2012年4月10日星期二

4-10(tues) 結.分@謊情式+薑愈老愈辣之蔡楓華+羅敏莊in concert!!!

假期睇多咗d電視…睇咗d“結.分@謊情式”...呢幾集講林峯堂妹林夏薇+袁偉豪+欣宜個前緋聞男友沈震軒再加湯盈盈的n角戀! 一路都無咩睇過呢套劇…點解個劇情會搞到咁funny? 點解袁偉豪會撘上湯盈盈?

林夏薇又話係演技派+做舞台劇出身o既…但佢d演技又真係…同埋佢個角色都幾乞人憎…好拖泥帶水吓! 加上佢個樣其實睇真d又唔係真係咁靚, 再加個咁拖泥帶水的角色…tbb係咪又係想玩佢?

仲有, 前日o個集"三個女人一個墟"見到陳冠希個cammi…嘩! 個樣同談吐都真係幾恐怖下! 假使我係男人都搵唔到佢有一樣嘢吸引…即使外型我都不能認同佢係靚! 個整完都好怪! 反而吳唱k女友或者春嬌個情敵楊冪都叫整得靚, 咁都算啦…但cammi真係呢…sorry, 恕我個人刻簿, 聽到佢o既談吐再加埋佢個樣, 真係好欠打feel! 陳冠A的taste亦真係呢…

同埋我再次想講, 估唔到呢三個看似九唔撘八+唔同年代的女人 (卓韻芝+蒙嘉慧+呂慧儀), 夾埋又出奇的有火花喎!



假期亦睇咗兩個“老餅”演唱會…“老餅”並無貶意, 反而係有褒意添! 因為係有實力, 同埋襟撈的意思…:)

首先係羅敏莊o係伊館o既演唱會…自從前年"超級巨聲2"之後…多咗人識佢同埋佢o個首唯一的首本名曲"挑戰者", 不過我諗由佢做歌手開始follow佢o既人又真係唔太多! 現場所見, 佢o既支持者大部份都係上咗年紀的叔叔嬸嬸…呢樣我又真係估唔到, 我諗住佢90年代中出道, 就算係佢d fans應該頂多都係大我幾年! 不過呢個演唱會係似一班friend的聚會多過演唱會!

佢又真係唱出水準喎, 同埋少咗佢近年想見的"江湖聲" (即係好似近年的許秋怡o個隻…無啦啦變成d"跑江湖"聲…:p), 同埋佢選曲真係選得好好, 全部都係八九十年代最hit的歌…好有共鳴, 好過上次黃凱芹係咁唱d唔多hit的歌好多! 個flow亦都唔錯, 首先許冠傑金曲, 跟住係八十年代電視金曲…e.g. 誰可改變, 畫出彩虹, 赤的疑惑, 倆忘煙水裡, 射鵰主題曲 (同場加映永遠的靖哥哥黃日華做嘉賓…阿靖哥哥佢呢期成日做演唱會御用嘉賓喎!), 跟住又有一d陳百強&哥哥張國榮金曲…選曲要俾100分!

另一樣like o既係搵番10多年前港台節目“人間定格”o既"跳格樂隊"(雞蛋, 阿雞, 熊貓,一Lawrence)同主持杜雯惠一齊出o黎jam歌…須知道我當年都係呢個節目的超級fans! 雖然我平時唔多聽電台, 但呢個節目我甚至出咗街都會錄番o黎聽…因為好鍾意聽人現場jam歌! 同埋羅敏莊又真係唱得好好聽! 反而杜雯惠性格太dominant我唔多buy!



跟住就係"楓華再現"演唱會…你真係估唔到佢咁多年來扮晒瘋瘋癲癲咁…但最終真係俾佢講吓講吓去到紅館! 佢舊年鹹魚翻生o係九展開到三場演唱會已經好犀利…點知當大家以為佢癡人說夢話要勇闖紅館時, 佢真係登錄咗, 仲要有九成入座率…你都咪話話犀利!

所以話, 蔡楓華演唱會真是十分"勵志"的... 雖然佢個人"反骨" (呢點我好唔buy), 但佢個演唱會真係能夠帶出"只要有夢想, 凡事可成真"的道理…完全係"堅持就是勝利"的典範!

原來真係只要堅持, 幾咁天馬行空o既事情都可以發生, 30年o既夢想都可以實現…勵志程度達100! 真係NOTHING IS IMPOSSIBLE! 我覺得tvb今年年尾應該幫佢拍番輯"我的2012"講番佢呢一年, 甚至呢三十年的故事!

真係唔到你唔信 (雖然我都有少少感到驚訝)…現場反應之熱烈, 真係嚇親你! 我見到佢d fans支持咗佢三十年, 仲要三十年後都仲咁不離不棄, 仲咁熱情, 連我都感動埋一份! 可能見到佢哋個偶像實現到佢三十年來o既夢想, 亦係佢哋自己本身三十年來o既夢想…成件事又係感動o既!

現場反應幾咁熱烈, 大家真係要睇吓呢段片…否則你都不能相信現場有幾咁群情洶湧…


(2012年4月7號蔡楓華情陷紅館演唱會)

仲要d觀眾好多都識晒佢d歌…我隔離個哥仔直頭d冷門歌都識…同上次d 現場觀眾一樣咁勁! 估唔到紅唇皇子原來除咗女fans多, 男fans都唔少! 我後面有幾個c9仲讚嘆話佢依家身型咁好著乜都好睇! 哈哈!

至於佢o既金曲…當然離唔開"倩影", "絕對空虛", "愛不是遊戲", "也許", "十年", "何必曾相識", "青春三重奏", "IQ成熟時"…仲有d應該係d碟o既side track! 但佢今次居然肯唱別人的歌…又真係變咗好多囉! 估唔佢一達成30年的夢想, 心結解開咗, 成個人都正常番晒! 連d"瘋人瘋語"或自戀語句都無晒…原來佢一路只係太自負同埋放不低, 先會搞成咁…又係一個好好o既借鏡! 凡事睇開d, 一切都會變得美好! 否則只會白白浪費咗三十年! 不過我見到佢最終有今日, 解開心結放得低, 真係衷心戥佢高興!

反而同佢合唱"愛的火花"o既林志美就變咗另一個佢…口水多過茶, 講埋d九唔撘八嘢! d人係咁大叫佢唔好再講快d唱歌, 佢都依然係咁講, 但又好似唔知自己講緊咩咁喎…怪咗!

現場仲有fans舉起"蔡楓華天皇巨星"大燈牌…真係好威水囉…