12-31(sun) 網中人

回望這一生
歷遍幾翻責備和恨怨
無懼世間萬重浪
獨怕今生陷網中

誰料到今朝
為了痴心我投入網
人在網中獨回望
世間悲歡盡疑幻

豪强心中志我未消磨
何妨成與敗
重重艱辛豈怕它
闖開孽網非難事

唯望到一朝
盡破金光燦爛名利網
獨像鳥飛廣闊天
網開衝出不再返

真係邪…我發覺近年12月26日成日都有d天災人禍發生…2004年o既南亞海嘯, 2006年又整個台灣地震…真係邪邪邪! 以後12月26日都係唔好出街…

本來台灣地震又唔算係好勁o個隻…點知無啦啦震斷o左d電纜…搞到對全世界人o既“影響”分分鐘俾起海嘯仲勁! 呢次“網絡風暴”, 令大家驚覺原來所有人都已經不知不覺變成“網中人”…internet對於一般人o既影響, 你真係唔會估到!

頭o個一晚地震完之後仲上到網o架喎, 點知到深夜就唔得, 之後一連幾日都完全上唔到, 或者要到好夜先可以好慢咁上到d, 直頭好似係去番電話線dial-up年代! 依家話搞番掂晒…但係仲係好鬼慢囉…可能咁樣可以令我從此戒甩呢舖癮, 慳番d時間早d[目訓]…

十年前internet未普及o既時候, 大家咪又係咁生活, 仲生活得好好添…人與人之間o既溝通可以靠打電話/寫信/見面…係就係無咁方便, 但好似反而close d! 有o左internet之後係方便o左好多, 有好多唔見o左好耐o既朋友, 都可以o係網上相遇番…send個email/icq/msn又確係快捷方便好多, 仲要唔洗錢添…所以話網絡將人與人之間距離拉近o左, 又好似係o岩喎…但係當你每年聖誕只係收多n張e-card, 但係真實o既聖誕卡就由收到幾十張跌到得幾張o既新低, 連我呢d好重視寫聖誕卡o既人, 都會懶得寫…但係其實e-card, 又點會可以代替“現兜兜”收到真實o既聖誕卡o個種興奮呀?! 有親筆寫o既字同埋祝福, 先係節日送卡o既真正意義嘛…e-card就無o個種warm o既感覺…如果係一o野send俾幾十個receipients o個d, 感覺就更加 “foo遣”…不過當然係好過無o既!

咁究竟網絡係拉近o左定拉遠o左人與人之間o既距離呢?! 我諗係拉近o左無咁熟o既朋友之間o既距離, 但反而就拉遠o左熟朋友之間o既距離…我覺得係咁囉! 所以呢段“沒有網上的日子”…可能反而係可以等我o地反思o下o係呢段上網十年o既日子, 我o地係咪太過依賴上網生活?!

我自己就肯定係囉…有時返工上完網, 返到屋企又會手痕開著佢, 左click下又click下, 搞到遲遲都未[目訓], 晚晚都唔[目訓], 仲要手+頸+背都勁痛…

記得十年前開始興上網時, o岩o岩讀緊f.6,7…其實我已經係比同我同年代o既人遲o左d先開始上網, 但係比起其他人都可能算係早o個批o既…因為後來發現icq個uin係7個字原來算係好前o個隻, 依家可能已經去到9or10位數喇! o個時可能係“新屎坑”, 所以咩都玩一餐, 同d日日返學都見o既同學仔, 都要晚晚icq…真係幾無聊o下…不過又好似幾有趣! o個時聽到打得通上到網o個隻dood dood聲就已經好興奮…仲覺得此乃無比偉大o既發明!

上網十年, 但係addicted to internet o既程度好似仲有增無減…可能我都要好似d人戒煙咁戒o下瘋狂上網o既習慣…哈哈…不過我諗機會都微d!