4-1(sat) 誰能代替你地位

三周年…今日係哥哥逝世三周年!

正如各位leslie迷所講, 佢o既離去方式太震撼, 事前又無半點先兆; 再配合埋當時o既世紀疫症sars…令已飽受傷痛o既香港人, 痛得特別深…希望呢個只係愚人節o既一個玩笑!

特登自己拿o左餅私人珍藏哥哥紀念特輯出o黎懷念哥哥…睇番d好精彩o既片段, 忍唔住要同大家分享o下!


(1984年度勁歌總選…哥哥演唱得獎歌曲“MONICA”o既片段…係一路以來我認為最好睇o既片段!!!)

三年前我咁樣形容過:

“最正o個part都係播番84年勁歌總選, 哥哥勁歌熱舞咁唱出得獎歌“MONICA”! 哥哥佢真係好可以帶動氣氛, 台下面o既其他歌手好似阿倫, 梅姐, 仲有當時已經好誇張o既蔡楓華, 都跟住拍子為佢拍和…現場氣氛無得頂! 最正仲係佢o個班唔知係歌迷定係dancer, 超級齊整地o係佢後面拿住d“繩球”做出各樣動作, 後來仲砌出“M-O-N-I-C-A”字樣, 跟住仲有短裙美女出o黎踢腿添, 好“啦啦隊”feel! 嘩…真係好勁呀!”

呢段片真係好勁, 好經典! 除o左哥哥跳得好睇, 成段表演都好落力, 又有啦啦隊女郎一齊跳, 仲要砌出“M-O-N-I-C-A”字樣…好掂呀! 連台下d歌星都睇得好興奮!



仲有另一段又係好經典…真係唔睇番又係唔記得! 係88年tvb台慶搵哥哥做表演嘉賓…佢唱歌時其他藝員夾心夾腳拉o左郭晉安出o黎, 因為當時d人話佢好有哥哥o既影子! 咁睇番當時佢o地兩個個樣同埋形象又係幾似…但無耐又無人再咁講! 咁d人夾硬拉o左安仔出o黎, 哥哥又唯有講句:“my brother”去打圓場…但睇得出佢兩個都有d尷尬!

當時安仔真係好嫩口…o岩o岩出道無耐, 作為新一代小生已經好紅, 有得擔正做男主角! 當時我都好鍾意睇佢做o既戲, 尤其八十年代尾, 九十年代初佢做主角o個幾套“成功路上”,“同居三人組”, 同埋“萬家傳說”等! 佢係紅得有道理o既, 因為形象健康又討好, 點知到o左九十年代中期反而又dup o左…跟住要到2003年一套“阿旺”先令佢再創高峰!

同場仲有曾華倩, 藍潔瑛, 羅慧娟, 梁佩(藝)玲, 吳鎮宇等一眾八十年代o既年青小生花旦…仲有近年好鍾意參加“卡拉之星”o既戴誌衛…全部都好後生! Oh, o係段片居然仲見到紅唇王子蔡楓華?! 佢唔係已經俾人雪o左o既咩?!

(我強烈推介大家買番d八十年代台慶vcd o黎睇…因為真係好好睇!)

回顧回顧…

2005:
愚人節

2004:
4月1日

2003:
陪伴我們那代香港人成長的“哥哥”

SALUTE TO A LEGEND (1)

SALUTE TO A LEGEND (2)

SALUTE TO A LEGEND (3)

SALUTE TO A LEGEND (4)

SALUTE TO A LEGEND (5)


(另外, 大家可唔可以幫我睇o下我個“芒姐再現之...舊日的足跡”o個頁係咪唔work呀? 我click入呢條link: http://hejnom2.blogspot.com/係完全唔work…係我個電腦o既問題定係blogspot o既問題? 點解blogspot成日都製造咁多難題俾我o架?!)

*後記: 依家又work喇…咁即係點? 之前o個幾日有無人試過係入唔到o架?!