2005年9月4日星期日

9-4(sun) 我和米老鼠有個約會

剛去完迪士尼, 同想像中差唔多…一個字:“逼”!

原來今次呢個公益慈善日, 開創o左香港迪士尼多次預演o既最高入場人數…有成二萬九千人! 嘩! 大佬, 你個樂園咁細, 唔該唔好放咁多人入去…真係得個“逼”字! 再額外送多四個字俾你: “一片混亂”! 但又唔係新聞報導訪問d人講到咁差…我都有位食飯, 有廁所去, 影到相, 見到明星, 仲買到手信! 機動遊戲就確係無咩玩到, 但不嬲都唔多keen, 所以都ok呀!

無大期望, 亦無咩失望…一切如大家所料! 好好醜醜都值得去一次! 尤其“新屎坑”, 有得去試o下, 飲到頭啖湯, 又做埋善事…更加高興啦!

o個日又larp o左少少“酒店風雲” (無錯…我會盡量記住唔係 “酒店大亨” )…個故事真係老土到爆…原來馬德鐘o既出現原先係要令吳唱k三兄弟團結…點知跟住又種種誤會, 又你背叛我, 我出賣你咁…實在太難頂喇! 同埋我真係唔太喜歡呀ella…雖然客觀地睇, 佢作為一個新人都算做得唔差…好過“學警雄心”?面o既薜海琪!

片尾曲又係“別怪她”…真係聽到有d悶…同埋我依家一聽到呢隻歌, 只係會諗起欣宜! 克勤就勁啦, 幾乎係今年tvb唯一一套戲首主題曲唔係搵d主角唱番, 而係俾佢唱…仲要係重頭劇喎!

嘉碧儀o個段都好老土好突兀…仲有, 楊婉儀做d巴渣角色真係好無說服力, 同埋佢點睇都大蔡子健一個round, 而蔡子健更加無可能做三兄弟?面o既大哥…我初頭一直以為莫家堯先係大佬?!

前幾日睇k-100, 話9月會重播“刑事偵”…之後睇番節目表, 原來今個禮拜三晚開始就接住“尋秦記”做喇…大家記住要留意!

其實早幾年睇番呢套戲, 已經唔覺得咁精彩…但因為係中學年代o既一個情意結, 同埋因為我自已保存o個幾餅帶好似已經發o左霉, 所以我決定會力追返! 真係不經不覺已經到呢套劇o既10周年…好可怕! 無線決定o係呢個時候重播呢套劇, 對我o黎講簡直係perfect timing, 唔追番都對唔住自已啦!

尋日睇有線娛樂新聞, 又發現原來陳曉東已經不經不覺踏入30歲…嘩! 我印象中o既佢仲係當年o岩o岩出道, 只得20歲o既“一次真愛追尋一百次”東東, 又或者係同kelly加埋已經唔知改o左幾多次名o既陳建穎一齊合唱“打開天空”o既東東…原來, 咁又過o左10年…都係o個句: “時光飛逝”!

仲有, 點解“YUMMY YUMMY”仲未做完? 咁o既戲都可以做咁多集…救命!