2005年12月24日星期六

12-24(sat) 本草藥王

oh, 點解今年平安夜無o左“最精彩”o既“金曲勁播平安夜”o架?! 估唔到除o左我有留意呢個節目, 身邊好多朋支都有留意! 有朋友話話:“點解無o左夜晚d人坐晒o係度好悶咁傾偈o個個節目?”oh, 唔係呀嘛? 我好鍾意睇o架喎! 雖然我都承認呢個節目幾無聊o下! 以前會特登留o係屋企睇, 就算出o左街都會準備定錄影帶錄起成個節目…最頂癮係好天真地以為個節目係live, 成晚唔停咁做到4,5點…真係好低能!

24號晚就係新人節目, 到31號晚仲會照版煮碗整個拉票節目…但呢兩年都無o左喇! 反而個新人巡禮仲o係番度! 今年個“紅白組”男女新人大鬥法擺明係學“翡翠歌星賀台慶”(但係今次我覺得女歌手做得好d反而又男子組贏o左,“翡翠歌星賀台慶”就剛剛相反…好好好明顯係男子組做得好d, 但就大跌眼鏡俾女子組贏!)…又係搵鄭中基同楊千嬅做綽頭, 但係佢兩個今次完全無火花, 只係好辛苦咁背晒d台詞出o黎! 最尾o個part佢兩個學蘿記同梅姐當年同一時間唱兩首唔同o既歌, 但其實一聽就知係就晒楊千嬅, 後面伴奏都係back佢隻“烈女”, 但鄭中基就要o係“烈女”音樂下唱“無賴”…明顯難好多喎! 同上次蘿記+梅姐個對唱o既性質都唔同o左! 不過又係o既, 千fa係要就o下, 如果調番轉佢應該會唱唔到!

而d新人o既表現就更加係嚇死人…只可以講係: 好難聽, 嚴重削!

最最最唔掂o既當然係吳唱k, 佢同其他樂壇新人格格不入不特止 (都係去做番戲罷啦), 唱歌仲一次比一次差, 今次唱d最無難度o既歌都走晒音…比起佢“學警雄心”?面個好兄弟阿“走音王”郭力行更走音…人o地反而有d進步喎! 繼“一曲走天涯”走足大半年o既“別怪她”快+慢版之後 (平心而論, 慢版係ok o既, 只係聽到膩o左…但隻跳舞快版真係嚇死你!), 隻新歌甚麼“愛瑪仕小姐”仲恐怖多十倍, 歌難聽, 舞亦都唔見得好睇! 佢簡直就係男版盧巧音, 一個就sell自己實力派, 點知唱歌走晒音; 另一個就話係舞蹈藝員出身, 但係跳舞好似仲差過上次同佢同場o既方力申!

仲有阿王菀之, 唱歌係唔差, 但亦唔係大家吹捧到咁好…最頂唔順係佢講o野, 真係嚇到你毛管直豎…一日用o個把有聲無氣o既吹氣聲o係度話:“hello, 我係王菀之ivana!”…d人形容佢為“老鼠聲”, 其實都真係已經好俾面佢! 平時如果聽到d用咁o既聲講o野, 真係會想打巴佢! 可能d男人會好buy, 但女人聽到真係想嘔!

如果夾硬要揀, 我會比較喜歡衛蘭 (但係佢個樣真係好似盧苑茵…可能就係因為咁, 所以d人話佢似sammi, 因為嬲sammi同佢o係“浪族闊少爺”?面o既媽咪盧苑茵都俾人話係餅印! 今次janice跳舞仲露o左成條大腿出o黎, 更令人諗起初出道o既肥美sammi, 不過sammi美d囉!)…跟住我早半年話鍾意toby又俾人鄙視…不過我都唔知點解愈o黎愈唔欣賞佢! 同埋點解stephy唔競選新人呀? 佢應該好大機會o架喎! 雖則話佢出o左道幾年, 但蔡一傑前年都可以?新人獎啦…佢唱片公司做咩咁o徙料? 如果佢有份候選, 都應該實入三甲, 但niki就可能會無份喇 (除o左o係tvb!)

尋日講開葉璇o係‘情陷夜中環”o既表現, 其實佢o係無線套“本草藥王”都做得ok o架! 不過無線就係小家o左d, 雖然佢已經離巢, 都唔洗o係“本草”網頁?面連佢o既劇照都無…話晒佢都係女主角呀, 洗唔洗做到咁cheap呀?

今次個古裝女裝look都幾靚…雖然我依然係覺得佢扮男人更適合! o係“本草”佢都有扮o左一集男人, 其實幾乎次次做古裝佢都有扮男人, 又搞埋d咩“龍陽之癖”o既誤會…次次都係咁! 今次佢又係做好似孟麗君o個隻好剛強o既女人, 又係話唔接受男人三妻四妾, 次次做古裝都係做同一樣o既角色!

而阿馬國明先生, 又係做d少“鹹濕伯父”style o既角色…點解曾華倩會…鍾意佢o架?! 佢同梁朝偉…差幾遠呀? o個日 “東張西望”訪問馬國明關於佢o既緋聞, 有人問我佢同邊個傳緋聞…我話係曾華倩! 佢話: “o下?!” 露出一個匪夷所思o既神情…我何嘗唔係一樣驚訝呀?!

之前上網睇到d資料, 原來阿馬國明先生o既出生日期係1974年2月13日…嘩! 真係一個好成熟o既新人…同佢同期o既新?小生, 全部都係7字尾8字頭! 而原來佢係o係University of British Columbia 讀Mechanical Engineering (不過未經證實, 有d資料又話佢未讀過大學…我都唔多清楚喇! )

阿“慕榕”李詩韻, 又係同親個個女仔討論都話唔多鍾意睇佢, 因為把聲難受, 個樣又有d鞋抽 (咁當然唔及“向海”), 但係同親男仔研究, 大家又話ok buy佢喎! 再一次證明男仔同女仔o既口味係好唔同…另一個最佳例證係楊思琦小姐 (女仔勁怕佢, 男仔勁?佢)! 我就覺得阿慕榕個樣除o左鞋抽o個part外, 其實都ok靚o既! 同埋以一個新人o黎講, 佢做戲都算唔錯…但係呢期無線實在太力捧佢喇, 一連三套劇都有佢…overdose永遠都唔討好!


(一個有介紹果珍o既網頁!)


哈哈! 最抵死係不嬲都唔多覺係電視精o既黨員, 呢期短暫投入電視精行列, 套套戲佢都講到兩咀, 尤其係呢套“本草”…佢睇得仲“d-條”過我, 仲anaylse埋d劇情…話如果唔係果珍咁多事自作多情又幫人整個屋頂, 時珍同冬青就唔會搞成咁…真係笑死我! 連主題曲佢都識唱…“近”呀!

最“驚喜”係黨員居然話佢好鍾意“果珍” (李時珍個阿哥)…又話好鍾意佢成日坐o係自己整o個張椅…好可愛! 雖然後尾黨員又補鑊話其實唔係鍾意果珍個人, 而係覺得呢套戲選角好好, 呢個角色好o岩艾威做 (前名徐威信)…無所謂啦! 我知你真係好鍾意果珍o架喇!

其實睇睇o下“本草藥王”呢套戲都ok好睇, 又學到好多“冷知識”呢! 同埋o係呢期另外幾套戲愈睇愈騎呢, 愈做愈over之下, 發覺呢套戲係最正常! 你唔會話好鍾意睇, 但又唔會好憎囉…食飯時睇呢種戲就最o岩!