2009年3月20日星期五

3-20(fri) Laughing哥哥哥哥哥~~~~~~~~!!!!!



嘩! 首先要為香港人重新踏入"電視撈飯"的年代而高呼一聲: "電視精萬歲歲歲歲歲~~~~~"!!!

當你一開facebook, 第一樣見到o既係newsfeed盡是laughing哥o既黑白車頭相, 同埋朋友送俾laughing哥o既花牌/紙紥公仔/紙紥別墅/冥鏹etc...都真係咪話唔驚! 禁不住高呼一句: “大吉利是”o既同時, 又覺得幾好笑o下…!

初頭見到d newsfeed覺得有d搞笑, 又確係騎呢, 忍唔住自己同自己笑o左一陣…心諗有無咁誇呀? 但後尾都忍唔住玩埋一份…你話係咪上晒腦呀?! 我平時從來唔會加呢d咩“古惑仔online” etc. applications, 但今次呢個確係潮…仲可以咁快手食住個勢tailor-made o左咁多applications…你都咪話唔勁! 成日都話d網友“創意無限”, 今次係又一例證!

正如網友mandy話我知同佢朋友o既妙問妙答…

問: 我見你燒o左o野俾laughing哥喎…
答: 唔係唔燒呀?

哈哈哈…笑死我! 咪係…真係唔係唔燒呀? 唔燒真係愧為電視精啦! 於是我都唔執輸燒o左個5蚊銀同埋燒肉俾laughing哥…我仲係度諗, 點解無得燒個wendy同芯姐俾laughing哥o架? 點知隔無耐再睇真係有囉...勁! 真係無得頂! 我仲想燒間紙紥警局俾laughing哥添...唔知遲o下會唔會有呢?!

都真係咪講笑…大家依家見面時, 係會問o下”你今日燒o左未~?!”…都咪話唔頂癮! 其實成件事都幾瘋癲o下, 大家上晒腦…但又真係幾好玩喎…好似平時一大班人乘機起哄咁囉…感覺很眾志成城! 呢期探討電視文化又有新課題, 又正如mandy所講, 簡直可以納入年尾“娛樂圈十大新聞”之一…我覺得甚至係第一位添啦! 你真係無可能估到, 電視o既影響力會去到咁無遠弗屆...我以為我係瘋狂的電視精o者…估唔到比我更瘋狂o既仲多的是….oh, I’m not alone!


雖然我都係laughing哥粉絲, 佢o係”學警狙擊”個角色又真係好出, 佢亦做得好好…但我又真係無諗過佢會引起整個香港社會咁咁咁大o既迴響囉...

你睇o下呢兩日fb十個status updates裡面, 有八個都係關於laughing哥...fb個”laughing哥group”, 居然可以不出幾日就突破十萬大關, 聽聞係創下facebook紀錄, 史無前列o既第一位香港藝人 (正確d o黎講係第一個香港劇集角色), 佢一死完o個集仲快手到即刻有個新application叫"悼念laughing哥"...d網友係咁送紙紥公仔/花牌/燒肉俾佢...一開fb盡是呢d updates…真係唔到你唔服! laughing哥都可能會話: “你地一次過燒咁多野俾我, 我有排都用唔晒~” :p

同埋我相信, 謝天華可能係第一個見到自己張黑白車頭相會感到有少許高興o既人囉...

其實呢d fb applications點整o既呢? 係咪所有用戶都可以自己整一d新o既applications? 點會咁update咁快手就整o左咁多tailor-made o既o野o架? 真係勁勁勁!

仲有讀者紙巾報料o既笑料兩則呢...

1) 爆料主題:元朗有中學生話自己跟進興

今日係元朗某間中學有中學生收陀地,仲話係進興既人,一D話跟江世考,一D又話跟laughing,後來成班比訓導主任拉左去訓話,學校無報警,件事就咁算數,呢班中學生真係睇電視睇到上腦。

2) yahoo知識:

我想知進興社ge架構;加入方法,到底跟laughing哥搵食好d,定係田七左輪好呢 ... 加入進興社生活多樂趣?



真係得啖笑囉, 同時又唔到你唔服…我o地作為電視精, 都真係要為香港人再次踏入"電視撈飯"o既年代感到驕傲囉...嘩哈哈哈哈哈哈哈哈~~~!

本來我係睇得好慢, 前兩日仲係睇到上個禮拜頭, 但又感覺真係太out, 同大家搭唔到嗲…人人o係度講緊laughing哥之死, 我仲係睇到上個禮拜, 所以尋日忍唔住的起心肝捱眼瞓一連睇o左6集…追番個進度, 終於要睇埋laughing哥之死先肯瞓…oh, 佢又實在係死得太慘喇, 睇到我想喊! laughing哥呢段寫得幾好, 幾賺人熱淚…做卧底真係要咁大犧牲, 搞o左十年都幾乎忘記o左自己係邊個啦…仲要只係為o左完成個任務連自己o既生命都犧牲埋…未免太偉大! 本來佢一出學堂大把前途, 如果佢唔應承做卧底, 咪唔會搞成咁囉…咁樣真係會搞到無人敢做卧底!

同埋又話警方會俾個新身份d卧底o既? 點解郁o下就會俾d阿sir呀, 前女友親人呀咁拆穿佢曾經入過警校…點會咁o架? 不過算啦, 唔係咁又無得拆穿佢, 無戲做啦…咁佢又唔會死得咁慘+咁賺人熱淚啦, 係咪?

大家話唔想laughing哥死, 其實我又覺得佢係要死先會震撼你的心靈, 先會有咁大迴響o架嘛…如果唔係點會咁多人討論? 佢個角色係o係”學警”裡面最有血有肉, 有情有義 (差d想講埋”有你有我有情有天有海有地”添…), 又夠情深, 所以十分討好! 初時大家以為佢係衰人, 點知原來佢係大好人, 咁咪令大家更力想追落去囉!

不過佢係可以死, 但唔應該咁早死囉…仲有7集搵邊個睇呀咁? 之前個禮拜我成日聽到d人話要返屋企睇laughing哥, 但無人話要返去睇”學警狙擊”…好明顯, 大家都只係為o左睇laughing而睇學警…睇o黎無綫係時候乘勢開拍番套“學警前傳之laughing無間道”咁囉~

好啦, 我又要去燒o野俾laughing哥喇…:p