2006年6月10日星期六

6-10(sat) Da Vinci Code

尋晚雖然好眼[目訓], 但都頂住睇o左套“追魂交易”大結局, 其實都唔係太差o既…雖則我無完整咁睇過一集! 呢套o野係2003年拍, 好明顯係inspired by當時好hit的“無間道”…無啦啦又見到馬國明先生做茄喱啡, 係同期o既“律政新人王”o個隻茄喱啡…咁佢呢幾年都自上位上得幾快!

反而主角阿胡仔…其實好樣過馬小生好多, 做戲又唔差, 唔知點解紅唔起? 可能真係輸在個樣太baby face, 無主角格囉! 阿馬國明o個時真係仲樣衰又仲爛面, 咁比較o下原來佢依家真係叫好樣o左好多又型o左好多! 胡杏兒其實都幾有potential o既, 抵佢有得紅! 依家佢為套“肥田囍事”增o左咁多肥, 真係差d唔認得佢!



呢期又睇到一篇幾有趣o既訪問, 係關於“火舞涼瓜”其中一位配角vincci (究竟佢個名點串?! 我明明記得係vincci o架?!) 王賢誌o既…原來佢同我好似…都係一個超級電視精!

----------------------------------------------
豪語錄
Da Vinci Code王賢誌

我當然知道達文西,但如果沒有那部小說和電影,腦海不會終日浮起Leonardo da Vinci;與此同時,如果不是《火舞黃沙》令王賢誌多了人談論,平時我只依稀記得他有個發音與賢誌相近的洋名 [芒按: 我就會記起同佢個名發音相近o既ben哥哥黃智賢喇!]。兩個偶然加起來,我才恍然大悟:原來王賢誌即是Vinci。

王氏港建(上市編號532)主席王忠桐替兒子起這個名,頗反映為父的期望——一代天才喎!但王賢誌說,不太認識大畫家的事跡,雖然留學加拿大,連英文書也少睇。他比較鍾意做電視,自言是茄喱啡,而且一做十二年。

有錢仔願意由低做起,並沒像其他同類亂花屋企錢來捧紅自己,至少是值得尊重的;但前途,恐怕也猶如達文西密碼,刁鑽難測。

說王賢誌不適合吃這行飯嗎?又不盡然,「我擅長做慈善show,每年《歡樂滿東華》(父親王忠桐是前任東華主席),不用睇稿o翕得出所有總理的名字,邊個做得到?[芒按: 咁呢個又係!]

「《火舞黃沙》那個角色,公子哥兒知書識禮,我自問亦有說服力。」

閻家二少是演得好的,我的意思是,劇中人懶理家族龐大生意不接手那一幕,Vinci,你才真箇戲如人生……

玩厭雅達利

王賢誌強調自己並非很「有」,我信,王忠桐身家估值「才」2.7億。但作為同是七○年生的男生,我更在意王家早年代理雅達利電視遊戲機——今時今日PSP千幾蚊,人人買得起;廿幾年前的雅達利也賣千幾蚊,王家少爺卻玩到唔玩,怎不教人羨慕?

小學六年級時,daddy為我搞了個生日會,排滿十部電視機十部雅達利,節目就是打機,daddy話費事朋友仔排隊等喎,至今同學談起仍津津樂道。[芒按: 嘩! 好囂張!]

但我畢竟不太喜歡打機,更遑論其他家族生意:電路板、發泡膠,太悶。小時候,爸爸晚晚應酬,媽媽也要去,剩下我和兩個妹妹在家裡,迷上睇電視,台慶和選港姐對我是天大事情。我還投稿到報紙,打電話上電台,不是為稿費和獎品,只為名字可以見報,把聲可以出現在大氣電波。

所以,中三舉家移民時,我將全套《新紮師兄》、《鹿鼎記》錄下來,驚去到那邊無得睇。在溫哥華列治文區,我連接電話也習慣說「喂」,而對方即使打錯居然也答中文「對唔住」——那裡比香港還香港,除了上學,根本不用講英文,英文書也少睇。[芒按: 哈哈…原來佢同我係“坐埋一[木台]”o既!]

大學我唸marketing,本來想報傳理系,家人希望我讀商科,marketing算商科中最貼近傳媒吧。我課餘加入那邊的中文電台做DJ,義工又肯捱,後期已晉升到有份參與幕後行政了;始終發展機會少,九三年我畢業回港,九四年加入TVB——當然,靠熟人介紹囉,但沒有因此大捧我,放在一邊,起薪點四千八百元。

我沒想過像麥浚龍拿錢捧紅自己,其實我已耗用屋企很多資源——住屋企食屋企,駕屋企車,咁多年來無俾過家用,夠了吧。

九七年,有個音樂人斟我開公司,幫我出唱片,我在能力範圍加上問屋企借,投資了十幾萬,後來發覺對方呃我,鬧上法庭,從此我不再諗這些了,也不會再借錢給圈中人。

到現在做了快十二年,大家知我熟悉內情,更無人會呃我。

不做鄧兆尊

有人以為《火舞黃沙》是王賢誌首次拍劇,幾令當事人啼笑皆非。其實他由《孝感動天》的小太監做起,但總算無線「知人善任」,旅遊飲食節目的主持,介紹歎世界王賢誌自然頭頭是道,至於慈善show司儀,簡直強項,去年《歡樂滿東華》,他個人籌得六十萬善款,位居藝員之冠。

我曾經刻意迴避,家裡司機車我返清水灣電視城,我也寧願在路口油站落車,依然有同事竊竊私語:「王賢誌是不是很少爺脾氣?」可能他們以為我像鄧兆尊。

但做善事,我認為無謂避,籌到多些錢總是好事,而且那次我找老表鄭嘉穎一起表演,免得被人講。[芒按: 完全唔明佢個“籮直”…搵埋鄭嘉穎一齊就唔會俾人講喇咩?]

以前自覺外形不錯,又生得高大 [芒按: 如果以前睇到佢咁讚自己, 會覺得係天大o既笑話…當初佢一入行, 真係覺得佢超樣衰…但上個月見到佢真人, 原來又真係唔差喎!];點知入到電視台,靚仔過我的大把啦。

我喜歡做主持,哪怕半夜的音樂節目也好,勝在一定有名字打出熒光幕。

如果說為名,考慮到家族有頭有面,我不能幹些荒誕行徑搏出位。九五年《忽然1周》影我家居,標題《電視台茄喱啡住五千呎豪宅》——OK,茄喱啡真是我title,加多利山的家雖然只是租(月租十萬元),亦真有五千呎;但內文說「個廳有人成個單位咁大」、「裝火爐扮高貴」,何苦呢?自此我不再讓記者影家,怕影響到屋企人。

主力做司儀就好,daddy喜歡見我著西裝,淡淡定定的。

爭取加人工

王賢誌說,要吃這行飯,一係好靚,一係好有錢,一係識好多人。後兩者他都有了:向海嵐是他表姨(雖然年紀比他細),鄭嘉穎的外婆是他祖父的妹妹,分屬老表。「嘉穎應該大過我,報導有時寫他六九年出世,有時寫七○年。我問他,他說:『你當七○啦。』」其實Vinci不明白,家道中落的鄭嘉穎風霜寫滿一臉,自然要認細,怎似得表弟快活不知時日過?

我也急。以前有得出鏡已心滿意足,很快會想:做到黃金時段豈不更好?後來有份主持《K-100》,○一年起年年做《東華》。我並非沒有進步,但不算快,總是慢慢累積,每次要離開又捨不得,就拖了十二年。

不知道有沒有被壓價,加幾千蚊人工,坦白說不能改變我的生活,但一樣會爭取,我需要的是那份被肯定。情緒起伏時,我試過要看心理醫生。

你說我有朝一日總要回到王氏?這不是帝王時代非要父傳子不可,兩個妹妹已長大嫁人,可幫爸爸手;再不然,有能者居之,持有股份,請個企業專才去管理也行。

但到了那一天,我會一刀切二揀一,總不成一邊坐董事局一邊做電視台。

再續約也只會逐年計見步行步,去年吸引我留低的是《火舞黃沙》;今年,有個劇籌拍嘉穎和我飾演一對好兄弟,我覺得事成的話會幾有紀念性。

想學壞

楊寶玲那屆港姐的亞、季軍誰屬?王賢誌搶答:「李美鳳、林穎嫻。」陳法蓉呢?「朱潔儀、梁佩瑚。」拿他沒法子。[芒按: 死啦…原來我同vincci真係好相似!]

查小欣有時也call我查資料呢。我真是一個娛樂字典,每個月花九百多元買齊全港主要報紙和八卦週刊來刨,還請剪報公司剪下關於我的報導。

你說得對,如果將這份專心去做生意 [芒按: 真係好鬼死似我…如果我能夠將睇電視o既passion放於我o既“正職”上…我o既成就可能超越…!]……但我無法忘記,翁美玲八五年死,上了七日報紙頭版,幾多有錢人都不及她,我覺得這才叫不枉此生。

我從前不蒲,有場戲講我借醉強姦黎姿,哈我連醉的感覺也未試過。小時候睇電視像study一樣做足功課依時依候開錄影機飛走廣告,然後讀書考試,做主持也戰戰兢兢記下今次穿了淺色下次要深色。三十五歲人,回想起來竟從未玩過;今後,好想癲下,學下飲酒,拉闊自己。

或者,這才像個藝人。



解碼

要找一張王賢誌在《火舞黃沙》的劇照,不難;但還是偏愛這張,幾反映當事人處境——排到山頂的演員,跟睇演唱會坐山頂一樣,唯有講句誠意支持囉。

只是不明白,明明住山頂(加多利山)點解甘於排山頂?[芒按: 哈哈! 呢兩段好啜核!]

達文西不姓達,正確應是da Vinci。意大利文的da,還有荷蘭的van、比利時的von,都難言有何實質意思,但差之毫釐,正如並非人人符合大畫家筆下的完美人體比例,叫Vinci的王賢誌欠個da,暫時,唯有「文西」而已……