2009年12月5日星期六

12-5(sat) 萬千星輝頒獎典禮2009後記

尋晚個台慶頒獎禮…一如大家所料無咩驚喜…咁當然無“驚喜”好過有“驚喜”, 否則我驚今日無綫門外會結集o左一班示威人士放火燒tvbuddy! 今年個賽果算係咁多年來最“眾望所歸”… 連報紙都少有的寫得“正面”…好評如潮咁喎! 同埋仲要放o係港聞 (雖然我明白係因為要配合截稿時間)…俾人o既感覺都真係好似一大盛事咁…仲多人關心過今日o既東亞運揭幕!

今次頒獎禮令我發現原來我身邊o既電視精數目比我想像中的仲要多...尋日無啦啦有同事打內線問我究竟幾點開始頒獎禮, 又有朋友吹我食飯食快d, 有好多我平時唔覺佢o地係電視精或者會追電視劇o既朋友, 都有趕返屋企或者約埋一班朋友一齊睇頒獎禮...原來我身邊的朋友比我更加著緊今次個頒獎禮…反而我本人其實miss o左都唔太相干…總之唔好o係我未睇番個節目之前就洩露o左個賽果俾我聽就得喇!

我相信可能大家都係“乘勢起哄”o個隻心態多d o既…即係禮拜五反正都會約出街飯局, 咁多樣activity又好似開心d勁d咁嘛…不過又係喎, 今年同埋d朋友一齊睇頒獎禮, 你一言我一語咁, 又的確係令人睇得更加興奮! 相反劇集我就一定要自己一個人睇, 唔俾人騷擾先得o個隻! 以後有咩大型頒獎禮, 我都應該約埋一班人一齊睇起o下哄先得…想與電視精一起睇台慶頒獎禮的朋友…明年記得請早…因為本人一向都係奉行first come first served o既!


(估唔到o係朋友家影電視都可以影得幾清楚…高清電視果然高清…hohoho!)

首先貼番個賽果先…唔係下年一定唔記得…

萬千星輝頒獎典禮得獎名單:
最佳男主角:黎耀祥《巾幗梟雄》
最佳女主角:鄧萃雯《巾幗梟雄》
最佳男配角:謝天華《學警狙擊》
最佳女配角:謝雪心《巾幗梟雄》
我最喜愛的電視男角色:柴九(黎耀祥)《巾幗梟雄》
我最喜愛的電視女角色:姚金鈴(楊怡)《宮心計》
飛躍進步男藝員:敖嘉年《巾幗梟雄》、《碧血鹽梟》
飛躍進步女藝員:陳茵媺《畢打自己人》、《學警狙擊》、《烈火雄心 3》
最佳節目主持:曾志偉、錢嘉樂、阮兆祥、王祖藍《鐵甲無敵獎門人》
最佳劇集:《巾幗梟雄》
最佳綜藝資訊節目:《星星同學會》
萬千光輝演藝大獎:李添勝
tvb.com人氣大獎:黎耀祥
最佳表現大獎:楊怡
最具欣賞價值大獎:《霎時感動》



(btw…阿黎太你近期個形象未免學鄧萃雯學得太足...驟眼睇我幾乎分唔到你兩位囉~~~)

講番個賽果…基本上我係中間先join o黎睇…即係到頒我最喜愛女主角o個度倒啦! 係咁揀d五強出o黎實在係有d拖時間…不過算啦…多d人有獎皆大歡喜o下都無壞o既! 但係鄭視帝的高顯揚有份入我最喜愛五強有d牽強…不過都唔夠黃bosco憑列“烈火3”入到視帝五強咁夾硬o黎…佢自己個表情都好驚訝囉! 即係你要俾個獎佢都唔可以太夾硬o黎o架嘛…首先佢o係“烈火3”個角色算唔算係男主角我都好有保留…同埋你要俾都俾王喜或者郭晉安or even撈家 (雖然佢唔會o黎) 都合理d呀!

另外, 我又真係估唔到tvb真係捧楊怡捧得咁犀利…我最喜愛頒俾佢我都有d愕然, 雖然我buy佢本人多過佘佘, 但我估無綫會俾佘佘多過俾佢…同埋, 其實我覺得佢做金鈴呢個角色又真係唔算做得特別好, 有少少over添…反而佢前幾年做o個d楚楚可憐角色就真係得喇…當年無咁多人追捧佢o既時候, 我真係覺得佢做得好好…遠至2003年, 我已經好buy佢! 不過buy還buy, tbb今年無啦啦加o個個都幾有豬肉成份o既“最佳表現獎”又頒埋俾佢, 又真係未免捧得太出面…咁對佢反而未必係一件好事!

至於其他賽果…其實都真係賽前估o個d啦…無咩好談論…我最喜愛男唔係柴九就係laughing哥起雙飛…兩個我都ok! 黎耀祥o係“畢打”做社長真係做得幾好! 至於鄧萃雯, 其實由始至終我都幾buy佢…因為佢俾到我一種好有性格o既感覺…即使係八十年代佢做o個d刁蠻角色好似“俠客行”個叮噹, 仲有“萬家傳說”隻九尾狐都唔錯呀! 佢今年終於攞到, 我都戥佢好高興!

係有少少估唔到“宮心計”無分到個最佳劇集獎囉…事關其他大獎都俾晒“巾幗梟雄”啦嘛…我以為tbb點都會分番個俾佢o地! 咁當然, “巾幗”攞都好合理o既…唔錯呀!



噢…賣飛佛的心姐果然好elegant…講句說話都溫婉過人…仲要呢個年紀都keep得咁好! 伍詠薇講o野又果然係最抵死, 我buy佢囉!

今年d頒獎嘉賓講o野依舊沉悶, 兩個人一齊頒獎大家對住講都無咁odd…最慘係自己同自己講o個批…又長又唔好笑…尤其係余安安…我都戥佢慘! 但話時話, 點解佢塊面 (尤其係個嘴) 忽然歪得咁犀利o既?!


(噢賣吉~我最喜愛的利孝和夫人…你個頭未免染得太黑…怪o左~)

可能個人大o左, 依家每年睇台慶頒獎禮, 除o左睇邊個得獎, 好重要o既一part就係要睇o下d靚衫! 呢幾年d女藝人又真係好搏盡…d排場仲勁過台慶夜當晚…靚人靚衫…I like it! 作為一個女性, 一定要從中偷o下師先得o架嘛~!

鄧視后今年有黃wyman做形象指導, 的確唔同晒…佢o個套斜膊白色“sa”開o既裙, 我都幾鍾意!

反而d auntie級藝人仲搏盡過d後生女, 阿米雪姐姐都真係未免太"行"…舊年o個套反而“elephant” d…今年呢套有d泰國feel, 又有d似參加舞蹈比賽…不過雖然over o左少少, 但都係靚o既! 咁阿姐o個件“孔雀開屏裝”都已經叫好過台慶o個晚o個兩套o架喇! 阿鄭太后Mary姐都好似o黎個大低胸…勁! 反而舊年嚇死你無命賠o既郭羨妮今年收斂o左, 反而好好多!

後生o個批呢…阿鍾嘉欣…你今年無論髮型服裝都唔得o左…要搵人幫你執執喇…上年咪幾好! 反而阿法拉簡簡單單幾恰到好處...! 仲有胡定欣, 本來佢個"夢露"look都ok, 但佢套衫望真d好似就爛咁, 同埋有d離晒罩...佢著得呢種衫就算無身材都應該墊少少...如果唔係會好怪! 當然, 以佢o既身材唔揀呢種衫會好d…



我鍾意呢篇…好wyman囉~同埋我都覺得條裙幾好喎…仲有佢o個個“光頭四眼妹”的結論…又係成日都會發生囉…hohoho!


特稿:四奶奶的命運之裙 (by黃wyman)

四奶奶找我替她選晚裝時,只得一個條件:「我一定不要白色!」因為她認為白色穿得她很肥。
我應承替她挑「戰衣」時,也只得一個條件:「我一定要『拖地』!」沒有任何個人偏好,只因為電視觀眾未必個個是時裝精,曳地長裙的美醜就算引起見仁見智的交頭接耳,傳統的式樣長度至少是個保險──「你不能說我『懶』有型不尊重場合呀。」

結果,呢個世界就係咁嘅嘞,我們意見一致地揀了件「白色」的「及膝」的 Monique Lhuillier,又一次教訓我們說話不能講得太盡,口口聲聲不嫁光頭佬不娶四眼妹的人,最後一定發現他/她一生最愛的 soulmate是光頭佬或四眼妹,甚至光頭的四眼妹!

其實考慮過過百件晚裝,謝謝 Vivienne Westwood, Valentino, YSL, Stella McCartney及其他很多個品牌的熱心,很多裙子都鬼火咁靚,只欠一下一見鍾情。

有看我《蘋果》專欄的朋友或者記得我有個「轉圈實驗」,對,這條單肩白裙子是唯一令鄧萃雯小姐從 fitting room走出來,一對着鏡子就不停轉圈而不肯停下的,命中注定大概就是這麼一回事。

而且,這襲晚裝是她自己付錢買的,並非接受任何品牌的贊助,這種求好而誰都不賣賬的性格,也真的非常「鄧萃雯」。

世上只有兩種最佳女演員,一種是「拿了最佳女演員獎的最佳女演員」,另一種是「沒有拿過最佳女演員獎的最佳女演員」,鄧小姐,你一直已經是我心目中的後者,如今,連前者也是,心裏亦真欣慰。
撰文:黃偉文


最後, 當然係…tvb台慶@芒姐再現:

2009:

http://hejnom.blogspot.com/2009_11_19_archive.html


http://hejnom.blogspot.com/2009_12_03_archive.html


http://hejnom.blogspot.com/2009_12_05_archive.html


2008:

http://hejnom.blogspot.com/2008_11_14_archive.html


http://hejnom.blogspot.com/2008_11_17_archive.html


http://hejnom.blogspot.com/2008_11_19_archive.html


2007:

http://hejnom.blogspot.com/2007_11_17_archive.html


http://hejnom.blogspot.com/2007_11_19_archive.html


2006:

http://hejnom.blogspot.com/2006_11_09_archive.html


http://hejnom.blogspot.com/2006_11_13_archive.html


http://hejnom.blogspot.com/2006_11_19_archive.html


2005:

http://hejnom.blogspot.com/2005_11_19_archive.html


http://hejnom.blogspot.com/2005_11_20_archive.html


http://hejnom.blogspot.com/2005_11_21_archive.html


2004:

http://hejnom3.blogspot.com/2004_11_19_archive.html


http://hejnom3.blogspot.com/2004_11_23_archive.html


2003:

http://hejnom3.blogspot.com/2003_11_17_archive.html


http://hejnom3.blogspot.com/2003_11_19_archive.html


2002:

http://hejnom3.blogspot.com/2002_11_19_archive.html


http://hejnom3.blogspot.com/2002_11_20_archive.html