2006年3月16日星期四

3-16(thurs) 梁漢文

前兩日一連兩集“娛樂直播”都係訪問文文(即係梁炳…因為我有兩個friend都好鍾意梁漢文, 所以成日同佢o地講都會懶親暱咁叫文文)…佢又係慘o既, 咁多年o黎好多起起跌跌, 成日有d歌紅o左兩下, 跟住就無啦啦跌番落o黎, 呢個cycle仲要o係呢十幾年o黎repeat過無數次…

94年o既”100巴先愛上你”+到依家仍然hit到爆o既“纏綿遊戲”, 95年o既”傷了三個心”, “愛與情”, 隻碟本身係好正, 但一出就遇到歡樂滿東華”唔好咁x嘈”事件被雪…跟住又起得番, 96年總選佢隻“呼吸”直頭搶o左許志安隻“男人最痛”個位入十大 (不過呢次某程度上係因為安仔唔續約華星所以被雪)…當時本本雜誌都係話佢搶o左安仔個一哥位, 紅極一時…再到97”好朋友”大hit, 跟住就無啦啦dup左n年, 華星仲執埋…又到前兩年o既“七友”同埋成隻“10號”碟令佢又再次起番, 同古巨基一齊鹹魚翻生再戰叱?十大, 點知…兩年過後浮誇基仔依然hit, 文文反而又dup番, 成個2005年無出過一隻歌…真係好坎坷…

其實佢o地幾個兄弟都同佢有差唔多經歷, 尤其張衛健, 又係一生十起十跌…蘇永康就有d自己?o黎, 許志安就都唔算係o既…佢係呢兩年先唔紅同埋感覺愈o黎愈“火羅”o者!

上次睇tvb周刊咁o岩又有梁炳一篇訪問, 但個筆者話其實d相係一年前影落, 但個訪問就今年先補番同埋出到…事關佢成個2005年全年都無碟出…真係唔知搞咩?!

其實我一向對新秀出身o既歌手有d偏好, 因為自細都好鍾意睇“新秀歌唱大賽” (就並唔係依家變o左英皇搞o既“全球華人新秀歌唱大賽”)…同埋八九十年代新秀出身o既歌手質素又真係幾高! 所以華星執o左都真係幾慘情…畢竟“華星”又的確曾經係香港一個icon, 一間專捧新人又捧得好成功o既公司!

訪問佢o既amigo當然又係勁擦佢鞋啦…又話佢d歌好聽到有個朋友失戀o黎佢屋企一連煲o左幾個鐘梁炳隻歌, 因為佢唱o既失戀歌真係殺晒!

跟住又叫佢抽d人名card去講下o個個人, 有梅姐, 跟住黃淑儀, 最後抽到karen, 唔知點解我以為叫佢講佢前女友湯寶如…之後先醒起原來佢依家個女友都係叫karen…佢果然係好鍾意karen!

Btw, 佢隻新歌幾好聽!

仲有兩個節目想講o下:

1) 因為咁o岩睇到預告, 話亞視個婦女節目“下午麼麼茶”會訪問鄧慧詩, 即刻錄o黎睇o下…鄧慧詩係邊個? 相信呢度有咁多八十年代fans, 都應該唔會太陌生! 之唔係八十年代港台著名dj, 又做過亞視經典青春劇“IQ成熟時”個“細細粒”o個個! 不過睇“IQ成熟時”我最唔鍾意就係佢, 成日眨尾眨眼, 又懶靚咁…最大問題係佢個角色唔討好嘛…尤其當我最愛o既係“珠仔”鄧靄琳!

嘩…真係唔聽唔知…原來佢有個20歲o既仔…唔係呀嘩?! 聽都未聽過…好驚!

不過聽dj做電視節目訪問真係有好鬼怪o架, 尤其係港台o既“老牌”dj, 因為佢o地太著重咬字, 係過份著重o個隻…聽電台都ok, 但一上電視就顯得咬字過份準確, 好怪! 雖然我好怕人有懶音, 但過份“正音”大使又有d驚…可唔可以balance番d!

2) 今個禮拜o既“細說名城”已經講到英國o既劍橋, oh Cambridge…令我憶起3年前o係英國讀書時去康橋探同學仔o既經歷…好懷念添!

從陶傑o既表情同埋佢講o既肉容, 聽得出佢勁鄙視徐志摩, 話佢只係虛有其名咁走o黎旁聽, 連邆書都無, 再作幾首d肉麻詩…仲以劍橋代言人自居! 但係佢話佢o既文采都未及黃霑…估唔到陶傑竟敢咁explicitly去鄙徐志摩…不過佢講o既o野, 我又幾認同喎!