2011年11月11日星期五

11-11(fri) 港樂 x 張敬軒交響音樂會 + 三個小神仙吹唱會 + 蘇永康給那誰演唱會

呢期又睇咗好幾個show…幾個都好好睇!

首先係港樂x張敬軒…本身已經覺得會幾好睇, 但出o黎比我預期更好睇! 雖然九展呢個地點我真係麻麻…每次去親都好麻煩! 好彩發現咗淘大附近有間人和荳品廠d腸粉+荳類製品都好好味, 多咗一個去o個度o既incentive!

第一次睇張敬軒…其實一路都想睇吓佢演唱會, 尤其當上次o係其他人o既演唱會 (好似係周[慧敏?) 聽過佢唱live…真係好好聽! 之後就決定如果佢開演唱會, 我一定要去捧一次場! 雖然佢d歌我真係有好多都唔識 (哈哈, 我都識"my way", "笑忘書", "酷愛"呢d最hit o既歌o既)…但就算唔識o個d歌, 都ok喎…佢d歌其實真係幾唔錯吓! 仲有佢唱live真係好好好好好得!



我睇o個晚有佢o既"煙幕情侶"王菀之做嘉賓, 佢兩個把聲真係好夾…ivana唱歌又真係好好聽喎…其實佢一出道時真係好鬼怕佢把雞仔聲…但後來發現佢講嘢原來好抵死, 仲要係用把雞仔聲講d好抵死o既嘢...效果更抵死…wahahaha!

同埋管弦樂團本身我都好鍾意聽…所以成件事又係得咗! 本來想睇多一場添呀…可惜又係full晒啦!



至於另一個show係阿旦同林珊珊o既"三十小神仙吹唱會"...雖然唔太係我個年代…但都幾好睇喎! 當然, 如果我大多十年會更有共鳴! 好"那些年", 好有msg, 同埋仲星光熠熠過"星光熠熠耀保良"...又軟硬, 又草蜢, 又鄭伊健, 又周慧敏, 又劉美君, 又露雲娜, 又林子祥父子, 仲有林曉峰…可惜無何嘉麗…連出一出o黎都無, 未免有d絕情!





哈哈…開show前仲偶遇古SIR與女...助手添…:p



跟住前日又睇咗 "蘇永康給那誰演唱會"…呢個反而有少量悶, 望咗好多次電話…真係估佢唔到! 同埋佢個台居然係同林珊珊個台有9成係一樣! 未免太慳水慳力…哈哈! 但其實阿公我係ok buy o架嘛…同埋我自從睇完"大四"之後, 反而覺得佢係4個之中最型 (:p)…尤其以佢外型咁局限都居然可以扮到咁型! 難怪佢其實好受d女性歡迎!

阿公唱歌係好好聽, 不過o個幾首"臺號皇庭"同埋"妙手仁心"插曲, 真係未免有d相似…分都分唔清! 佢咁多首歌之中, 我就最鍾意"情來自有方"同埋"男人不該讓女人流淚"! 我估唔到o既係…三個演唱會之中, 反而呢個比較悶!