我真係走o左去買上一期tvb周刊, 因為俾“藝人親戚關係大揭秘”內容吸引, 同埋想睇o下“天幕下的戀人”! 估唔到咁橋兩篇都係關於上個禮拜提過o既藝人…鄭嘉穎+王賢誌+向海嵐&李泳漢+李永豪+黃宇詩! 仲畫埋個family tree解釋俾大家聽個複雜關係…原來鄭嘉穎同王賢誌係“隔代表親”, 咁就算唔熟都唔出奇! 向海仲要係vincci個舅母o既表妹, 咁唔識都唔出奇添!

另外一篇係講李泳漢+李永豪+黃宇詩…上個禮拜先講話佢o地好似完全無啦間咁, 今個禮拜就有呢篇報導睇…又話原來泳漢同泳豪細個成日去華娃屋企, 泳豪就會同黃宇詩個阿哥爭打機, 但係泳漢居然會同黃宇詩一齊玩煮飯仔…唔怪得知佢真係咁女性化! 佢仲懶係話唔知自己細個做咩會玩埋d咁o既o野…其實又洗咩唔認呀? 佢本身個感覺真係好?型…呢期仲有週刊標題話 “李家鼎斷背仔送手機俾王喜, 王喜唔o趙但唱”…嘩! 呢個標題真係超賤!


(居然o係小掃除時發現僅有o既幾本88年“選擇”…仲有小時候o既孖李做封面! 佢兩個細個真係幾得意…尤其係大孖真係幾靚仔…你點會想像到依家o既佢會變成咁o既樣?!)

“斷背山”呢期真係hit喎, 除o左娛樂版講, 連港聞版都不停以呢套戲做題材, 又咩“港版斷背山”…講o係公廁搞o野o既兩個有家室男人! 最搞笑係仲做o左個調查話如果要演港版斷背山, 問d人覺得邊兩個藝人最適合…結果係陳冠希同玻璃人陳鍵鋒 (我照quote o架咋, 雖然“玻璃人”某程度上都幾寫實…真係sorry晒!)…因為佢兩個夠晒青靚白淨喎!

呢個“斷背”term成為本期“潮語”…連yahoo search都熱爆, 真係唔好話唔威! 以後唔好話人基, 只可以講: “你好斷背喎!”否則可能會俾人笑你“背”!


(仲搵到本87年我“偶像”邵美琪做封面o既“選擇”)

今期壹周封面o既“吳唱k同觀音娜扮反面真相戀”都幾好笑…無買o黎睇, 不過之前睇報紙暗名o個d報導都有話佢o地其實真係有路o既…都無咩所謂, 只係見佢兩個呢排扮反面d新聞幾好笑o者…同埋兩個感覺都愈o黎愈cheap囉!

尋晚tvb又話做完"難兄難弟"做"陀槍師姐", 點知今晚最終又係播番"大鬧廣昌隆", 一時一樣, 搞到人無所適從! 人o地諗住趕返屋企睇陳三元同程峰...點知一開電視見到大隻廣同小芙蓉! …最怕大隻廣o個把懶有趣o既聲!