H-E-J-N-O-M <=> 芒姐再現: 2008年2月20日

2008年2月20日星期三

2-20(wed) 肥姐

呢幾日太多單大新聞…尋日朝早忽然收到消息話肥姐死o左…雖然大家都會有心理準備, 但都有d突然, 因為兩年o黎曾經多次傳出佢病重, 但都大步檻過, 所以諗住佢今次都會無事…點知…不過對佢o黎講, 可能咁樣反而係一個解脫! 見佢一路瘦o左咁多, 應該真係撐得好辛苦!

睇到節目表話肥姐個回顧特輯十點半開始做, 點知返到屋企已經做緊…原來改o左九點半…搞到人miss o左好多添! 不過今次無綫同亞視都安排得好好喎, 識得深宵重播番呢d特輯, 咁我又有得睇番miss o左的部份, 但係搞到3點幾…好眼瞓! 不過個特輯真係慘到呀…估唔到喊得最勁o既係一班大男人…曾志偉, 夏雨, 羅浩楷, 洪天明個個都喊到講不出聲…真係好sad…連我呢d咁o既人都睇到忍唔住喊晒…好彩一個人o係間房入面!

肥姐唔係o個種天王巨星/super star, 唔會話有超級多粉絲o個種…但真係家傳戶曉o既藝人, 同埋真係陪住所有人成長…不過我估唔到個迴響好似仲大過之前o個d巨星, 可能因為佢對電視圈真係有舉足輕重o既影響…有免費電視第一日就有佢, 而早年香港人最大o既娛樂就係睇電視…每日陪伴你, 好似身邊的朋友咁…佢代表o左香港呢四十年o既電視文化, 所以電視o既回顧特輯都係特別多!

其實欣宜真係好慘…依家先得o個廿歲, 外婆o岩o岩先死o左, 依家媽咪又走埋, 咁短時間失去兩個摯親, 實在太可憐…依家孤伶伶一個, 你叫佢跟佢老豆就仲死, 個後母應該唔係人咁品 (我當傳媒一向的報導誇張作佢o既為人喇…打個六折俾佢都死啦!)

睇番d報導, 更加可以理解點解當年大部份媽咪級o既女士都對鄭少秋恨之入骨, 係…感情係好難講, 唔鍾意就唔鍾意, 唔洗擇日子…但你變心都唔緊要, 可唔可以唔好處理得咁差? “hau”個老婆大肚去滾, 仲要一生完個女就離婚, 你要離婚都唔差在o個一兩年, 唔係o係佢最需要人關心o既時候嘛?! o個個女人更加不知所謂, “hau”人大肚去勾人老公, 仲要咁理直氣壯…真係…!

那時候我的眼睛開始老花，就是剛剛生完女兒沒多久，發覺她父親已經變心了，所以我就哭泣，還沒有坐滿月，這眼睛已經哭花了。但是我們做電視的人不能把真正的感情帶上舞台，所以就算你不開心的話，你上舞台你也要裝著很開心。

我一直跟女兒講，他是你的爸爸，我跟你爸爸之間到底發生甚麼事情，將來長大了你問你父親，他會告訴你。那個阿姨（官晶華），你還是要很尊重她，所以我女兒跟她們都相處得還不錯。

(其實我睇唔到有咩理由仲要去尊重佢…佢自己都唔識得尊重自己?! 你做得第三者 [仲要係咁高調o個隻], 都預o左行出街會俾人指住o黎鬧啦!)

好多人對肥姐印象最深刻係踩雞蛋一幕, 而我心目中最難忘o既其中一個場面, 係87年tvb20周年台慶…d人扮30周年台慶會點 (依家已經再過o左10年, 40周年都過o左喇)! 最經典o個part當然係盧海鵬扮欣宜啦…肥姐同do姐唔敢望佢驚忍唔住笑, 到見到佢之後o既爆笑反應 (包括肥姐差d失禁同埋do姐個笑到出唔到聲o既樣)…真係好好笑!

仲有何b拿住把遮話要掛住“阿姐”都係抵死啦…點知一走o左無耐就已經同o左第二個! 話叫佢介紹何太出o黎…點知大姐明出o左o黎, 話世事好難預料, 等到四十周年先見何太啦! 講到好似好耐咁, 點知一眨眼已經係四十周年! 何太…依家大家都係邊個啦! 仲有好多o野都好諷刺…一開場介紹do姐做“甘鄭裕玲”女士…點知到真係30周年的時候…所有o野都已經面目全非!

(87台慶盧海鵬扮欣宜的一幕)

仲有呢一幕89台慶“玩相聲”…又係勁到爆! 肥姐的背台詞捉節奏能力真係好勁, 另外d藝人其實表現亦算合格o架喇 (雖然應該有大字報睇住, 但係要跟o岩個節奏都有一定難度…尤其對一向唔係口齒伶俐o個批)!

當然, 呢班藝人o既口才, 除o左肥姐之外, 我最欣賞就係陳敏兒 (尤其係因為近期o岩o岩重溫完 “挑戰”, 好鍾意陳敏兒個角色)! 同埋個script都寫得幾好, 同依家o個d差好遠! 除o左呢一幕, o個年台慶另一大經典環節就係“超級八卦法庭”…o個時覺得好好睇, 又係到依家都好記得…得閒要重溫番先! 點解當年的台慶可以好睇過依家o個d咁多?