2006年12月4日星期一

12-4(mon) 一擲千金

睇o左幾集許冠文o個個悶爆節目“一擲千金”…真係不得不佩服佢點可以主持一個節目主持得咁悶?! 個節目本身已經夠悶o架喇, 一味係咁o係度開箱, 仲要懶係緊張咁叫個banker (居然係羅君左…!!!) 開個數, 然後個參賽者又懶緊張咁睇o下賣定唔賣…真係唔該晒!

之前幾集台慶特別版搵d藝員上o黎玩都叫做好睇d, 起碼觀眾識佢o地呀嘛…之前係d三唔識七o既參賽者, 真係好yim悶囉…不過佢d參賽者又真係個個都幾好戲, 同埋幾識製造氣氛, 至少佢o地都會扮到懶緊張咁…可能佢o地話之前要interview, 就係考o下你d戲好唔好! 不過個節目本身悶成咁都係無得救, 再加上許伯伯更加係悶上加悶…唯一係有一jar少女出o黎做千金小姐…可能可以達到養眼的效果…同埋最緊要係可以等tvb有機會一次過介紹n個新人嘛!

個節目咁悶…玩o下呢個“一擲千金網上版”好過啦!

http://playnow.workisboring.com:8888/games/index.php?act=play&id=265&cid=7


反而禮拜六晚有個“新”節目幾好睇…咪就係食住“美女廚房”個勢推出o既學廚出更囉! 搵o左因為“美女廚房”而人氣急升o既主持 (唔係鄭中基) 周中師傅…佢真係繼黎明之後另一金句王…真係笑死你無命賠! 廚師之中佢都算最出位!

今次除o左個搞笑周中師傅, 仲有另一個不嬲我都覺得佢勁抵死o既毛舜筠…其實八十年代睇佢做戲覺得佢嬌滴滴咁, 唔似係講o野咁抵死轉數咁快o個隻囉…但又係低估o左佢! 上年佢幫亞視主持 “三個a cup的女人” 時已經笑死我…係繼曾華倩之後另一個o係抵死啜核方面令我大為欣賞o既八十年代嬌俏花旦! 以前睇佢o地講對白都陰聲細氣咁, 又點會諗到原來佢o地往後可以變得咁抵死?! o個個年代d花旦真係唔可以睇少!

連帶o個個做“有喜”o既新人唐素琪都做得唔錯…成個節目都幾好笑o下! 臨尾d學廚煮完仲要d評判俾分…而d分居然係分五級, 分別係:“豬食, 狗食, o靚食, 人食, 神食”…真係白癡得o黎但又好抵死! 可惜有幾集miss o左…因為個錄影機個預錄function壞o左嘛, 出o左街又錄唔到…好彩tvb網頁好似有得睇番!

五集之中最好睇o個集係阿sa煮o野俾華仔食…佢搵o既學廚同埋嘉賓都幾有份量…成件事都幾好笑囉!

又睇o左一兩集肥姐o個個“友緣相聚”節目…其實對我o黎講唔係太好睇, 因為大部份人我都唔多識佢o地! 有一集係訪問王羽…嘩! 估唔到佢咁有錢喎…間屋大到好似皇宮咁! 唔怪得知佢當年嫌鄭嘉穎襯唔起佢個女王馨平啦…不過嘉穎仔無做佢女婿都可能執番身彩, 因為王羽個感覺真係好惡好兇囉!

咁o岩見到一張相…係一張十幾年前幾個樂壇新人鄭嘉穎, 曹永廉, 馬浚偉o既合照…依家居然佢o地三個都轉戰電視圈…