2006年3月5日星期日

3-5(sun) 難兄難弟原聲大碟

“人情人情如做戲有真心假意地…”…無論你係唔係電視精, 相信呢隻歌到依家仍然琅琅上口…因為97年首播時, 呢套戲真係風靡全城, 無論你去到邊度, 都會聽到呢隻歌!

仲要唔止電視劇hit, 再出埋碟, 做埋電台show, 入埋季選, 拍埋電影, 再整埋舞台劇…真係你估佢唔到!

即使到9年後o既今日, 一聽到“呀呀呀呀…”仍然會忍唔住唱番兩咀…直情想聞歌起舞!

依家每日最期待睇o既, 居然係深夜重播o既“難兄難弟”…真係估唔到今次重睇, 依然咁entertaining! 雖然呢套劇o係9年來重播過n次, 但我就係見佢重播得咁勁, 當年我又已經好落力咁睇o左一次, 所以之後次次重播我都無睇! 今次見咁耐無睇過, 又開正呢個時段…點都要睇o下! 估唔到睇幾多次都依然咁有趣! 上次“刑偵”就係一個情意結, 再睇番發覺真係無以前覺得咁好睇! 今次都有情意結, 但客觀地睇依然好好笑喎…尤其係頭10集佢o地做咖喱啡o個part!

無線真係有腦o既, 依家深夜12點檔每次都播d大劇…由上年o既“創世紀”到“尋秦記”再到俾我講到爛o既“刑偵1,2,3”, 再到“難兄難弟”…本來睇節目表話之後會做“陀鎗師姐”, 但依家又換o左“大鬧廣昌隆”…呢個我興趣不大!

聽到隻主題曲已令人興奮…的確係作得好, 尤其係隻主題曲…抵佢入季選, 隻碟又大賣! 羅堅同陳頌虹o既配搭, 個chemical reaction確係唔錯, o個期陳頌虹隻“怎會如此”已經掂, 呢隻碟簡直推向高峰! 可能因為d歌全部都係耳熟能詳o個批, 就算唔睇粵語長片, 都必定有聽過呢d歌…今次改過晒d編曲, 好cutie, 又好trendy, 抵佢大hit! 上年隻抄d唔抄d o既“同撈同煲”, 完全無得比!

Image hosting by Photobucket

除o左隻主題曲, 其實成隻碟每首歌都好出色…我尤其鍾意改編自“榴槤飄香”o既“碟兒雙雙”同埋撈家同張可頤合唱o既“望兩望笑一笑”! 當年呢隻原聲碟真係聽到爛…佢o地上o既節目亦都幾乎錄晒添!

呢隻碟點解令我咁深刻…係因為當中有個小插曲! 事緣當時好鍾意睇呢套劇+聽呢d抵死歌曲, 仲聽聞個封面設計好特別…咪就係o個d唔同角度會睇到唔同影像o既封面囉 (好似當年某d yes card咁!)…所以一聽到佢o地話出原聲碟o個日, 即刻仆去信和買, 點知去o左好多間都賣晒…跟住去到一間好似標到140蚊 (原價應該低過100), 但我諗住佢賣斷o左市, 咁難得搵到就貴o左成倍都要照殺啦…千金難買心頭好嘛! 140都肯買, 都話學生年代o既人係最闊佬!

但其實我真係蠢…賣斷o左就梗係會再出貨o架啦, 點會唔乘勝追擊o者?! 等幾日又會再出一批o架啦…應該仲平一截添! 過o左幾日去hmv, 我真係見到出o左新一批cd, 仲要o係hmv同比起我前幾日o係信和買o既價錢平一截…好鬼蠢! 係我買過最貴o既cd!

所以, 我一路以o黎都對呢隻買貴一倍+懶勁會“雙面閃”o既精彩原聲大碟…真係好珍而重之 o架! 點知, 珍而重之o左1年, 入大學時orientation有個freshman nite, 咁又做埋d懶“潮”o既drama, 話要播呢d懷舊歌…咁我就懶好咁提供隻cd啦…點知, 兩下就俾個同學整爛o左個雙面閃cd盒…佢俾返我時, 我簡真想喊出o黎…! 不過我真係唔係怪佢o既, 因為我都知佢無心…只係對我o黎講永世難忘o者, 我用咁高代價買佢番o黎, 你一個唔該同我整爛佢! 哈!

呢隻劇集原聲大碟簡直係創o左一個先河, 當年o既潮流icon, 電視同大碟crossover…同年o既“美味天王”又食住呢條橋…不過再過後o個幾隻原聲碟, 已經賣得唔多掂!

呢隻碟實在太經典, 即刻?番隻cd出o黎聽, 仲錄晒落mp3機度一邊行街可以一邊同佢o地一齊“扭頭扭髻”!

(待續)