2007年3月14日星期三

3-14 (wed) 喝彩 (點解係呢個“彩”呢?!)

以下又將會係好長好長好長o既一篇日記…請自行找廁所位!

上個禮拜去o左睇一個超乎我意料地幾好睇o既舞台劇, 又或者應該叫音樂劇更加貼切…雖然製作上其實都“雞雞地”(sorry, 唔應該用d咁唔elegant o既詞語), 令我諗起中學時代d drama…不過以佢咁小本製作 (我o地懷疑阿高導演係咪用晒d budget去佢女友焦媛d舞台劇度…), 其實質素算係好唔錯o下…尤其係三個男主角! D 服裝, 道具, 同埋成個舞台o既求其 (esp. 後面佈景o個個好雞o既screensaver), 令我覺得有d o徙o左佢o地!

其實去睇之前都無懷有任何期望…可能就係因為無期望, 反而讓人有驚喜! 至於一開始點解會去睇, 相信大家都會估到…因為我確係八十年代的fan屎, 雖然我生於一個錯誤年代! 仲有就係張國榮, 陳百強, 鍾保羅三劍俠o既事跡我都好有興趣睇番 (雖然阿高志森導演claim話唔係影射佢o地…我真係完全唔明喇…點解要唔認呢? 好明顯影射佢o地, 但又有咩問題? 唔通驚佢o地o既家人唔同意?! 但係又唔係抹黑佢o地三位, 只係講番人人都知o既事實, 反而仲可以叫年青人借鏡…擺明係正面多過負面呀! 又可以打正旗號吸引佢o地三個d fans o黎睇…一舉幾得! 可能真係有d fans同埋家人唔鍾意o卦? 我真係唔知!)…當年o係英國煲完佢o地套“喝采” …真係覺得佢o地三個好得囉! 再加上哥哥同danny o個d經典正歌…所以都想去睇o下係咩一回事!

唔知點解第一次做時我完全無留意到, 今次都係因為某日睇 hocc blog 咁o岩見一個留言係post o左呢張"喝彩"poster, 就click入去睇o下…先發現原來已經係第二次上演喇!

去得呢d活動, 當然要搵埋同樣活在一個錯誤年代, 能與我傾到幾嘴老餅電視/電台/音樂經o既金美姐姐啦! 雖然入場欣賞o既大部份都係三十過外o既哥哥姐姐, 但出奇地都見到唔少十幾歲o既小朋友…唔知佢o地認唔認識哥哥同danny仔呢 (鍾保羅我相信佢o地真係應該唔會識)!



o個日同事問我去睇咩舞台劇, 我話“喝彩”! 佢話:“o下? 邊個做o架?”我話:“其實我都唔係好識o個幾位演員, 淨係知有gary哥哥譚偉權! 呢… 唱十二隻恐龍o個個呢…”你可能唔知邊個係gary哥哥, 但係你應該唔會未聽過佢隻首本名曲“白石嶺公園”! 之後阿小東東仲翻唱過添!

果然, 一講完呢句, 同事就知道係邊個…原來所有我o地年代o既小朋友, 係無人會唔識“十二隻恐龍去野餐”o架…o個時聽呢隻歌, 覺得個旋律幾好聽, d歌詞又幾騎呢…哈哈哈…可能就係因為咁, 曾經紅極一時o架! 連場刊介紹Gary哥哥o個part, 都有講佢憑呢首歌獲得95年十大兒歌金曲之一…幾勁呀!

等我同大家一齊回味o下呢首咁經典o既兒歌啦: “白石嶺公園”歌詞:

白石嶺公園

曲/編:鄧文傑 詞:韋然/許少榮 唱:譚偉權 Gary

十二隻恐龍去野餐
齊乘坐旅遊車出發了
路上唱歌謠快快樂樂
Sing I am on my way

又越過冰河 噴火山都穿過
二十里車程轉眼到
十二塊笑臉在齊去呼叫
Merrilly Merrilly

白石嶺公園 到處青蔥一片
讓活潑恐龍通處跳
十二塊笑臉在齊野餐了
Merrilly Merrilly

六十罐曲奇吃個飽
愛吃的粟米乾乾脆脆
讓愉快心情快快樂樂
I am so happy

莫亂棄果皮 你我記緊清潔
莫令這公園污染了
十二塊笑臉在齊說知道
Merrilly Merrilly

白石嶺公園 這裡風景真美
讓活潑恐龍嬉戲
十二塊笑臉在齊野餐了
Merrilly Merrilly
Merrilly Merrilly
Merrilly Merrilly




講番套舞台劇, 其實個故事基本上係無咩特別, 主要係講番“三劍俠”o既事跡, 由佢o地初出道三個完全無人識o既小子, 到大家相繼走紅, 再到事業走下坡, 開始走入嗜賭/濫藥/抑鬱o既絕路…個故事大部份香港人都略知一二 (又或者八/九十年代出世o既小朋友真係唔知o既), 都無咩點改動…所以都會幾有共鳴! 當然睇得最開心o既係大我o地少少, 七十年代初/中出世o既朋友, 因為佢o地真正係屬於呢三位朋友最當紅o既年代…我o地只係maan到少少車邊!

除o左有共鳴之外, 最重要係d歌真係好好聽囉! 去睇呢個劇o既最主要原因, 就係佢o地唱番哥哥同埋danny仔o個jar經典歌曲…嘩! 真係好聽到令人再次愛上佢o地兩個! 仲有鍾保羅我都好buy o既, 不過佢就無咩歌可以回味…得閒睇番佢o既“iq成熟時”或者香港小姐選舉囉! 一直係熱愛哥哥d歌多d, 但係今次聽完之後, 又再次重拾番曾經一度對danny歌曲o既熱愛!

哥哥o既快歌好似“monica”, “無心睡眠”, “第一次”, “不覊的風”等當然令人興奮, 慢歌如“風繼續吹”, “由零開始”, “儂本多情”, “有誰共鳴”等都係經典中o既經典…不過因為2003年哥哥逝世時已經即刻搵番o黎聽o左無數次, 所以個驚喜無再次聽番danny仔d歌咁大!

其實四, 五年前睇完“喝采”之後, 都曾經瘋狂迷上danny d歌, 即刻周圍搵番出o黎聽…不過今次再聽番, 係再次戚番起o個條筋o者…“深愛著你”, “畫出彩虹”, “眼淚為你流”, “偏偏喜歡你”, “等”, “漣漪”, “幾分鐘的約會”等等等等… danny仔d情歌真係好得囉!

仲有佢d勵志歌都真係無得頂…當然最無可抗拒o既係首點題歌啦“喝采”…一聽個前奏已經令人振奮…可惜係留到最後先唱, 都無好完整咁唱晒成隻, 仲要係萬人大合唱…應該留番俾劇裡面o既danny仔唱呀嘛, 佢真係唱得幾似…加埋d女角一齊唱就唔係太得…佢o地無論唱/做都同d男主角差一大截 (咁比較又好似有d唔公平o既, 畢竟今次套劇係三個男角先係主角, 女角都係戥o下腳)…真係o徙o左呢首咁好聽o既歌…



四年幾前, 我煲完隻“喝采”之後曾經咁樣寫過:


“2002-11-21…欲罷不能 ---“喝采”
http://hejnom3.blogspot.com/2002_11_21_archive.html

可以話係唔睇由自可, 一睇真係不得了…係鍾意到不得了! 好鬼cutie, 同“IQ成熟時”有異曲同功之妙, 咁當然“IQ” 又再好睇d啦…電視劇始終有多d“漿力”! 同樣係我好鍾意o既片種, 青春勵志劇再加好好聽o既歌, 同埋粒粒巨星…又Danny仔, 又哥哥, 又鍾保羅, 又翁靜晶…仲有俞琤, 阿旦等客串…簡直目不暇給! 睇完之後令我好鍾意佢首主題曲“喝采” (o係劇中係話Danny仔自己作o黎參加歌唱比賽, 但唔知點解叫o左做“鼓舞”), 仲有“眼淚為你流”…睇完即刻走去download o左好多Danny早期o既歌, 好聽到不得了!

以前唔明點解咁多大我o地幾年o既姐姐會咁鍾意陳百強 (記得阿千嬅同梁fing琪都話佢o地最鍾意Danny仔), 睇完呢套戲, 我完全明晒! 既靚仔, 又健康, 仲要有少少怕羞o個隻, 再唱埋冧歌, 仲唔冧死你! 可惜o係我認佢o既時候, 佢已變o左個“一生何求”或“一生不可自決”個滄桑/沮喪 look; 唔係唔好…就唔係特別討好囉! 其實我覺得東東o係“初戀無限touch”個感覺係有d陳百強o架, 連套劇個style都有d似; 不過Danny個形象就再健康d&討好d!

另一驚訝係 -- 哥哥o係呢套戲居然要做個“反派”…唔係d大奸大惡o個隻(o係呢類青春勵志戲應該唔會有大奸角), 只係d衰同學囉…但好明顯o個時真係Danny仲紅過哥哥好多, 否則唔會有一個咁o既角色分配出現o左!”


今次睇完呢個舞台劇, 又再次明白點解當年一出道o既陳百強會紅過張國榮咁多…因為佢形象健康正氣再帶點害羞, 反而哥哥o個種wild+反叛唔係七十年代尾/八十年代初社會人士普遍可以接受到o既 (有d似十年前o既陳曉東vs謝霆鋒…純屬個人意見)…當然, 到八十年代中期, 哥哥o既狂野+不覊形象出晒, 紅透半邊天…而o係我懂事之後, 都係哥哥紅過danny好多, 而且danny o既形象已經由健康男孩變成有d滄桑同埋灰o既中年男士…亦都係因為咁, 我o係睇到佢八十年代初o係 “喝采”o既演出之前, 真係唔多明點解有咁多大我o地幾年o既哥哥姐姐咁迷佢o架?! 當然後來就明晒啦…如果我係生於o個個年代, 相信我都會迷上陳百強…因為佢d歌實在太好聽, 同埋佢o個時個image真係超討好, 仲有佢有一種獨一無二o既charisma!



o係網上其實搵到好多關於哥哥同danny仔+喝采o既資料:

“陳百強與張國榮兩人在香港出道時間相仿,但陳百強一出道即以自寫自唱的《眼淚為你流》紅透半邊天,張國榮卻被嫌粉味太重,始終紅不起來,不過,兩人卻維持很好情誼,並合作了《失業生》、《喝采》等片,只是陳百強都掛頭牌,哥哥只能屈居綠葉。

《喝采》現已成為有宿命傳奇性的奇片。當時合演的青春《三劍俠》陳百強(1958-1993)、張國榮(1956-2003)和鍾保羅(1959-1989),後來都在英年死於非命。該片由蔡繼光導演,陳欣健監製,文雋和鄭丹瑞等編劇,主要女星是翁靜晶和盧業瑂。

這部青春校園舊片以校際音樂比賽為高潮,陳百強主演,但「反派」對手張國榮的反叛、憂鬱、俊俏形象也大出風頭。此後張國榮在影視壇吃香,一九八二年蔡繼光導演青春戀愛片《檸檬可樂》,便由他和周秀蘭主演,高志森編劇兼任副導演。”

2003年4月1日o係聽到哥哥自殺o既消息之後, 我都即刻諗起呢套“喝采”實在太邪…三個男主角都相繼英年早逝, 仲要三個都可以算係自殺! 之後有d人話女主角翁靜晶係好命硬o既人, 佢身邊o既男性同埋同佢拍呢套劇o既三位主角都…哎…真係大迷信, 大迷信, 大迷信 (仍然強調呢三set“大迷信”必須一輪嘴咁唸) 喇!


http://hejnom3.blogspot.com/2003_04_01_archive.html

“不過最最最邪o既係我忽然間醒起我o係倫敦時成日睇o個套“喝采”, 3個男主角相繼逝世! 先有鍾保羅, 跟住係陳百強, 依家連哥哥都自殺死埋…你都唔好話唔邪! 對唔住, 我係唔應該導人迷信o既…不過我真係忽然諗起覺得有d邪嘛!”


可能今次呢套舞台劇就係驚邪…所以死都話唔係講佢o地三劍俠o既故事!

我記得2003年都曾經話過想重拍“喝采”, 話要搵當時仲未折夥 (應該係o岩o岩組成添o乍) o既boyz (kenny+steven) 同埋isabella做…其實個感覺都幾似…可惜最終拍唔成, 不過好似都拍o左套什麼網劇叫“新的喝采”…唔知係咪用番呢個故事o既呢?

而另外一套“失業生”, 我就未睇過, 不過又係佢o地三劍俠做, 都可以買o黎睇o下呀!


http://hejnom.blogspot.com/2006_03_28_archive.html

“經過hmv又見到八十年代經典電影“失業生”出o左dvd, 係“喝采”三劍俠-陳百強, 張國榮, 鍾保羅原班人馬之作…呢個group真係邪中邪, 三人都英年早逝, 仲有少少“死於非命”o個隻…但係三個其實都係好掂o個種! 雖然三個都好吸引, 但我居然最想睇係鍾保羅…因為不嬲都好buy佢…當年o既 “金牌司儀”接班人, 同埋之後睇到重播o既“IQ成熟時”…都係好得!

個女主角好似叫徐杰, 都幾靚女, 但只係o係o個段時間見到佢o既蹤影, 之後幾年已經唔見o左…個style仲有d似翁靜晶! 如果我無記錯, 佢好似係“彩雲曲”o既主角?!”




youtube亦都有好多精彩片段…睇完套舞台劇上o左舖danny癮, 緊係要去搵o下佢d經典mv同埋演唱會片段啦…點知搵到一段仲精彩o既…係1982年TVB一個由蘇絲黃主持o既節目, 叫“十彩新地”…真係聽都未聽過有呢個節目, 唔知係咪有D似"勁歌金曲"或者"K-100"呢?

嘩, 好搞笑…見到蘇絲黃後生時o既樣…係咪o個個年代o既女dj都係咁o既style o既呢?! 佢o個時個look有d似俞琤 (不過女性化少少) 同埋 "IQ成熟時"o既miss wu楊詩蒂…即使依家o既蘇絲黃, 個look同埋style同埋講o野個tone都幾似!

不過睇住佢o個時個樣, 同埋同依家無咩分別o既聲音, 好似怪怪地咁, 唔係太襯…都係襯佢依家個超中性look多d!

oh, 另一驚喜就係居然發現譚玉瑛姐姐…後生o既佢都幾靚女呀! 當然, 最正就係o係個節目入面有"喝采"呢隻好好好好聽o既歌聽啦…隻歌仲要係danny仔自己作曲, 真係好有才華!



又講埋套舞台劇先啦…其實我覺得上半場好睇過下半場好多, 因為劇情無咁灰, 連d歌都好聽d!

扮張國榮o既gary哥哥咁有舞台劇經驗, 當然做得好, 唱又真係唱得好好喎…以前"白石嶺公園"年代都無發覺添…哈! 同埋佢都應該就快四十, 但係扮剛剛中學畢業o既o靚仔都仍然ok…仲有發覺佢個feel有d似李克勤, 睇番場刊, 先知原來佢o地同曾特首一樣, 都係華仁仔! 我諗佢o地應該係差唔多o個幾屆添…仲有, 原來gary哥哥都有寫blog喎: http://hk.myblog.yahoo.com/iam-garytam!!!

反而幾驚喜o既係做陳百強o既陳健豪…真係唱得幾好, 同埋唱腔都有D似DANNY仔, 但又唔係過份模仿…一開場佢唱得無咁好, 但係到中間開始真係幾有水準, 幾有味道…原來佢仲係讀緊演藝, 呢個小朋友應該前途無限!

至於扮鍾保羅o既鄚嘉俊, 雖然得好少歌唱, 但係齋講o野同埋做戲都做得幾稱職, 咁但係當然唔夠danny同leslie出啦!

前幾篇先講開鍾保羅…佢當年o既自殺身亡真係令我好深刻! 話說o個時好鍾意睇佢做司儀, 點知睇完89年港姐決賽無耐, 到9月1日開學日放學返屋企睇新聞, 居然聽到話金牌司儀跳樓身亡…好驚, 好唔開心, 完全接受唔到…仲要o個時d報紙唔知點解可以登人o既遺容…無啦啦一揭開C1就睇到, 嚇到我呀…事前完全唔expect會有o架嘛! 同埋因為佢係跳樓, 個樣變晒, 腫o左, 直頭完全唔似…總之好鬼驚!

Oh, 仲有o個位一人分飾幾角o個個哥哥, 佢做個個角色都做得好好, 咁多個最出反而係佢!

成套戲個感覺有d似睇緊tvb o既"難兄難弟"! 至於最令人難忘o個幕, 相信係leslie落台同台下觀眾握手…呢個位捉得幾好, 同埋成個感覺好八十年代, 好似帶番我o地返去廿年前咁…

可惜呢個show已經做完o左, 大家想睇唯有等下次重演! 而我, 都係時候拿番套四年幾都無再睇過o既“喝采”出o黎重溫o下喇!

未買“喝采”vcd o既朋友, 可以去youtube睇埋呢個"當張國榮遇上陳百強"片段…danny出席哥哥85年演唱會仲上台同佢合唱"喝采"...



睇完呢段片, 一開電視, 居然見到播緊“秋天的童話”…仲要係陳百強o個part! 真係邪!