2009年4月1日星期三

4-1(wed) 風繼續吹…不忍遠離…

又到四月一日, 又係愚人節, 又係哥哥o既死忌…咁就六年…時間過得真係好快!

雖然舊年post過, 但今年忍唔住都要post多次呢個我覺得係咁多年來最精彩+最目不暇給版本的“MONICA”...除o左哥哥, 仲要特別留意台下歌手+觀眾的反應, 背後的"啦啦隊姐姐"砌出的"M-O-N-I-C-A"字樣, 同埋"手語人"王維德個家姐王敏明負責跳舞...



仲有呢首我又係勁鍾意…風繼續吹…不忍遠離…



每年四月一日的回顧:

2008:
繼續寵愛

2007:
風繼續吹

2006:
誰能代替你地位

2005:
愚人節

2004:
4月1日

2003:
陪伴我們那代香港人成長的“哥哥”

SALUTE TO A LEGEND (1)

SALUTE TO A LEGEND (2)

SALUTE TO A LEGEND (3)

SALUTE TO A LEGEND (4)

SALUTE TO A LEGEND (5)

我…又走o左去行G.O.D., 我發覺原來我真係幾enjoy行o個度, 無無聊聊等人又可以去行o下…可能因為個style幾o岩我, 佢播d懷舊歌又幾o岩我聽...行得我幾舒服!

嘩, 前幾日去行, 終於見到我最鍾意o既"IQ成熟時"tee有得賣喇...好靚呢! 不過如果唔計我本身buy邊套劇呢個元素, 其實我覺得隔離紅色o個件"鹹魚豆腐白菜仔"係咁多件tee之中最靚最sharp醒o既...:P



其實黃色o個件"麗的呼聲"都幾sharp...反而佢隔離我都好鍾意o既"變色龍"就真係唔夠出喇...黑底閃字…但閃得o黎都係好黑…就咁睇分分鐘睇唔到d字…



仲有唔少朋友認為最靚o既"繩之於法"...嘩, 大家果然有taste屎…佢仲要比其他o個d貴d添…好似要三百八…!!!



其實我有試穿過…白色的"IQ成熟時"著上身都幾出...雖然我一向最buy黑色...但tee上會變色o既"變色龍"字樣變到幾乎睇唔到...咁唔得o架嘛…!

但個結果係, 我仍然猶豫不決仲未買…其一係因為佢呢d tee係無分男女裝o既, 所以xs都有d大...咁我仲諗緊好唔好再買大d當oversize咁著...所以我係咁拖o下先…等等o下佢可能又減價啦嘛...事關我依然覺得佢唔太抵…雖然話千金難買心頭好, 但我見佢依家個"銷情"都好一般, 應該有機會等到減價o卦?! 況且我呢d怕凍人都未駛著短袖tee住…同埋我好似見佢仲“jum”住有新款出…!

哎…我仍心大心細唔知買邊件好…件件都咁有型…oh!



以上的一篇“文章”, 係寫於兩個禮拜前…呢一刻, 件”IQ成熟時”tee已經坐o左o係我屋企…事關前兩日又去行o下G.O.D….居然見佢d恤上晒架, 每樣得一件…跟住我想要o既加細碼, 居然仲要得番陳列o個件, 問埋其他分店都無 (雖然佢可能只係入o左三件)…有無咁好賣呀? 唔通我真係低估o左市面上電視精o既威力…真係失禮晒!!!!!!

o係嚴重“淆底”o既情況之下, 我當然連陳列o個件都唔放過, 免得蘇州過後真係無艇搭…到時先怨”愛得太遲”, 就後悔莫及喇!

Yeah…現在我已擁有呢件靚到痺的”IQ成熟時”tee…第時你o係街上面見到有人著住…或者…o個個就係我! 你可以考慮同我相認一個!

經典片段重溫...之唔係襯番我件恤之嘛…


(IQ成熟時opening)