2008年11月24日星期一

11-24(mon) “珠寶”

呢兩個禮拜“珠光寶氣”d劇情去得好快…其實成套劇整體都去得好快, 係比我想像中快好多, 依家廿幾集已經講o左咁多o野…邵美琪已經同o左林保怡一齊, 黎姿又已經同完關禮傑再同陳豪曖昧緊, 連蔡少芬都已經同o左岳華一齊…未免係快…咁樣點撐到八十集? 定係仲有好多人物未出又仲有好多twist?!

不過其實我一路都係飛o黎睇…因為有好多part都唔係太吸引到我! 三姊妹之中邵美琪/林保怡/黃德斌o個段已經係最吸引…o個日同朋友discuss開, 原來大家都係咁覺得! “Con氏藤”o個段真係攞我條命 (尤其日日影住佢去ifc間mabelle返工...救命! 雖然佢係贊助個劇, 但唔覺得有邊個睇完會想去mabelle買番d o野)…仲有岳華同蔡少芬…我又真係唔太buy!

其實我一路又唔覺得林保怡係鍾意邵美琪喎, 佢頂多個賞識佢o既工作能力, 欣賞佢夠寸, 覺得呢個女子幾有挑戰性…但一下子就講佢鍾意o左佢, 好似跳得太快…呢part其實可以寫多d呀! 同埋邵美琪又係無啦啦鍾意o左林保怡, 我以為佢係鍾意黃德斌添…點知原來係黃德斌暗戀佢…咁但係o個次邵美琪飲醉酒唔係反而黃德斌拒絕佢咩? 定係我fast forward得太多睇得唔夠仔細…? 總覺得呢段可以寫多d…!

同埋呢套劇個去廣告位居然係剪d定格o既相…好似求其o左d!

原來依家朝早六點又重播“我愛玫瑰園”…真係第n次重播! 不過我都曾經幾鍾意睇, 亦都曾經幾鍾意張兆輝同袁詠儀…雖然靚靚o個期d戲真係好屎…不過佢o個時又真係幾靚喎! 同埋唔知點解成日都覺得張兆輝同劇中做佢爺爺o既張英才好似樣…成個style都好似, 又係後生時已經肥肥o地好有福氣咁…所以成日睇粵語片見到張英才都會諗起張兆輝…哈哈!

仲有原來深夜又重播06年先首播o既“女人唔易做” …雖然真係好好睇, 但無幾耐之前先睇過, 我都係忍住唔睇喇…因為真係無時間!

早幾日睇雜誌, 有一篇係麥玲玲訪問楊思琦…講番佢o係拍“無名天使3D”時, 俾佘詩曼同郭羨妮兩位“阿姐”夾埋玩針對, 杯葛佢! 即使佢主動同佢o地打招呼, 人o地都當佢透明! 真係好慘…邊有人咁無禮貌o架 (雖然出o黎做o野之後, 真係發現原來幾無家教o既人都有…! 仲要係d手段係你估佢唔到o個隻!)?! 雖然我係好唔buy楊思琦的蠢, 但我更唔buy d人連基本禮貌都無. 恃住自己紅少少就睇唔起人, 同埋恃住人o地好hup就踩多兩腳…其實阿麥玲玲話佢之前聽到o既唔止呢d…但阿思琦姐又點敢講咁多呀…畢竟o個兩位阿姐都, o下…! 佢依家仲要對住兩位阿姐同佢o地扮friend但人o地繼續當佢透明…都幾慘o下!