2006年8月5日星期六

8-5(sat) 姑丈向下墮

(又係好長好長o既一篇日記, 費事cut開幾篇喇…一氣呵成, 請自行找廁所位!)

唔知點解, 要為呢篇日記諗個題目時, 腦海不停咁湧現“gala gala happy”呢隻歌 (其實隻歌個真正o既名好似係“老人院”?)…尤其係呢句: “姑…丈…向下墮”…

其實我心底有個疑問十多年…究竟呢句o野係點解?! 相信唔會係是但o翕o架, 但我一路都無去考究…有無人可以話我聽…究竟“姑丈”係邊個/指咩o野, 同埋點解會“向下墮”呢?!

另一個忽然湧起o既疑問係, 究竟有“卡拉屋企”先, 定係有呢隻歌先呢?! 我唔記得o左…但斷估應該係佢o地抄番“卡拉屋企”第一句歌詞…哈哈…聽番軟硬o既舊歌, 除o左令人勾起好多童年回憶, 亦令我諗起“卡拉屋企”… “喂! 夠鐘喇, 睇電視, 睇o下今集講乜先, 講乜先!…香港地, 有幾多專制禁忌, 比心機, 要搵錢應記有限期…” “香港新綽頭…hey…搵錢搵自由, 個個拼命埋數, 係真唔係真…” 唱夠喇…真係好令人懷念!



好! 係時候講番正題, 今日要講o既, 當然係前一篇已預告過o既“軟硬天師LONG TIME NO SEE演唱會”啦…依家十場完晒, 大家可以暢所欲言, 講番晒演唱會o既內容, 分享o下你睇o個日有咩特別, 或者睇完有咩感想…

我睇星期五尾二o個場, 嘉賓一如早前所講係李克勤, 呢樣我ok o架喎, 事關大家一向都知我幾 buy克勤, 同埋起碼克勤都係屬於軟硬年代, 有得閒有上下“老人院”…當然, 四大天王o係“軟硬歷史”內就更有代表性啦! 唔係話陳eason或者楊千fa唔好, 只係佢o地真的不屬於軟硬年代, 對於呢個主力係sell集體回憶o既演唱會…係唔啦間o左d囉! 根本o係聽軟硬電台節目o既年代, 就搵唔到有關佢o地o既回憶!

聽聞老黎o個日幾好笑, 劉華更加唔洗講, 草蜢我都幾想睇, 克勤都alright o既…佢做得最o岩就係揀o左“紅日”o黎唱…雖然呢隻歌真係聽到爛晒, 但係又的確係最配合o個個年代! 軟硬不停拿克勤“結婚”o黎講, 見到佢直頭有d唔高興, 再加埋keep住笑佢老友車震賤男o既“車震事件”, 克勤好似有少少不悅咁寸番佢o地…克勤EQ真係仲差d, 應該向華仔學習o下! 而阿葛扮盧淑儀講卸任心聲o個part, 我覺得幾乎係全晚最好笑o既位!



坦白講, 可能因為期望過高, 我覺得並無我預期咁好睇! 可能真係因為d人講到太好睇, 將佢o地太“神化”, 令到希望愈大, 失望愈大! 唔係話唔好睇, 但就真係無想像中咁好睇囉! 其實我已經特登唔睇所有朋友o係日記寫o既“軟硬演唱會”觀後感…而報紙/電視報導都盡量唔睇, 但係無可避免都o係深夜“娛樂直播”睇到少少片段, 亦都o係頭o個幾日唔覺意睇o左d報紙報導, 寫o左好多佢o地d對白出o黎, 失去o左d驚喜!

但原來唔止我一個人咁覺得, 我以為係我自己o既問題, 點知問o左一d唔同年紀o既朋友, 有好幾個都係咁講…又或者如果係die hard fan屎, 會唔係咁諗o既…畢竟一個演唱會好唔好睇, 最在乎都係主觀情感!

其實我覺得如果係佢o地超級fan屎, 對於個演唱會o既內容都會有少少失望o架…因為o黎得呢個演唱會, 其實主力都係懷舊, 睇佢o地做番以前o既o野去集體懷緬過去…依家唔係無, 但係唔夠囉!

我明白佢o地當然要打新歌, 但係絕對無唱舊歌咁有共鳴…同埋o個隻點題歌曲“long time no see”, 真係唔夠d舊歌殺…寧願佢唱五次“gala gala happy”, 大家都仍然興奮 (尤其因為每個禮拜六晚老人院之前都會播, 又係一個情意結…咁當年來, 仍然成日同人講: “孖公仔最核突!!!”)…君不見佢o地一開始唱“點解要大家笠”+“廣播道fans殺人事件”o個part, 所有人企晒起身有幾咁興奮!

想當年f.2 o既我以有限o既零用錢去買o左隻“廣播道fans殺人事件”盒帶o係屋企日日勁播, 電台又會不停咁聽到, 所以呢幾隻歌全部都可以隻字不漏咁唱出o黎…不過舊年同d o靚仔 (其實又唔係好o靚o既, 廿歲出頭啦) summer students去唱k, 佢o地居然都識呢幾隻歌, 仲又可以隻字不漏咁唱晒出o黎…反而自命口齒伶俐o既我, 依家都會甩咀...果然係影響力無遠忽界!


(當年好天真地以為係佢o地真身o黎, 心諗: “嘩! 原來佢兩個咁fit!” 當然, 無幾耐我發就發現: “無可能o架, 阿葛明明好肥o架?!”)

其實佢o地仲有好多舊歌未唱…“軟硬幼稚園”啦, “非常口”啦, “請勿客氣”啦, “愛式”啦…咩都好啦…! 總之係舊o野大家都開心!

我覺得應該搵埋我o地最支持o既蔡興麟/何婉盈/梁雁玲/黎明詩, 仲有劉鍚明同葉玉卿出o黎…畢竟佢o地真係o係91,92年紅過兩o下, 亦都係令人懷念o既icon!

個演唱會雖然都播o左一段整古電話, 什麼幫個女買“卜卜機”…但坦白講, 真係唔多好笑…同以前o個d差好遠…但係我前一行o個兩位應該係三十出頭o既哥仔同姐仔, 仍然唔理三七廿一地拍案叫絕…無輪佢o地講d好笑唔好笑o既gag, 佢o地都有好誇o既反應…我當然好明白佢o地呢個age group係最最最標準o既軟硬迷, 但都唔係咩都叫一餐o架?! 恕我個人冷淡, 但我真係覺得佢o地太over!

其實我覺得如果佢o地播番d舊錄音, 大家會更好反應! 我最深刻o個段係佢o地打去book蒙古餐廳, 又話要入個蒙古包度食餐, 又話要book個蒙古人騎住隻馬去即場表演…好無聊, 但當時覺得好好笑! 雖然後來上網聽番已經覺得無咁好笑, 但係最珍貴o既, 都係在於o個份回憶o者! 不過到後期o個d整古電話, 其實真係唔多好笑, 因為d人個個都聽得出係佢o地, 我諗有好多直頭係做妹o架o乍…到再後期仲要唔係軟硬自己錄添…所以其實好多o野, 真係應該見好就收! 而今次個整古電話環節, 其實最感動o個part, 係聽到個主題音樂囉…


(又係循例睇完演唱會要拿d紀念品同埋我o既collections [係得一餅盒帶咁大把!]晒o下冷!)

雖然佢o地都有花一d時間去講o下軟硬由相識至今o既歷史, 由白英奇, 去到三spirit, 再到商台…但係我都覺得唔夠囉! 買飛入場o既大部份都係d懷舊fans, 應該再懷多d舊…哈哈!

佢o地一唱番當年o既商業二台台歌, 再講番阿葛早年o既馬路天使福音 (god/葛[?] of the road, 亦令人諗起後期同佢一齊做o既馬蹄露) …佢d獨有用語…就彷彿帶番我o地返去十幾年前…所有當年o既情景都湧晒出o黎…真係好令人懷念! 其實大家都係藉呢個演唱會, 去懷緬過去o者!

仲有佢o地合唱阿jan同周美茵o個隻“衹因喜歡你”都唔錯呀…可惜唱得半隻!

而最懷念o既, 當然係佢o地一唱一和o既“棟篤笑”啦, 令人諗起九十年代每年最期待o係叱吒頒獎禮睇到佢o地o個part“棟篤笑” (之後o個d杜文澤, 張達明, 吳君如, 谷德昭, 森美, 小儀etc…都無人可以媲美軟硬!)…不過容我坦白, 其實又真係無o左以前o個隻火花…好明顯係度好晒照稿講, 無咩交流, 仲要客客氣氣, 驚踩親對方,…以前雖然都係有晒稿, 但真係可以做到好即場o既感覺, 再加埋d爆肚, 你一句, 我一句, o個種化學作用係無其他組合可以媲美o既…但係依家, 好明顯佢兩個真係好生疏, 你話佢地無不和, 我打死都唔信! 連佢o地自己講番十幾年來o既心路歷程, 都無否認過呢件事! 對於fans o黎講, 其實係幾sad o架! 雖然話唔理佢o地o係台下點, 台上睇到一場good show就ok, 但如果兩個人欠缺默契, 又真係差咁d…可能聽番佢o地以前一齊主持o既節目, 真係仲會開心d!

我相信佢o地曾經真係好friend過, 經歷過“孖公仔最核突”o既日子, 但畢竟隨住年月流逝, 大家o既不同經歷, 每個人都會變…同埋日對夜對, 其實又真係會悶o既; 再加上會不停咁發掘到對方o既缺點, 自然會開始不滿對方…佢o地搞到成陌路, 但係今次最終又要為錢復合 (真係唔好話我聽唔係囉!)…其實睇到令人有d難過! 最慘係仲要夾硬sell兄弟情, 唱埋d手足情深歌…如果真係friend, 阿jan舊年唱“三字頭”, 都唔會唔搵阿葛反而整o左一jar無啦間o既鄭中基, 蘇永康, 古巨基出o黎 (有啦間o既其實…同唱片公司嘛!)…最真o個part反而係講佢o地由“最佳拍檔”變為“最佳損友”…好到肉…但令人心o翕!

不過算啦, 佢o地都係幫大家去重拾童年回憶o者, 又可以搵番成千萬, 夠d仔女入大學…為人為己, 何樂而不為?!



至於d歌舞, 我又真係覺得唔差喎…歌就差d, 但係舞…真係幾得! 我覺得就算以職業水準o黎講, 都真係唔錯囉! 唔明點解佢o地要講到自己跳舞咁差…阿jan當然唔洗講, even肥嘟嘟o既阿葛, 都跳得好有節奏感…o個d八十代舞步, 真係好掂! 仲有“廣播道fans殺人事件”o個段舞, 都好正呀! 反而以前佢o地年青時唱呢d歌, 都無咁認真咁跳舞, 亦都從未聽過佢地唱live…雖然阿葛係有d甩咀, 但都ok呀! 個舞台設計都好有格, 不過略嫌太hard sell囉!

不過點講都好, 對於我o地呢個年紀o既朋友o黎講, 無睇到軟硬演唱會, 點都係一個損失! 從未試過有一個演唱會係幾乎問每一個friend, 每一個都有去睇…無論係咩年紀, 咩性別, 咩行業…

芒姐慣例, 睇完一個演唱會, 點都要打個分…今次手鬆d, 加埋“情意結”分…俾八十啦!

亦都歡迎大家分享o下你睇完呢個“軟硬天師long time no see”演唱會o既觀後感!