2009年4月20日星期一

4-20(mon) 贈興…張家輝

呢篇純粹係為張家輝贈興…因為我都戥佢成為今年金像獎出爐影帝感到好高興! 唔知點解…可能因為由亞視睇住佢捱, 捱o左十幾廿年, 終有出頭天…!

其實我從來都唔係好into金像獎, 電影我都唔係太感興趣, 所以今年個頒獎禮依舊係一片混亂, 無記仲要cut得奇差…我都無咩所謂, 只知道今年個賽果幾係稱心…咁已經足夠! 從來都無覺得話金像獎好睇過…我唯一有d印象o個年應該係2003年sars期間全香港好眾志成城, 加上哥哥o岩o岩逝世, 金像獎搵到四大天王一齊合唱”當年情”o個一幕我係幾深刻o既! (其實佢今年話要搞gimmick搵d特別配搭頒獎, 房祖明拍薛凱琪…我見到吳尊, 即刻諗點解唔搵佢同鍾嘉欣一齊頒獎呢:p)

平時d賽果我都唔係點理, 但係令次咁o岩睇到, 賽果仲要好少可咁稱心, 一定要講o下, 為佢o地贈興o下啦!

今次見到班亞視藝員抬頭, 尤其係見到張家輝同鮑姐攞獎, 真係衷心戥佢o地高興! 畢竟我都好支持亞視o架…好多人都以為我只係無記fan屎, 其實大家向左邊望一望, 重溫一次我o既profile, 就會知道…學我"前偶像"況天佑話齋, 我同樣"欣賞亞視o既誠意"...尤其基本上人人都有鋤強扶弱的心態o架啦...我都唔例外…所以對於亞視, 我一路都好支持…不過我唔否認到o左近年佢真係一塌胡塗得太交關…我都被逼要放棄o左喇!

亞視o係我成長o既九十年代, 真係偶有佳作o架…最成功o既當然係馬小玲同況天佑o既“殭屍”系列…呢個我真係die hard fan屎! 仲有早年o既”勝者為王”, “大提琴與點三八”, “點解阿sir係隻鬼”, “Q表姐”, “藍月亮”等等, 全部都好好睇, 有d仲創意無限! 亞視勝在無大台o既負擔, 所以成日可以嘗試一d無記唔會拍o既劇種…曾經真係幾掂o架! 仲有我未出世/懂事前麗的拍落o個jar經典劇好似“變色龍”, “大地恩情”, “iq成熟時”, “甜甜廿四味”等…真係就算三十年後o既今日睇番都咁精彩…真係好戲連場呀, baby!

仲有最佳女配角都係亞視寂寂無名o既演員陳麗雲, 佢應該係“我和殭屍有個約會”裡面做阿平媽媽o個位…最深刻係佢係咁o係度叫“邪花入宅”…當時我o地成日quote佢呢句說話o架…哈!

當然仲有智叔啦, 又係十分討好, 平實得o黎演技又好…令人感覺好舒服!

就係可能因為今次個賽果係平時o既“弱勢社羣”抬起頭來, 先令人特別高興…同埋之前幾年總會夾雜一d國內或其他地方演員得獎, 但今次個得獎名單好“local”…所以令人特別有親切感!

咁多個當然係見到張家輝攞影帝最感動…佢同關詠荷呢一pair真係好正…記得97年關詠荷攞無綫第一屆視后, 張家輝仲係o岩o岩過檔無綫, 連最經典o既“家咩姐o者”甘量宏一角都未做 (注: 如果唔係電視迷o既朋友, fyi…“家咩姐o者~”為1998年經典電視劇《天地豪情》內張家輝飾演的甘量宏一句經典對白,多年來一直為網民津津樂道,不斷被重覆使用。連芒姐本人到依家都仲成日講…wahahaha!)…俾人話佢o地地位好懸殊, 依家終有出頭天...好戥佢高興…正如佢o地自己都話仲開心過結婚!

講真, 張家輝近十年真係型o左好多 (而關詠荷都靚番, 有一期佢又係跌watt跌得好勁)…當年睇亞視, 我都好唔明亞視點解會捧佢...:p 即使有演技, 佢o個時個賣相, 真係有少少嚇死你! 我記得有一套係佢拍陳錦鴻加劉錦玲做o既所謂青春勵志劇”衝出校園”…咁就主力係講離開o左校園之後o既遭遇o既, 如果係講佢o地幾個做學生, 咁都幾驚o下! 當時陳錦鴻個靚仔look又真係討好過佢好多…但後來, 我又變得buy張家輝多好多, 因為佢夠funny! 所以依家見到佢守得雲開, 又真係好戥佢高興!

同埋張家輝同關詠荷兩個o既形象又夠討好…好記得97台慶頒獎禮後有個節目叫“回到未紅時”, 第二集搵o左o岩o岩攞完視后o既關詠荷做嘉賓…張家輝扼佢話唔得閒o黎, 點知最後俾驚喜佢神秘地出現, 仲唱番首情歌…關詠荷感到動喊o個幕, 呢一幕好深刻…終於俾我搵番段片…請留意由22分鐘倒開始…個人認為呢集最好睇!



之前又睇過d報導話張家輝大約95年曾經不辭而別走o左去南非唔知繼承遺產又打理餐館咁, 半年後返到o黎發覺關詠荷仲有幫佢照顧患病o既家姐...真係好有情有義囉! 所以佢o地呢pair真係好正!

上網睇睇o下, 有人話傳聞張家輝有次去探佢老婆班, 順便客串o左“同事三分親”一幕…係第140集最尾幾秒著淺藍色衫果位食客…大家又覺得係咪佢呢?!


最後送上之前睇到張家輝o係明周o既訪問…

唔怕死 -- 張家輝

看《翡翠歌星賀台慶》,自然令人懷念以前樂壇的星光熠熠,別說八、九十年代,不是很久以前,張家輝也是歌星,如果他今年有份參與,應該扮張學友吧,我們剛開始拍照時,他口裡還哼著歌仔,真的很似。
他拍賭片被稱為周星馳接班人,如果有機會讓他講棟篤笑,應該有幾分黃子華的苦澀笑匠味。不是說他扮嘢叻,而是說他有很多質地可以使用。
用張家輝的字眼,是「工具箱裡有很多架生。」
他拍過杜琪峰的兩集《黑社會》,撞擊過成功轉型,再用他的字眼,是「互相閱讀對方」,杜導演發掘出他的哪一面?「他覺得我唔怕死。」
這種唔怕死,又要從歷史數起,張家輝成長於單親家庭,自幼家貧,幾歲做街童,十幾歲做童工,中三畢業就考警察,做了四年軍裝,不服氣沒機會轉做CID,又炮劈唔撈。性格又硬又倔,還娶了個太太關詠荷,比他更硬更倔,兩人拍拖最初幾年堅拒合照,甚至不肯在訪問中提到對方名字,結婚生女,又因消息發佈問題和傳媒鬧得很僵。
眼前四十歲的張家輝,臉上添了風霜,減了做無線小生時的油頭粉面,令人更襯唔怕死的個性。

想孩子做二世祖
一直只知張家輝兩歲幾的女兒英文名Brittany,未聽過他講中文名,他釋出善意,問了我兩次「真係好想知?」才說:「她名叫張童,名字是師傅改的,沒有特別含意,他給我一堆名字,我自己揀的。」
女兒是他的心肝寶貝,報載他賣掉西貢村屋,離開住了十七年的清水灣一帶,搬到貝沙灣洋房住,那裡有更佳的學校網,在家中和女兒講英文,自己也每星期抽三小時學英語,希望女兒在一個優裕的環境長大,將來讀國際學校。他是廿四孝父親,什麼都安排最好的給她。
「我係架。當我要死的時候,我希望積聚很多財富給她,如果我是李嘉誠,我會告訴她:『你不用工作,你是二世祖,你是千金小姐,你去正正當當使錢啦。』我個人立場是,當我過身時,要剩到錢給女兒,做什麼都不緊要,你喜歡讀書,讀什麼都供你讀;你不喜歡讀書,鍾意研究,想去哪裏都讓你去。這個是我的投射,我現在做父親這個角色,我的女兒有爸爸,我希望給富裕的生活給她。」
張家輝小時候很窮,父母一早離婚,他在單親家庭長大,沒有爸爸,十四歲中二就去做童工,在五金工場做學徒,被前輩欺負。
「唔止,我做過很多野,幾歲大,五、六個街童夾廿蚊,買一桶汽水,加埋冰,拿去沙灘賣;又試過在石峽尾,很多鬼佬遊客來拍照,我拖住他們的手影相,他們給我五毫子。
「我不希望我的兒女重蹈我的不開心,我童年的不快,我不想我女兒承受這些。」

追第二胎與太太有分歧
生兒育女是千斤重的責任,經濟上和心靈上都是。關詠荷很想再追一個,拍完一年《同事三分親》就毅然辭演,還透露「驚趕唔切生多個BB」。
張家輝卻持另不同看法。「其實我唔prefer生多個,因為一個責任已經很大,要照顧她成長,要教導她、支持她、愛她,由BB到成年人,對程中很多事情要擔心。」
怎樣和太太達成共識?
「但另一方面我又知她想的原因是什麼,單獨一個小朋友成長比較孤單,無論看書或聽人講都知,我明白,隨緣啦,況且生小朋友不是想要就有,我又沒有堅決反對。」
看得出張家輝真的變了,以前他和關詠荷拍拖時,可以火爆到吵起上來一手反[木台],後來性格同樣倔強的關詠荷有樣學樣,下次吵架時輪到她一手反[木台]。
「就係我衰,做了一次給她看,下次就輪到她做,結果就是這樣。我和Esther是類似的人,你都睇到她是多麼不注重曝光的藝人,她比我更倔,都是朋友不多,少接觸人的。」
兩個同樣充滿稜角的人,能夠一起十五年,結婚生女,必定從對方身上學習了不少。
「人與人的相處,我和你更談得來,都有唔妥的時候,人的性格是無辦法改的,你不喜歡她就不要和她一起,你喜歡她,就要喜歡她的性格;你喜歡她的樣子,但不喜歡她的性格,以為可以改變她,算罷啦,落降頭、養鬼仔都改變不到。」
起碼我喜見他承認自己變了,他說:「我現在聰明了,若果我再生小朋友,或者有很重大的事,我會自己公開,再不需要別人跟蹤或懷疑,我會講出來,儘管我想不想都好,我都會這樣做。」

不辭而別八個月
是不是人在江湖,身不由己,也無謂深究了,人生於世,有多少人是真正自由的?張家輝年少時曾渴望自由,有過一段頗不羈的往事。
九五年他和關詠荷已走在一起兩年,因相處問題暫時分手,剛巧他由亞視轉去無線,本已簽了一張長約,突然不辭而別去了南非,替離世的叔父打理餐館和處理遺產,一去大半年,後來他最疼愛的姊姊癌症入院,他趕回來看她,才知道關詠荷不但常到醫院探他姊姊,還保留著他送給她的小狗,因此再見面時,兩人很自然又走在一起。
當時他心想:「她個性好硬,但畢竟是個好女仔。」
兩顆石頭碰在一起,碰得咯咯作響才有實在感。張家輝的硬更加有跡可尋。他中三輟學投考警校,願望是做重案組幫辦。畢業後早期做軍裝,後來做藍帽子,第四年被調去做交通意外調查組,每天案件堆積如山,終於等到一天,有機會調去做CID,上司卻說﹕「你調走左,邊個做?下年至調。」他一怒之下,回到座位用打字機打辭職信。
轉行之後與朋友合作搞汽車生意,誰料一敗塗地。失業期間,一個任職副導演的舊同學介紹他入李修賢的「萬能影業」做幕後,由場記做起,李修賢知道他做過警察,對他特別欣賞,八九年轉幕前拍第一部電影《壯志雄心》,之後入亞視做了六年,過檔無線不久就走紅。

推賭片捱過三年
後來他拍了幾部搞笑賭片,被稱為周星馳接班人,縱使現在不少觀眾最記得他的作品依然是這批王晶片,對張家輝已是回不了的過去。
「很多觀眾跟我說,喜歡睇番我的《賭俠》、《黑馬王子》、《化骨龍》,我也問過自己,我可不可以再做呢?我發覺唔得,那個階段過了,做不到就是做不到。」
為了轉型,他忍痛推掉無數類似的賭片劇本,弄至有三年工作量大減。
「我這些交際手腕咁差的人,邊識得四處敲門?都是拍一些國內電視劇,或者一些『濕星』一點的東西。那三年難過的,不是經濟上,是心態上,有得做又唔做,你想做的又唔輪到你做,怨邊個呢?自己揀的。忍了很久,又有一個賭乜賭物的劇本掟來,我真係不會拍。我不是抗拒拍搞笑片,只是不想拍差不多的東西,我受不了,但沒有人知我受不了的地步去到哪裡。」
後來他遇到杜琪峰,由《大事件》到《黑社會》,走出了新戲路,他不介意演悍匪、亡命之徒,角色性格的多層次令他滿足到戲癮。

做不到大仁大義
「杜琪峰拿了我唔怕死的感覺出來,我本人是不是這樣?某程度上都認同,唔怕死的人都是單純的人,我都幾單純,飛機這個人,食匙羮也做得出。
「唔怕死是一種意識,你惡,我不一定好驚,也未必要同你鬧交,可能會殺了你,打爛玻璃杯劏開你條頸。」
張家輝手邊就有隻玻璃杯,他說上面那句話時,感覺就像真的打破了玻璃,伸手過來。
他連說話都有戲,現在要找他開工,最重要有戲可演,他最近為無線拍節目巡禮,明年下半年會回巢拍劇。
「我同戚其義見過面,他的故事我有興趣,我強調返TVB做不到大仁大義,大義凜然那些主角位,我提不起energy去演,人性化、戲劇化一點的適合我,我點會有興趣做靚仔、好人、好多女伴、感情瓜葛那些角色?講真,拍電視那種日夜顛倒,並不易捱,如果連個故事都滿足不到我,又怎能支持到我去捱咁瘋狂的工作時間呢?」

亡命之徒
張家輝在新片《証人》也是演亡命之徒,這個角色別有一番欷歔,是關於電影行業的。
「導演林超賢想講,我是一個做買賣的亡命之徒,隨著時代改變,經濟氣氛不同了,有很多新的年輕人肯賣命出來做,我收一萬,那些收五千,在這種社會變化之中,逼到盡頭,一個亡命之徒的性格都有層次。
「正如一個副導演,在盛世時接好多組戲,控制千軍萬馬,搵好多錢,但隨住經濟變遷,很多學院派年輕人出來,沒有經驗,但老闆不問經驗,只問價錢,一個電影人的心態,就和一個亡命之徒相差無幾。」
演《証人》時,他要化爛面妝、扮盲,一如以往過份投入角色,不分日夜在腦中反複思索,他去年試過在雲南邊境拍文藝片,環境太惡劣以致抽離不到角色,患上輕微抑鬱症,拍戲令他生活也受影響。
「有時失眠得好離譜,天光也睡不著,直至中午十二時才入睡,好恐怖,怎樣合上眼,雙眼都是瞪開,看電視、聽音樂、浸泡泡浴、浸浴鹽,鬆弛自己都無辦法,甚至食安眠藥都無效。」
太鍾意,唔投入唔得,也就是唔怕死,演戲也有亡命之徒。