2009年12月19日星期六

12-19(sat) 鄭伊健友情歲月09演唱會

o係呢一刻…我腦海仲不停咁有d旋律o係度飄過…係咁“全城效應~全城唱~全城高溫作出呼應~~”, 跟住又“喜歡你我最清楚這感覺~~~”…係咁不停重覆…依家我部mp3都轉晒做鄭伊面d歌…同大家一齊"來忘掉錯對~來懷念過去~~~"!!!

初時話俾d朋友聽買o左鄭伊面演唱會飛...有一半朋友係“恥笑”同埋問我有無病 (hoho!), 但又有一半朋友係話佢o地都好想睇又或者已經買o左飛! 成件事都係好“你估我唔到”o個隻!

點知, turn out個結果更加係我估佢唔到…即係我預o左呢個演唱會會幾好睇, 事關鄭伊健d歌真係超經典, 首首都好耳熟能詳 (而佢唱功根本唔係討論範圍啦…不過坦白講, 真係好o左少少!), 真真正正係陪住我o地呢代成長! 但係我無估到個氣氛係會高漲到呢個程度囉…真係唔係親眼見到都唔會信, 即使親眼見到都覺得好難以置信...全場爆滿不特止, 氣氛仲係我睇過o既演唱會之中數一數二o既 (大家知道我幾咁“濫睇”演唱會o架啦…佢直頭可以係我更十年睇過o既演唱會之中最好睇的幾個…相信只係僅次於草蜢咋!)...由一開場已經無停過, 全場觀眾無論係咪fans都一齊和唱…可見佢d歌係幾咁入屋, 同埋佢真係曾經幾咁紅…我都差d唔記得o左!



星期六晚之後, 我發覺fb十個status update之中, 有五個係關於鄭伊健演唱會, 仲要個個都係話無諗過會咁好睇...我相信除o左係因為佢d歌真係好好聽之外, 最重要係因為佢真係好代表到我o地成長o既九十年代...一聽番佢d歌, 直頭好似帶我返番中學年代咁...一個演唱會好唔好睇除o左係取決於你有幾鍾意o個個歌手之外, 另一樣好重要o既係你有無共鳴…而鄭伊健d歌, 我相信我個年代的朋友, 就算唔係佢o既fans…都一定曉唱番一兩嘴! 同埋我o地呢d年紀o既朋友係最鍾意"懷念過去"o架嘛...所以呢個演唱會係fit in晒呢個purpose! 我真係好耐無睇過一個演唱會可以全場無論係唔係fans情緒都咁高漲囉, 仲要係每一首歌, 所有人都識和唱...真係睇到我O晒嘴!

而鄭伊面又的確係90年代的icon, 更仲要o既係佢真係好似"冰封"o左咁…無論樣貌, 歌藝, 事業 (sorry..:p)…成個感覺都好停留o係九十年代…一切就好似無發生過一樣! 佢一開口唱, 大家一邊拍和…我直頭以為自己返番九十年代! 雖然我從來都唔算係佢fans, 但佢90% o既歌我就算o翕唔出名都一定識跟住唱囉…實在太有共鳴啦! 聽番呢d咁耳熟能詳o既歌, 真係差d聽到想喊! 本來我諗住去湊o下熱鬧, 懷緬o下過去o者...買150蚊都覺得俾多o左佢…點知…下次我要去睇400囉…希望唔駛又等多11年啦!

嘩! 但係我都真係未試過o係山頂都可以咁瘋狂…個個都叫跟住唱同埋揮動吹氣棒棒…真係無諗過會群情洶湧成咁!!! 本來上個禮拜去加州紅唱k居然有人sell九折飛, 我心中仲咒罵點解我當日會咁on居仆去排隊買飛o架...但係, 依家我都覺得係值得o既!


(呢首直頭係“校歌”啦…你問我鄭伊健咁多首經典歌之中邊有係“經中經”…我相信大家一定一致認同係"一生愛你一個"~~~嘩! 佢一開口唱唱第一隻字, 大家都識繼續跟住唱埋落去! 其實當年我反而鍾意無咁hit o個首“愛難留”多d…"一生愛你一個"連續兩個星期做勁歌推介日日播我當時覺得有d悶…但依家聽番真係好正, 的確係冧歌之最! 學d人話齋…有邊個女仔聽呢隻歌會唔lum呀?! 而呢個演唱會萬人大合唱版本…又的確係令人好感動!)

佢d歌真係全部都係我o地年代o既集體回憶…"一生愛你一個", "愛難留", "動地驚天愛戀過", "感激我遇見","一個為你甘去蹈火海的人", “不要哭了”, "home alone", "我的歌", "你的我"...實在太多太多喇…你未必分得出邊首歌夾邊個歌名, 但一定識得跟住唱囉!

唔睇番wiki都差d唔記得原來佢都真係曾經攞過好多歌曲獎, 仲要係“IFPI唱片銷量五強歌手”...睇番我先醒起佢d碟又真係曾經好賣得...如果唔係99年“奪麵雙琪”事件…佢都唔會忽然間dup成咁! 所以話, 一個藝人形象真係好緊要!

wiki有一段係講咩“古惑仔1967年三寶: 陳小春、謝天華、鄭伊健的古惑仔演員於1967年出生,是古惑仔一支三人1967年出生,藝人從業員俗稱「1967年三寶」。”…原來有個咁o既稱號咩? 仲要係藝人從業員俗稱「1967年三寶」…真係聽都未聽過! 其實有好多藝人都係1967年出世呀~~!

仲有佢係商台搞o既第一屆“叱吒歌舞技星角力騷”冠軍…唔知仲有無人記得呢?! 其他參加者包括張智霖、馬浚偉、鄭嘉穎、王馨平、黎姿、江希文及陳雅倫…第二屆邊個攞冠軍我就唔記得喇…係咪梁漢文呢?!

仲有佢11年前第一次紅館個唱…叫類似“22098全城效應"演唱會, 而當然首“全城效應~全城唱~全城高溫作出呼應~~~”就係演唱會o既主題曲啦…當年都真係好hit o架! 佢首歌同個演唱會名真係改得超級好囉...到o左11年後o既今日, 我都仲記得佢係98年2月20日開過呢個演唱會...我記得當年報紙都係話佢呢個演唱會口碑十分唔錯o架…可惜當年要考試無睇到…好彩十一年後o既今日…終於有得睇番…!


(全城效應@09演唱會)

今次演唱會我覺得唯一美中不足係個rundown…佢其實係編排晒大部份最hit o既歌o係頭段…搞到後段有少少"後勁不繼"…其實唱兩首超hit歌, 又可以加插兩首無咁hit的歌呀 (雖則話無咁hit, 我相信都有好多人識唱!)…咁就唔駛未到11點就"扮"完…同埋最後唱relatively無咁hit的98風雲插曲"一對對"o黎完唔係太適合…我寧願佢如果真係無晒歌, 臨尾唱多次最經典o既"一生愛你一個"或者"友情歲月"會好d囉! 同埋其實佢點會無歌…仲有佢第一隻大碟o既"不要哭了"都無唱…呢首又係好有代表性喎…有咩可能唔唱呀? 太可惜喇! 仲有“如果天空要下雨”, 同鄭敬基+蔡濟文合唱o既"home alone" (呢首我都好鍾意啊!), 又或者“愛難留”都好呀!

仲有d嘉賓如陳小春/舒淇都可以出多一陣…又可者傾兩嘴…咁就唔駛未到11點就完有少少怪囉…畢竟大家有legitimate expectation嘛...我要向佢“提議”o下…等佢下年開part2可以搞得更完美...:p

都係o個句…"回憶總是美好的"...睇完呢個演唱會我又一次中o左鄭伊健舊歌毒...真係帶番我返美好的中學年代囉! 除o左佢首"校歌""一生愛你一個"之外...我最鍾意o既係"感激我遇見"…又係萬人大合唱, 好感動啊…真係好有一種 back to the 90’s o既感覺! yeah~~~!

16 Comments:

Blogger KLY said...

第一場有唱"不要哭了"架~~

11:42 下午  
Anonymous 匿名 said...

雖然芒姐咁讚賞, 但真係對唔住, 我對鄭伊健嘅印象/評分, 無論係佢外型(我真係一直都覺得佢好扁口扁面, 眼細而無神, 唔明點解會有人覺得佢靚仔/有型)、唱功、演技、以至為人, 都非常之差, 雖然我都係成長於九十年代, 但完全投入唔到你所講同形容的一切, 由始至終, 我都唔鍾意呢位人兄, 奪麵事件之前, 我已經對佢印象好差, 唔明點解碗麵爛成咁都仲有人爭。

11:46 下午  
Anonymous 利市餅 said...

hello,無意中入來睇到你的comments! 我同你睇同一場,都係睇$150,都係睇完勁開心! 完全out of expectation!!!佢唱功真係進步左喎,而且好多歌雖然叫唔出歌名,但首首都可以跟住唱大半!!!好興奮呀!!!!伊健依家好man,好有男人味添!!! yea~ ^_^

12:27 上午  
Anonymous 匿名 said...

攪到我好後悔無去睇添...去youtube 睇/聽返佢啲歌,真係勁有共嗚,佢唱真係好一般,但歌又真係好好聽,當然「好聽」未必客觀,可能係基於一種感覺、一種回憶,甚至係當年嘅一種習慣/風氣,但以家啲歌真係無呢種感覺。

1:25 上午  
Anonymous 匿名 said...

芒姐,
你講嘅我完全可以FEEL到.身為90s代嘅我,鄭伊健D歌同電影真係代表.
以前,每個年代中學生都有ICON歌曲明星,人到中年時可以回憶吓.的確,而家好似已經冇咗如此ICON.今日D中學生,十幾年後會唔會有咁嘅回憶情懷?
溫哥華匿名人

3:27 下午  
Anonymous 匿名 said...

芒姐,
我啱啱睇咗你個"一生愛你一個"YOUTUBE.
喊咗.

冇得去紅館嘅溫哥華匿名人

3:38 下午  
Anonymous Ting said...

今日D中學生,十幾年後會唔會有咁嘅回憶情懷?

有嘅, 每一代人都有屬於自己年代嘅icon, 我地今日可以睇鄭伊健睇得咁感動, 只係因為佢屬於我地嘅年代姐, 你試下問下大或細我地一截嘅人, 問佢地聽鄭伊健有冇feel, 我相信答案係否定的居多...

現在的小弟弟小妹妹, 他日長大以後, 自會懷緬屬於佢地一代的icon, 一切都係一個循環...

10:58 下午  
Blogger 芒姐 said...

Ting,

一百個認同!

11:22 上午  
Blogger 芒姐 said...

hohoho_KLY,

第一場居然有唱"不要哭了"?! 大過份啦...點解第二場唔唱?! 我睇有線娛樂新聞播我睇o個場片段, 寫佢唱緊歌"不要哭了", 但聽真d係"動地驚天愛戀過"...有線真係亂咁o黎!

11:23 上午  
Blogger 芒姐 said...

其實一個演唱會好唔好睇, 從來都係好主觀o既事...最主要係你有無共鳴, 有無o個種感覺...而鄭伊健個人本身, 我一般啦, 不過我成日都講, 一個人人綠好, 一定唔差得去邊 (雖然佢處理"奪麵雙琪"事件的優柔寡斷我就真係不敢苟同...之前都講過, 客觀地講, o係呢件事上, 佢要負o既責任一定大過梁詠琪, 但係好勝gigi因為一向人緣差, 佢做咩d人都會插佢, 笑一笑都會被睇成"勝利o既笑容"...而我個人亦都真係好唔buy佢...從來感覺呢d o野都係好主觀啦!)...但鄭伊健d歌, 對成長於90年代的我們, 真係經典到唔經典...一聽到個前奏已經回憶返埋o黎...係一種集體回憶...:p

11:28 上午  
Blogger 芒姐 said...

溫哥華匿名人,

置身現場係真係好感動...你part 2 可以考慮返o黎睇o下...hoho!

11:29 上午  
Blogger 芒姐 said...

利市餅,

真係所有朋友睇完都有同一個反應...儘管大部份都唔係佢fans!

11:30 上午  
Anonymous christy said...

之前我一話想買飛勁多FRIEND都叫我唔好哈哈哈而家出到黎講到好似好好睇我而家好有走左寶既感覺呀:P

BTW,我好有興趣想知佢唱一對對之前,佢係真完定假完架?D人話覺得果個encore係plan左架喎。

P.S. : 芒姐有冇睇新聞呀?AMIGO打女友呀~

3:56 下午  
Anonymous C said...

我睇第一場呀
買250諗住入去笑下架咋~
掙扎左好耐係咪真係買飛
因為都估到會好感動
結果真係超超超超正喎!!!

100% agree 唱功唔係討論範圍!!!
佢其實未唱到一半已經開始聲沙
同埋成日唔夠氣
高音奉旨走音 (我當時好擔心佢第二場點算)
不過是旦啦!!!
首首都萬人大合唱,起晒雞皮呀!!!

"撒哈拉"個段有d 騎呢
last "我的歌"餘韻不盡~ d歌詞好似講緊佢自己咁,因為佢d 聲線真係耗損晒 hahaha!!!!
final encore "一對對"我反而唔識唱..=,=

係囉,我都想"友情歲月"唱多次, 應該搵埋小春一齊唱嘛...舒淇mic都冇拎過就入返去,徙晒!

佢自己成晚都真係勁感動,冇乜表情好似嚇親咁,最尾喊得好勁,我諗佢冇預計過原來大家冇忘記佢...

5:56 下午  
Blogger 芒姐 said...

christy,

當然有follow啦...amigo單o野都算精彩...不過佢咁樣一腳踏幾船...黑心d講句, 都預o左有今日啦!

你直頭係走寶啦...太可惜!

我個人認為係假完囉...似plan o左!

7:22 下午  
Blogger 芒姐 said...

C,

莫講話佢, 我都無估到會咁"感動"...真係回憶返埋o黎...你話d人好鍾意鄭伊健咩...我諗九成人都唔係, 但佢(d歌)真係好可以帶我o地回到過去...個感覺係超正...我直頭某程度上覺得仲好睇過我深愛的sammi (sorry, 我都唔想承認...但感覺呢d o野真係無得講)...可能真係集體回憶啦...:)

7:24 下午  

發佈留言

<< Home