2-3(wed) 五味人生

哎…今年tbb無再出官方月曆, 簡直係本年度最錯o既決定…係新一年o既一大欠缺! 須知道每年年頭最期待就係tbb o既精美官方月曆o架嘛...tbb此舉實在係最愚不可及o既行為...佢縮皮都唔係縮呢d呀.? cut咩都唔應該cut官方月曆啦...佢知唔知呢樣o野多年來係幾咁受市民歡迎…錯晒…我好失望呀~~~~~

舊年個tvb2009官方月曆…已經成絕響…簡直慘絕人寰!



依家深夜12點幾重播“人間蒸發”…呢套我想睇呀, 事關佢2005年首播時去旅行miss o左一大半…依家終於有得睇番! 劇情都ok有趣, 同埋吳美珩同廖碧兒我都buy呀! 一睇番廖碧兒5年前後真係好大對比…都話我05年成日o係中環撞到佢, o個時佢真係好靚…但對上一次係09年再撞到佢, 已經唔同晒! 我以為真人先係咁大差喇, 依家再睇番佢當時上鏡個樣同依家上鏡個樣, 原來都係差好遠…哎…上天對女性實在太唔公平!

楊秀惠當時包包面反而好過依家喎…佢舊愛孫耀威都話佢打botox打歪o左塊面…依家睇“五味人生”又真係幾歪囉…點算呀? 有無得整番o架?!

其實“五味人生”都算幾好睇…米雪扮o靚妹都真係做得幾好…搞笑得o黎出奇地令人唔反感…你試o下叫其他同佢同年紀o既女藝人扮, 相信會嚇死! 佢又真係得天獨厚o既!

仲有, 我想話呢套戲梁烈唯都做得幾好…其實佢演技一向唔差, 可惜外型局限…都好難升上二線! 呢個世界又有幾多個王祖藍呀?!

原來套賀歲劇“情人眼裏高一D”係放o係“畢打自己人”時段播…我仲心諗咁多套新戲, 邊有咁多個time slot呢? 原來係處境劇時段! 嘩, 呢套12月中先開拍, 咁快就播喇…話說1月某晚經過香港站同中環站中間段路, 居然見到一大隊crew…



原來就係拍緊“情人眼裏高一D”…我又無估到原來王祖藍咁高囉...要maak開腳就小儀!!!



個工作人員仲係咁叫大家唔好企o係度睇, 話如果唔係會影埋入鏡俾d親戚朋友笑喎! 佢真係當我o地傻仔…我o地明明企o係部攝影機後面, 又點入鏡呢?! 不過佢咁用心良苦...我都會合作o既!



之前睇報紙話: “無綫最近趕拍賀歲劇《情人眼裏高一D》，搵咗出名矮嘅阮小儀同王祖藍搞笑，再拍黃宗澤（ Bosco）、徐子珊、苟芸慧。賀歲劇暫定喺年初二播，呢個劇嘅內容有影射呢個圈嘅成份。眾演員噚日喺將軍澳電視城現身，祖藍喺劇入面叫恭因銅，阮小儀叫荊止高，苟芸慧叫楊仙華，而徐子珊飾演嘅謝安腓會同 Bosco飾演嘅廑力信同陳山聰演嘅張濟春有感情線。”

…oh! “呢個劇嘅內容有影射呢個圈嘅成份”…係咪好似“娛樂插班生”或者“樂壇插班生”o個d?! o個d我鍾意睇喎…當年梅小惠扮sammi真係笑爆嘴…之前從來無諗過梅小惠可以扮到鄭秀文, 仲要係扮得咁似o個隻囉!!!