2006年3月12日星期日

3-12(sun) 鄭嘉穎

從來都無鍾意過鄭嘉穎, 唔知點解呢期睇"天幕下的戀人", 愈睇愈覺得佢幾有型又幾靚仔喎 (其實objectively, 佢以前好似仲好樣d添, 但係subjectively, 以前又無咁樣覺得過...好複雜!), 即刻走去唱k都再唱多次呢半年來成日唱o既"三角兩面", 再唱番兩首佢十年前o既代表作"一千個願意"同"分分鐘記起"! 仲想摷埋d舊頒獎禮出o黎睇添!(題外話: 當然有食住條水唱o下"難兄難弟"主題曲...個mv居然係"難兄難弟"電影片段! 當年我咁追捧呢套劇, 梗係有去捧呢套電視版o既場...一個字: "爛"! 戲爛, 演員造型爛 [尤其寶珠個假髮同電視版差好遠], 所有o野都爛! 連演員都頗爛...換走o左最唔似o既芳芳, 但係舒淇都唔見得比宣萱扮得似, 反而98版"神探李奇"o既吳綺莉仲好d! 再加埋阿叻扮o既唔記得邊個, 同埋行姐扮o既家燕姐...真係唔多掂! 無o左黃紀瑩, o黎個同樣懶音王陳彥珩...一樣咁可怕!)

不過鄭嘉穎又真係咁多年都無大紅過, 即使當年橫掃晒各台o既新人獎, 但都唔見得太紅, 兩o下仲唔見埋要過台灣發展! 睇篇訪問佢個螢幕最佳拍檔niki都話, 鄭嘉穎其實又靚仔又型又cool, 但係就差o左d運氣…不過我仍然覺得睇佢d訪問係有d悶o既…可能悶就係佢最大o既缺點! 同埋佢同依家同期被力捧o既小生年齡差成十載, 係有d格格不入囉, 佢應該屬於上一代!

Image hosting by Photobucket

佢同niki呢對螢幕情侶又的確係幾ok喎, 睇得人幾順眼! D人唔鍾意niki, 我又覺得佢幾爽朗幾funny (同埋唱歌無我想像中咁差!)…從幾次訪問中, 我都覺得佢講o野幾有趣, 尤其上年台慶o個滴淚同埋o個句: “我無諗過o黎?獎, 我以為係o黎抽獎咋喎!” 笑死我! (仲要o岩o岩發現原來佢都係我o地o既“79同盟” [哈哈…無錯, 從來都唔會掩飾年齡…人人都會老o架啦, 除非你死o左o架o者…真係太呀Q!] 唔知佢換o左證未呢?! 仲要發現原來佢同楊怡係同年同月同日生, 都係79年8月30日, 而呢兩個花旦我都幾buy…等我去搵o下有無其他認識o既人係呢一日出世, 可能會幾o岩key! 又多一個“79人”, 歌壇就旺80[其實應該係早年o既英皇o者!], 電視居然旺79…林峰, 吳唱k, 廖碧兒, 胡杏兒, 楊怡, 依家仲有個周麗淇…力捧o個批大部份都係呢一年出世…真係 “老餅”都有出頭天!)

搞到我有d想睇番佢o地上次合作o個套“翡翠戀曲”, 因為當時覺得又唔吸引題材又勁怪雞 (主要係唔知套戲想點?), 所以無咩點睇到…後尾睇番原來有我兩大“偶像”邵美琪同葉璇做…miss左真係呻笨! 原來呢套戲又係王心慰做監製…真係每個監製都有佢特定o既班底! 佢次次開戲都幾乎係搵番o個堆人…“翡翠戀曲”有鄭嘉穎, niki, 夏雨等…仲要原來“yummy yummy”又係佢做監製, 跟住又係有鄭嘉穎, 唐詩詠, 許紹雄等…佢真係好鍾意用鄭嘉穎!

記得當年有幾集“開心華之里”, 係搵鄭嘉穎呢位新進靚仔歌手介入朱健鈞同麥家琪 (個"家"字一定要特別大聲+拖長o黎讀)o既戀情, 我o個時仲覺得…有無搞錯? 梗係揀朱健鈞啦…諗番覺得自己超有taste!

Image hosting by Photobucket
(鄭嘉穎+王馨平@94年一本隨香港電視附送o既時裝書)

“天幕下”個大家姐何綺雲的確係做得幾好 (好搞笑...前幾日去拿身份證聽到counter叫何綺雲小姐, 我即刻望過去睇o下係咪佢...不過佢應該仲細過我o地!),, 新人o黎講就更加無得頂...d克人憎咀臉同埋教佢個妹去兇佢男友o個d樣簡直令人拍案叫絕! 就算唔係佢做主線d戲都交足貨…究竟呢位姐仔o係邊度走出o黎o既呢? 但係個細妹阿“勁嫂”唐詩詠就真係愈做愈唔掂, 尤其同阿水配o個d戲好難睇!

姚嘉妮都做得幾好幾自然…佢同何綺雲兩個“妙手孖寶”確係做得唔錯! 其實姚嘉妮幾年前做o個套“公私戀事多” (唔exactly記得套劇叫咩名, 只係知同粗口無咩分別!)….記得有一幕佢扮竹升, 同劉永健o係街邊見到雞旦仔, 跟住扮唔知係咩o黎咁話: “oh, 呢d marbles咁o既物體好cute呀, 係咩o黎o架?!” o個段真係笑死我, 第二日返到學校大家仲激烈討論o左一輪添…笑o左好耐! 雖然呢套戲無咩人記得, 但呢段真係好深刻, 亦令我對佢刮目相看! (尤其係發現佢係少有英文talk得o既亞姐!)

同埋其實如果我係沈朗, 我都可能會揀佢都唔揀阿詩…起碼醒d又無咁煩! 哈!

唔覺唔覺下個禮拜又大結局, 跟住o個套爛cast+爛題材o既咩“馬戲團”…又可以唔洗睇喇!