2008年10月3日星期五

10-3(fri) 少年四大名捕

既然大家都叫我要睇o左呢套先, 咁我都順應民意睇o左“少四”先再追番”與敵同行”! 即係咁, 雖然我一向唔buy古裝, 但呢套睇落都幾ok, 可能因為d人我都ok buy…“少四”o個“四少”ok呀, 係d女主角弱o左少少, 不過我都好落力咁去接受! 要再講一次, 阿嘉美徐子珊其實真係比起幾年前靚o左好多, 尤其呢套無咩其他靚女同佢比較, 咁樣會好d! 佢做呢d溫婉o既角色係有d唔配合, 不過演繹都算可以接受…但佢咬字真係好有問題, 應該改善下, 同埋我都係覺得佢同馬明襯d…可能因為佢o地成日都情侶檔! 不過今次咁配搭都有d新鮮感!

李詩韻其實做戲算係ok o既…前幾年作為新人仲好d添 (當然, 因為佢已經做o左幾年戲, 對佢o既要求亦相應地提高), 不過佢d廣東話真係…亦都需要訓練o下發音! 頭一兩年都可以接受, 但5年都仲係咁就有點兒…!

至於四個男主角…上o左位之後罕有地擺埋o係一套戲, 都有d吸引力! 尤其呢套係有少少古袋兄弟情o個隻…至於d金田七式查案…我就一般啦, 有時fast forward睇會開心d!

林峰的確係古裝扮相英過時裝…佢文質彬彬咁, 係更適合古裝…難怪當年我呢d唔鍾意睇古裝劇o既人, 睇完“再生緣”之後都好buy佢做o既皇甫少華! 同埋其實佢o係第一套做第二男主角o既古裝劇“尋秦記”個look都唔錯, 作為新人o黎講演技亦算係十分ok添! 其實如果要俾個視帝獎佢, 我寧願俾呢套好過管家仔…管家仔個角色婆婆媽媽咁, 其實真係唔係咁討好!

陳鍵鋒做呢d懶皮角色, d人覺得唔適合, 我又覺得算ok喎, 加上佢口才了得, 嘴jel jel咁, 都幾o岩! 佢同林峰o既角色, 就好似o岩o岩同佢o地o係“律政新人王”裡面o既角色性格相反…大家對調o左!

至於馬明, 都係一貫水準…角色都算討好, 所以都唔錯! 阿唱k又真係唔知由幾時開始跌o左落谷底, 完全爬唔番起身, 無晒神彩…雖則話佢o係呢套戲係要演最cool o個個…但真係同以前個勢好唔同…好似變成“少四”裡面排第四o個個…不過無綫都待佢不薄, 仍然俾佢憑呢套劇提名台慶“我最喜愛男主角”, 反而陳鍵鋒都無份!



睇到呢套劇o既“叔叔”林嘉華, 深夜再睇番“新變色龍”o既“o靚仔”林嘉華, 真係卅年人事幾番新…兩套戲同期播o既感覺真係幾得意! 仲有, 居然連譚小環都無啦啦做o左auntie級…真係歲月趨人!

商天娥o係“與敵同行”又再次要做同佢差幾年o既男藝員o既阿媽…真係可憐! 今次o既鄭嘉穎都後生過郭晉安少少o既, 至少郭晉安係我小學年代已經睇佢, 鄭生都係中學年代先出道, 不過兩個拍埋又真係差唔多大…男人真係kum老好多…仲要老o左反而仲有型! 都話男女從來都無“平等”o架啦!

同埋, 真係有咩可能搵“天幕下”個大家姐何綺雲做鄭嘉穎個妹? 佢又真係無忽似喎…個樣好似大佢好多咁!

嘩! 睇台慶宣傳o個套大製作"珠光寶氣”, 好似真係幾勁咁! 卡士好掂喎, 不過有一大半係同“家好月圓”o既cast overlap…我好似又見到阿凌B同于素秋…你千萬唔好話我聽佢o地又係做一對…唔該唔好再延續佢o地o既”朱元璋之戀”呀~!

呢期報紙除o左kelly婚禮, 捕蛇行動, 江若琳day day喊之外, 就係台慶頒獎禮…雖然係人都知呢d頒獎禮係一場遊戲一場show. 但作為一年一度o既盛事, 當然大家循例都要討論o下...但又唔洗睇得太認真! 我唯一唔明o既係…楊怡點會仲有份角逐“飛躍進步女藝員”?! 佢都已經唔係o個個level, 佢都話佢自己差唔多十年前已經提名呢個獎, 仲要03年已經攞過同一個獎…點會到依家都仲提名呢個獎o架…無綫d機制都亂晒籠咁o既…!