2006年3月1日星期三

3-1(wed) 天幕下的戀人 (上)

睇o左幾集“天幕下的戀人”…我覺得都幾ok呀, 輕鬆小品加童話故事加soft lens加少少浮誇…仲搵到好多共鳴添! d演員我都ok (um…mk wong就…都好過以前o既!)…雖然我身邊o既朋友個個都唔多buy niki…亦都唔多buy呢種戲…但我覺得幾好睇!

最吸引可能係佢成套劇都o係朗豪坊實景拍攝, 影晒每一個角落…仲要成日有意無意走上天台…一次就講羅敏莊跳樓, 一次就係鄭嘉穎話要證明塔羅牌唔準, 跟住順勢就影埋落旺角d舊屋景度, o黎個大contrast…sell朗豪坊呢個賣點, 好似times square一樣!

跟住仲有十幾樓個天幕, 又係成日無啦啦走上去…不過都要多謝呢套劇, 如果唔係我真係唔知o個度有個天幕! 同埋拍戲一定係影得個地方靚過真實好多 (連個foodcourt都影得靚過人)…搞到人真係好想再去朗豪坊走一趟! 咁樣真係唔收錢俾佢拍都抵番d宣傳費啦! 仲有, d主角成日去o個間茶餐廳, 我諗到一定係俾o左錢無線幫佢宣傳…如果唔係點會三集唔埋兩集就入一入去食o野!

Image hosting by Photobucket
(去年聖?期間影落的鬧市中的朗豪坊)

咁朗豪坊又係一個幾特別o既地方o黎o既, o係旺角鬧市中心, 好格格不入咁…上年佢o岩o岩開幕時, 我都特登走去行o左幾趟, 幾特別o既一個商場, 設計夠騎呢…下面好pacific place style, 上面就似屋村商場 (當然, 我梗係鍾意行上面多d)…好鍾意呢個contrast, 好鬼馬!

仲有, d office望出去就係商場, 我成日話如果我o係呢度返工, 一定完全唔做o野, 掛住望出窗外…第一集就已經整個求婚場面 (仲無啦啦播首“酒店風雲主題曲”, 又力申集團太子爺方公子, 即“方力申個仔”喎…幾好笑o下!), 等個方公子搭條長電梯上去求婚…幾好橋…起碼可以sell條特色長梯, 仲sell埋個大銀幕添! 我成日都覺得呢條梯好好玩…如果變成sur滑梯或過山車仲好…即係好似西九龍廣場o個個過山車都夠gimmick呀…我多年來都好鍾意玩!

上年已經成日收到d forward emails話呢個地方偷工減料, 又話好快會lum…唔知點解我都覺得好唔穩陣, 所以都係趁早再去走一趟喇!

Image hosting by Photobucket
(朗豪坊中間仲有個透明display room咁o既物體, 得閒會搵d人o黎表演, 好騎呢!)

劇種就好明顯係日劇式輕鬆小品, 仲有主角鄭嘉穎做narrator, 好似以前阿旦o既“小男人週記”咁 (仲要每集有個主題…好似“四葉草”)…上次“甜孫爺爺”又係有劉愷威做narrator…好王心慰style囉 (仲要又係夏雨做爸爸呢)! 不過上次最敗筆係搵o左楊思琦小姐做萬人迷, 令人完全倒盡胃口…否則全劇都好精彩 (其實無佢o個part都好精彩…尤其陳宇琛同老豆夏雨鬥法o個d情節…笑死我, 好耐無咁笑過)!

呢隻“輕輕鬆鬆鄧梓峰”style…幾o岩食飯時候睇! 但其實點解鄧梓峰會係輕輕鬆鬆呢? 同埋有無人可以話我聽呢句係幾時開始“發明”o既呢? 仲要原來仲有句“秘密警察余宜發”同埋“鐵漢柔情尹揚明”…我覺得尹揚明o個句幾貼切…但係點解余宜發係秘密警察?! 如果純為押韻, 我都作到幾句啦…我o地中學年代最鍾意幫同學仔作呢d押韻句子, 尤其係chem堂大家o係lab度眼望眼, 唔幫人作o下花名/寫o下呢d句子…點過日辰呀?

(待續)