2006年12月16日星期六

12-16(sat) 歡樂滿東華卡拉之星經典再回顧



(薛家燕@歡樂滿東華2006...”來吧hooray”!!!)

嘩…好勁!!!!!! 居然無意中俾我見到有人upload左“卡拉之星”片段上youtube…本來一路都搵唔到, 諗住要自已post番兩段, 哈哈…依家有朋友“造福”o左人群, 唔洗我o黎…實在太偉大喇! 大家如果miss左…真係記得要重溫番…尤其早兩年o個d, 更加係非睇不可!

2005歡樂滿東華卡拉孖寶-王俊棠+魯振順…今天不回家+全…為…愛…!!!…真係睇得人好興奮…氣氛好過今年幾多呀…佢o地成jar人本身都natural high晒! 呢堆人…實在太騎呢…但我鍾意啊!!!



呢幾日重溫番2002+2003+2004o既“卡拉之星”環節…即係最好睇o個幾屆! 2002年應該係最多人o個一屆, 有成十幾位…每人唱得半隻歌, 到喉唔到肺…到2003, 2004年就係最癲峰…大家都各施奇技, 笑爆咀!

02年當然已經有一貫o既家燕姐, 王俊棠, 魯振順等…仲有d偶然幾年都有o既鄺佐輝, 祝文君, 鄧汝超咁…都做o左好多年! 仲有o個個不知名o既嘉駿, 完來都卡拉之星o左n屆o架喇! 當然唔少得呢5年來爆笑之選“手語人”王維德啦!

依家人人見到王維德都會話:“oh呢個就係做手語o個個!”…但係佢02年未開始做手語, 只係依舊走晒音+甩晒beat咁唱出華仔o既“中國人”…咁佢之後幾年做手語o既決定確係超級明智…因為起碼可以distract o左人, 無咁覺得佢五音不全, 同埋又出到位…笑死你唔洗本! 最精彩仍然係03年o既“強”同埋04年o既“無極”(好明顯佢係城城同劉華fans)…同埋, 點解佢家姐係舞蹈藝員, 佢可以完全無遺傳到少少咁多舞蹈細胞, 跳舞都跳到錯晒拍子?!



(“手語人”王維德@2005卡拉之星…d人真係超騎呢…佢後面d藝人都跟住佢亂咁不停做手語…真係唔知想點…勁抵死! 可惜搵唔到之前o個幾年o既片段啦…)

仲有又係不經不覺已經癲o左幾年o既黃樂兒…扮sammi唱“癲當”, 摟條羽毛o係身懶姣咁! 最抵死係連套衫都學番sammi十年前唱“叮噹”o個套…好out! 連主持林曉峰都勁窒佢!

又有森森個仔, 李小龍個侄李家豪…佢都好似一連唱o左兩至三年! 好彩佢依家終於都肯照o下鏡離開呢個娛樂圈…真係sorry, 佢應該早d買塊鏡…唔好太天真啦! 唔知幾時阿寶珠姐個仔, 三十幾歲人仲俾人叫“經經”o既楊天經先生, 先肯學師弟咁面對現實呢?

呢一年仲有好多稀客, 連yim悶主持敖嘉年都有, 仲有“都市閒情”o既主持溫裕紅, 居然唱hocc o既“光榮之家”, 更加有埋佢o既colleague阿盧念國! 真係笑死我!

最估唔到係舊年憑李笑好一角人氣急升o既湯盈盈, 當時都要靠呢個環節出位…點知舊年就直頭黃金時間成part俾佢做! 02年連o係卡拉之星唱“隆重登場”都入錯o左成段o既佢 (o個一刻我真係戥佢好瘀, 因為佢o既body language話俾大家聽佢瘀到爆), 又點會諗到3年後可以有咁o既一日…當比佢出位十倍o既魯振順同王俊棠都仲係要留守o係深夜時段o既卡拉之星, 佢就可以有自己o既節目…真係行起運o黎無得講!

(呢段唔關卡拉之星事, 但都幾有趣…“王菲 1990 歡樂滿東華 又繼續等 (Dancing~!)”! 其他有趣片段…自己search啦…)