5-27(sat) 天涯歌女

前幾日講開“飛短留長”, 居然令大家最深刻o既, 係兩位“走樣二人組”…松松姐姐同譚小環! 又係懷舊時間…今日想講o下“走樣一號”松松姐姐, 事關無耐前先拿o左私人珍藏o既“天涯歌女”精彩歌舞片段出o黎重溫!

其實89年尾首播時, 我又唔算有力追o既, 但絕對有睇, 同埋d歌都真係聽到滾瓜爛熟…到幾年前重播時, 就錄晒d精彩歌舞片段…因為我最鍾意睇歌舞片! 劇情, 其實係ok o既…不過只限於頭半部; 後半部又係o個d太heavy, 太克人憎, 太慘絕人寰o既劇情…我最怕睇! 但又唔怪得佢o既, 因為佢基本上都係照周璇一生去寫劇情…咁周璇又確係一生坎坷…只係我好唔鍾意睇呢d劇情o者!

但係劇情笨唔係呢套劇最重要o既元素…最正當然係d歌曲啦啦啦啦!!! 呢套劇最正係隔幾節就歌舞連場, 周璇o係個劇團學唱歌呀, 練歌呀, 上舞台表演呀, 到最後做o左紅歌星呀…每個階段都又唱又跳, 仲要唔止佢一個唱唱跳跳, 基本上全劇演員都好落力…個個跳d簡單歌舞都跳得幾好…至少係幾好笑囉! 同埋好眾志成城…d歌舞片段其實仲好睇+多過“難兄難弟”好多…簡直百看不厭呀!



松松姐姐當年真係做得好好, 又唱得好好…睇番d 舊“香港電視”, 佢拍呢套戲時好似只係一個f.7學生, 仲要無演過任何電視劇 (不過好似拍過幾套青春電影…有套叫唔知咩“鬼馬校園”…有日o係無記禮拜日下午一點d重播陳年電影睇到, 都幾得意o下! 連邵傳勇同何啟南都有得做男主角添!)…可能就係貪佢fresh, 或者覺得個角色好o岩佢啦…蕭笙叔係有眼光o既! 繼當年睇中劉華做楊過, 今次選角都係好無懈可擊!

作為一個新人, 佢真係演/唱/跳樣樣都唔錯, 個樣都幾討好 (可以話係ok靚女), 好清純, 好sweet…依家真係跌watt跌到呀! 我明白佢可能係老o左走o左樣, 但佢直頭個樣好似變o左, 怪o左好多咁! 同埋點解當時唱得咁好, 依家就算疏於練習, 都唔係變得咁差呀?! 加上佢近年個形象真係尷尬到暈, 之前頂多係覺得佢古老石山, 唔適合做演員 (d舊雜誌報導講親佢, 都係話同佢拍戲o既演員個個都話佢清純無雜質, 但係另一方面亦話佢拍親戲都同其他演員好少溝通, 唔參與任何集體活動…咁真係唔該你唔好做藝員囉!), 但都叫做有d堅持執著…點知佢後來又推翻晒佢一路o既堅持,“唔嫁又嫁”…連佢本來丁點o既純情玉女形象都無埋! 藝人最緊要image o架嘛, 你咁一時一樣, cheap晒囉!



另一位主角黎明, o係呢套劇做嚴子華又確係型! 個造型又真係幾掂, 終於明白點解佢o係o個年忽然紅得咁勁, lum到咁多妹妹仔! 呢套劇除o左紅o左松松姐姐, 亦都令老黎上位, 無耐仲有得出第一隻碟添! 記得幾年前松松姐姐曾經有一排主持“勁歌金曲”, 有一晚係“久休復出”o既黎天王上o黎唱新歌, 兩人仲相認一番添…不過大家都嚴重地走了樣!

其實其他cast都唔弱o架, 仲有關禮傑呀, 梅小惠呀, 真正唱家班葉振棠, 方曉虹呀…最經典係仲有另一位天王郭富城嘛! 真係唔睇番都唔記得佢係劇團其中一個成員 (有一幕係劇團成員一齊唱抗日歌, 最尾扮日本仔俾人?住o黎打o個個原來係佢!)…o個時佢仲未去台灣發展, 未走紅…都以三四線藝員身份拍o左好多無線劇, 好似我好鍾意睇o既“淘氣雙子星”, 另一套我都好鍾意睇o既“蜀山奇俠”都好似有佢; 而佢擔戲最重o個次, 應該係“都市方程式”o個個“烏龜戴眼鏡”啦!

睇睇o下仲見到黎耀祥呀, 何嘉麗呀 (唔係做dj o個個喎, 係“義不容情”做黃日華個妹o個個…oh, 亦即係“刑事偵”個芬女), 林利呀做劇團其他成員…個個都自己唱番d歌, 仲要唱得唔錯添! 某幾個scene仲見到呢期 “人氣急升”o既黃德斌做路人甲乙丙…真係好搞笑!

o係另一段唱抗日歌o既片段, 居然無啦啦有駱應鈞o係度…好怪! 其他人d節拍感都ok, 唯獨係佢做每一個動作都完全無節拍可言…但係好搞笑! 佢都係適合做番“皇庭”o個隻老差骨角色多ｄ!

搞笑“抗日歌舞”:


上面o個段歌舞就比較搞笑, 其他o個d就係好好聽+好經典囉! 最經典當然係o個兩首合唱歌:“扁舟情侶”同埋“特別快車”啦! 當年劇裡面d歌真係好hit, 所以佢一出碟, 我就同其他普羅大眾一樣, 仆o左去買一隻! “天涯歌女”…亦都係我第一餅個人擁有o既盒帶!

我記得我當時仲興奮到即時o係一間快餐店拆開餅帶…點知我相信就係因為咁, 將歌詞遺留o左o係o個度! 返到屋企拿來聽時, 諗住一邊睇住歌詞一邊聽, 點知搵極都搵唔到…好唔開心! 好彩我表姐都有買o左一餅可以問佢借番o黎影, 不過無o左原裝版歌詞都係一個遺憾!

當年我真係聽到餅帶爛咁滯, 仲成日同我表姐o係電話對唱o個兩首合唱歌…我後來同d朋友講番, 原來好多人都曾經做過呢件事! 所有同我o地差唔多年紀o既小朋友, 我相信你都一定有做過o既…唔好唔認呀…!

o個兩首歌仲要係有two parts o既添…好精彩囉! “扁舟情侶”就係typical旋律好聽o個隻情歌, 但係我最鍾意o個隻歌係“特別快車”…呢隻真係一隻好特別o既歌…一聽個intro已經令人好興奮, 仲要少有地由慢逐步轉快, 臨尾仲要有火車聲, 好得意! 我o地去k成日都會唱呢隻歌, 簡直係飲歌啦…可惜唔係好多人識唱!

“特別快車”後半部-快o個part:



我記得之後o年我仲帶o左呢餅帶去旅行, 廿日屈o係架車上面不停係咁聽, 全家人都聽到每一隻歌由頭到尾再由尾到頭都識背晒…就算無plug到o既歌, 一聽到個前奏都識唱番出ｏ黎, 依家過o左十幾年都仲記得…簡直係我咁多年來聽得最多o既一餅帶!

不過又真係每一隻歌都好好聽, 一聽到d歌就令人亢奮! 依家聽番都依然覺得好好聽…同埋勾起好多童年回憶! 可惜我餅係盒帶, 無得錄做mp3…如果唔係呢期可以帶出街聽o下呀! 呢隻碟好似勁到話係當時全年銷量總冠軍…一個新人賣到四白金, 勁到唔勁囉! 不過之後o個年隻“月兒彎彎照九州”大碟好似仲勁到有六白金 (真係唔知發生咩事?), 但係套劇就勁唔收得…不過都好合理, 因為“天涯歌女”真係好睇好多!

“呀…呀…伴你泛舟去…但覺遠山彷彿也在笑”…真係好鬼死好聽!“扁舟情侶”mv, 同場加送城城+黎耀祥等人做活動怖景版:



o個時好奇怪點解隻碟裡面d合唱歌唔係黎明唱番, 而變o左溫兆倫唱…有人仲言之鑿鑿咁話俾我知因為leon唱得唔好, 所以要搵發瘟代唱…我當時真係好天真咁深信不疑o架! 到後來先知道係因為唔同唱片公司o既問題…真係太天真喇! 其實後尾諗番…老黎唱功係麻麻, 但發瘟又唔係話好佢好多o者…只係細個唔知道唱片公司o既運作! 過幾年先發現, 點解松松姐姐所有合唱歌都係拍阿發瘟?! 因為娛樂唱片只係得佢兩個+籮記!

睇番資料, 原來佢兩個仲一齊出o左隻兒歌碟添…真有趣!

天涯歌女曲目:

●夜上海　●扁舟情侶／合唱：溫兆倫　●瘋狂世界　●野玫瑰　●永遠的微笑　●龍華的桃花　●天涯歌女＞無線電視劇《天涯歌女》插曲　●月圓花好　●歲月留聲＞無線電視劇《天涯歌女》主題曲　●特別快車／合唱：溫兆倫　●小小洞房　●民族之光　●街頭月　●四季歌　●何日君再來　●歌女淚　●送君

走路新郎哥／兒歌．兒歌曲目:

●男子志高遠／溫兆倫＞無線電視劇《走路新郎哥》主題曲　●這段路／陳松齡　●心內全是愛／溫兆倫＞無線電視劇《走路新郎哥》插曲　●鍾情是你／溫兆倫、陳松齡＞無線電視劇《走路新郎哥》插曲　●兒歌兒歌／陳松齡　●戴家庭／溫兆倫　●烏卒卒／陳松齡　●叉燒飽／陳松齡　●跳跳紮紮遊香港／陳松齡　●最好的伴侶／陳松齡　●創美好明天／陳松齡　●求知奇遇記／陳松齡