2005年10月22日星期六

10-22(sat) 草蜢-我們的演唱會(下)

(續前篇)

話說上回仲講緊草蜢“我們的演唱會”有幾咁好睇…佢o地真係好鬼死有活力, 係literally跳得起, 而唔係好似依家大部分歌手咁只係會fing手fing腳! 之前睇太陽報見肥媽評各歌手o係“翡翠歌星賀台慶”o既表現, 評得幾中肯, 幾o岩聽…除o左同大家一樣狠評盧巧音鑊鑊都勁走音之外, 仲有話何韻詩做足本份記得每一粒歌詞, 同埋yumiko不停壓低把聲扮性感, 仲有好勝gigi唱卡門唱到有聲無氣最好去練o下氣先, 同埋無線四男藝員之中陳豪把聲最響, 但走晒每一粒音 (哈哈! 雖然我都幾ok陳豪, 但無可否認佢唱歌真係愈見難聽!), 最後亦都有講到草蜢同古巨基夾o個part勁精彩, 話如果d新一派歌手仍然係咁唔長進, 草蜢玩多廿年都仲得! (好可惜我miss o左久違了o既“翡翠歌星賀台慶”…原來仲有無線4虎玩“大石碎心口”添…唔知有無機會可以睇番呢?)

返到屋企即刻摷番所有有草蜢o既舊帶出o黎睇, 真係好精彩! 最精彩係91年o既“忘我大匯演”…居然係由草蜢作開場表演, 真係唔講都唔記得佢o地曾經咁威過! 好明顯佢o地當年真係好紅, 如果唔係都唔可以o係一眾天王巨星雲集o既節目度打頭炮! 不過佢o地o個時反而太瘦, 依家大隻好多型好多…同埋依家老o左反而仲跳得仲好o左! 更加唔睇番唔知o既係, 其中一個同佢o地伴舞o既係….謝天華! 點知謝天華後來o係tvb撈得仲掂過佢o地! 另外一個應該係依家已經晉升到做tvb大show排舞師o既ringo!


Image hosted by Photobucket.com


又睇o左幾年o既“叱吒”…唔睇都唔記得原來依家做“大飲茶”主持o既李中希 (佢當年有首歌係不停咁“拉得緊…拉得很狠”…我o地成日跟住唱o架!), 96年係同陳奕迅+鄭中基一齊得到男新人獎…當年o既新人王係鄭中基, 反而依家陳奕迅仲紅過佢好多! 唔知呀中希依家成日要訪問同期o既中基, eason, 千嬅, gigi等會唔會有d心o翕呢?! 仲有93年o既“叱吒”, 見到草蜢, 劉小慧, 湯寶如, 仲有當年選新人o既鄭嘉穎, 馬浚偉同黎姿 (依家全部轉戰電視圈)…真係好懷念當時o既樂壇! 仲有劉小慧確係幾靚…難怪當年蘇志威會暗戀佢, 仲曾經俾人踢爆佢收埋劉小慧o既閃卡!

我去睇o個日仲咁o岩係佢o地結婚週年紀念, 當阿細對住劉小慧唱“永遠愛著你”時, 個鏡頭影住佢同佢個女呀蘇君蕎, 佢依家就係師奶o左d, 不過都仲幾靚o既…但佢個女就全程“la”埋口面, 好似死老豆咁款 (sorry! 但我真係咁覺得…不過作為一個小朋友, 佢根本都唔知咩事, 如果無啦啦影住佢跟住佢識對住個鏡頭揮手甜笑, 咁仲可怕…我寧願佢咁好過d作狀o既小朋友! 但上次睇報紙見佢第一日去劉小慧o既母校maryknoll返小一, 佢都識對住個鏡頭甜笑…可能入到mcs確係比老豆開到演唱會高興o既!)…仲要佢兩個都著到成身黑色…更似! 我個friend就話見到佢o地呢身打扮, 以為自己去o左“毋忘六四”晚會!

但我好失望劉小慧無上台唱番隻歌…最好唱佢o既成名作“望星星”啦, 橫掂都係合唱歌! 或者唱番隻 “熱力節拍woobomba”都好呀, 呢隻歌當年都好hit o架 (雖然我唔多覺好聽)…係繼“火熱動感la la la”後第二首marlboro red hot hits…我仲記得o個年暑假o岩o岩出完國番o黎, 日日開電視都睇到呢隻歌o既mv!

橫掂依家關淑怡又復出, 湯寶如又仲o係個娛樂圈度打滾緊…咁佢地可以原班人馬o係12年後再唱多次呢隻歌呀! 反正劉小慧o係個mv來來去去都係拿住個籃球唔洗點跳o既…唔會太難為佢o既!

今次演唱會發現草蜢之中最受歡迎o既反而係蘇志威, 而唔係一向最紅o既蔡一傑! 當年永遠都係蔡一傑企中間, 永遠都係焦點所在…事關佢最靚仔, 又的確係佢最識搶鏡o既! 無可否認佢係草蜢之中最靚仔o既, 但我好怕佢有時太自恃靚仔有型…尤其後期草蜢“名存實亡”o既年代佢真係變得超作狀, 每一次去睇梅姐演唱會, 佢都會施展“渾身解數”去突出自己搏表現…實在太刻意喇! o係自己o既演唱會搶d係ok o既, 但作為客串o既嘉賓, 就over o左d囉! 同埋佢呢期個形象太“基”喇…基唔係問題, 但唔好基得太出面, 基得太露骨囉! 所以今次見佢終於有自已o既演唱會, 我都戥佢好開心…起碼唔洗成日o係人o地演唱會搏搶鏡咁慘!

其實三隻草蜢仔之中, 我都係較buy阿細…起碼佢沉實d (雖然當年佢o係郭晉安最唔掂o既時期搶走劉小慧, 大家都唔多likey佢…但好快大家又唔記得o左, 因為佢o地當年都唔多紅, 絕對無“奪面雙琪”事件咁震撼…不過呢d都係整定o既, 依家佢o地各個parties都幾好…安仔又鹹魚翻生到, 大家高興啦)! 雖然近年阿細要o係tvb由低做起, 又做主持 (好明顯唔係佢強項但都要照撐), 又拍劇…反而佢最精o既唱歌跳舞就無得做…但佢都安守本份做落去養妻活兒…都抵讚o既!

今次呢個果然係“我們的演唱會”, 好多舊片段, 舊舞蹈…睇番d片段, 原來佢o地當年真係好有日本o個d“少年隊”feel…不過八十年代香港流行“日本熱”…佢o地照抄又無可厚非o既! 仲有, 睇番佢o地細個d相, 原來阿細都大過蔡一傑一大截, 好似個大哥哥咁…依家又睇唔出喎! 同埋雖然今次無嘉賓, 但又ok喎, 一d都唔覺得悶…可見呢個演唱會係幾咁精彩! 相就無影喇, 因為呢個係我一向o既practice…自從95年有一次去睇張學友演唱會, 淨係掛住影相忽略o左個演唱會本身…自此之後我就決定以後去睇演唱會都唔會影相, 否則會distract o左自己…要睇靚相上網睇報紙或官方網頁仲清楚啦!

我覺得“我們的演唱會”只做三場實在太少喇…最尾o個場加埋林海峰o既“棟篤笑”反而有d九唔搭八…唱歌還唱歌, 棟篤笑還棟篤笑嘛! 兩樣o野本來分別都好好睇, 但係擺埋一齊又未必喎…不過純屬個人見解, 因為我都無睇過呢個crossover! 我都好想睇林狗o既棟篤笑…不過買唔到飛! o岩o岩睇“娛樂直播”訪問彭羚…生完bb之後反而靚o左好多喎!