3-15(mon) “THE BIG 4 世界巡迴演唱會香港站”…留意, 係有"the”o係前面o架…唔睇番都唔知~~~

期待o左好耐好耐, 東撲西撲, 一波三折 (下刪一百字), 終於撲到"大四"o既演唱會飛…當然要多謝幫我撲過飛o既朋友!

呢個演唱會係我咁耐以o黎最難撲到飛o既演唱會 (又或者係同上次sammi演唱會差唔多啦), 可能因為開得比較少場, 同埋大家一開始無諗過會咁爆! 不過其實我又唔感到出奇喎…呢幾年興“集體回憶”嘛…尤其興懷80/90年代的舊…因為o係o個個年代長大o既我們…依家呢個年紀最適合/有能力去懷舊! 大家睇番上次“鄭伊健友情歲月09演唱會”就明晒!


(唔知點解依家紅館門外咁多星星棒賣...令我諗起當年小忌廉支棒...其實我寧願d人拿番以前d正路螢光棒仲好d...同埋個青色阿姐好驚嚇囉...:P)

其實呢四位仁兄絕對係九十年代的集體回憶...而四個人本身我都幾ok o既...不過可能係我期望太太太高 (第一係對於佢o地四個本身, 第二係因為太太太難撲到飛…所以個expectation自然會set得高d), 又未至於我想像中咁好睇 (但都係好睇...:p)...最大原因係佢o地明知呢個作為"食老本"o既集體回憶show, 但係佢o地"食老本"食得唔夠徹底 (如要學習"食老本"的真諦, 請參考“鄭伊健友情歲月09演唱會”...o個個就真係徹徹底底做到"回憶返埋o黎"喇!)...

今次big4好多經典歌曲都改o左arrangement, 咁已經失o左個精粹...而更令我"失望"o既係…真係好多經典歌都無唱到...尤其係許志安o個d...有咩可能會無"男人最痛", "喜歡妳是妳", 甚至當年好興o既劇場版…o個d o翕一輪咩"畫個心o係棵樹度然後俾個神父見到..."o個隻"我心中有你"o架?!?!?! (查實當年我聽呢首歌o既讀白係覺得勁騎呢...十級頂癮....但呢d騎呢o野過o左10年之後當然變成經典啦!)…我係一心諗住去重拾我的"童年"回憶o架嘛!



其實我都好明白一個演唱會o既時間要四個人分實在係好唔夠分…仲要佢o地是但一個o既經典歌都夠唱晒成個show啦…真係好難揀歌o既…不過有d經典歌又真係不能不唱囉! 我寧願佢o地講笑d o野, 唱多d歌…雖然dicky講o野係幾好笑o下, 但又真係未免講得太多 (我明白佢無咩歌...但又真係唔駛四個分得咁均勻o既...又或者佢唱o下另外三個d歌都ok呀!)...唱歌時間的確係少o左d...同埋佢o地三個太多我expect會唱o既經典歌都無唱 (後面medley係另一回事啦...都無o個種一聽到前奏就起雞皮的feel!)

我希望佢o地汲取o左大家o既意見之後, 會改一改rundown啦...至少加番呢d不可劃缺o既經典歌曲嘛! 我今晚會地去睇多次...頭場+尾場o黎個首尾呼應呀嘛…係咪好瘋癲先?! 無法…有尾場飛我又真係唔捨得放番出去…因為佢o地的確係我o地呢一代o既集體回憶...就算有d經典歌未有時間唱, 我係覺得有d美中不足…但睇佢o地四個已經係值得叫囂o既一晚~~~



呢part個構思我覺得幾好...正!!! 各人扮番自己參加新秀時的look...同埋扮經典的小虎隊…“拿jar不怕海龍皇~~~”



當年vs今日...咁多個之中我覺得許志安個look造得最似當年...我記得佢o地有次訪問笑安仔當年參加新秀呢個造型....話件冷衫o個兩邊袖互相套住等件冷衫唔會跌先係成個造型的重點...:p

四個之中又的確係安仔最得o既...又唱又跳都咁掂...抵佢係唯一一個攞過"最受歡迎男歌手"囉! 仲要42歲身型都keep得咁fit添...:p



梁炳個造型都ok o既... 不過個假髮真係唔得...:p



1985年vs 2010年的蘇永康...佢都算落力...唱到中段肯除埋眼鏡添...:p



張衛徤呢個劃十字動作...相信又係無人會唔記得! 但佢今天呢個造型...就的確係十分唔得囉....哈哈哈哈!



佢後來唱“真真~~假假~~”時…都真係唱到甩甩o地+上氣唔接下氣...原來, 疏於練習真係會令人跌watt90%...以前...佢都算幾跳得+唱得都算唔差的...:(


當然...反應最好係sammi出場時...亦都係我部相機最朦時…sorry, 真係黑心d都要講句, 全香港人都想見到安仔同佢女友可以…em…因為大家真係更想見到安仔同sammi o係埋一齊...佢o地先係天造地設o既一對...(真係so sorry)...:p



仲有另一位嘉賓吳國敬...佢依家貴為"星級評判"...但唱功反而跌到落去"偶像級"...佢唱“我說過要你快樂”時, 第一段走o左, 第二段甩o左…oops...sorry!



呢首係全晚揀得最好o既其中一首歌…我當年最鍾意睇o既"刑事偵緝檔案2"插曲“愛與情”…仲有呢個tbb版mv添...好過卡拉ok版! 如果當年plug呢首歌時唔係爆出歡樂滿東華"唔好咁x嘈"事件...相信呢首歌可以hit好多倍...好可惜呀, 娘炳!



真係要講番句: "車匙~如果你記得就返轉頭啦~~~"..."大勇~我真係咩都唔記得~~~"
仲有…凌祖絲: "你係殺人兇手~~~!!!"...噢~!