2006年11月19日星期日

11-19(sun) 2006萬千星輝賀台慶

既然講o左咁多日台慶節目, 當然唔少得講埋今年o既“萬千星輝賀台慶”啦!

其實我到依家都唔明, 點解要將萬千星輝賀台慶同台慶頒獎禮分開兩日做?! 咁樣刺激d咩? 定係想爭多一日收視?! 但係亞視依家弱到咁…根本唔需要爭呀?! 今年台慶正日無o左個頒獎禮, 感覺失色o左好多, 無咁吸引囉…雖則十年前都係齋得表演無頒獎禮都依然覺得咁好睇…但係開始o左就無得返轉頭o架啦…每年慣o左台慶都係等睇個頒獎禮, 今年分開o左正日就失色晒喇!

無o左個頒獎禮, o個d為o左爭獎勢死都出席o既哥仔姐仔又個個都唔o黎, 連個cast都弱晒…無線咁做都唔知為咩?!



至於o個d表演項目本身, 當然就同十幾廿年前o既“龍鳳呈祥賀台慶”差好遠…o個時o個d真係好精彩好好笑…even十年前o既台慶趣劇都真係好笑好多…近三五七年就真係無聊到[o積]都笑唔出!

今年個台慶趣劇什麼“翡翠紅人館”…扮蠟像玩“木頭公仔唔准郁”…初頭玩陳豪廖碧兒o個part已經算係最好笑最抵死o架喇…起碼無傷一雅呀! 之後o個d真係過晒火位, 唔好笑不特止仲好唔尊重人, 完全無必要…阿叻同志偉今次真係要檢討o下!



唔怪得知今日睇報紙話:

“觀眾扯火 廣管局收28宗投訴
阿叻、志偉蹧質藝員令人惡心”

“廣管局接獲28宗投訴,主要針對陳百祥將油漆噴向馬國明的眼睛、主持玩除藝人衫褲不雅及曾志偉反串演出的歌舞有侮辱男、女性之嫌,教壞細路。”


(馬 國 明 在 趣 劇 環 節 中 被 陳 百 祥 以 紅 油 噴 額 , 他 掩 著 左 眼 衝 到 洗 手 間 沖 洗)

“一網講盡 網友籲阿叻「用o下腦」”

“在 香 港 討 論 區 上 , 也 有 不 少 網 友 為 馬 國 明 被 阿 叻 以 紅 油 噴 額 頭 大 表 不 滿 , 認 為 阿 叻 把 紅 油 噴 向 馬 國 明 接 近 眼 睛 的 位 置 十 分 危 險 , 很 容 易 會 誤 傷 對 方 眼 睛 , 行 為 過 火 , 又 指 無 線 急 忙 在 畫 面 打 上 小 朋 友 不 要 模 仿 等 字 句 來 補 鑊 云 云 。”

“趣 劇 環 節 又 玩 得 太 過 火 , 尤 其 志 偉 扯 高 扮 蠟 像 鄭 嘉 穎 的 上 衣 並 捏 他 的 乳 頭”



志偉平時玩得o黎都無咁離晒大譜, 阿叻就不嬲都無分寸o架喇…以為自己好巴閉, 實則一d料都無, 仲連對人o既基本尊重都唔識…玩都要玩得文明先得o架! 用黑筆劃郭晋安d牙, 用紅油噴馬國明額頭, 又用水噴林保怡然後用個抹地o野抹佢塊面, 跟住又爆鄭嘉穎樽…扯黃德斌件衫除佢條褲, 又o係郭羨妮心口寫字…嘩, 大佬! 你o地d舉動都好不知所謂o者…直頭唔當人係人!


(黃 德 斌 被 曾 志 偉 扯 衫 除 褲 , 猶 如 被 人 施 暴 一 樣)

所以話, 要做男女主角都唔係咁易, 係要負出代價o架…比人咁玩法都敢怒不敢言…唔單止係皮肉之苦, 更甚係要俾人侮辱, 連人性尊嚴都無埋…我一邊睇一邊都覺得真係好侮辱囉!


(翡翠紅人館)

另外一個好唔掂o既就當然係許冠文啦…佢真係正如大家所講, out中之out o既“out霸”…其實你out都唔緊要, 你係前輩, 大家點都會俾番幾分薄面你…但係你已經out, 就唔係講咁多o野, 見好就收啦! 你已經唔係三十年前o既“笑匠”, 依家只係“被恥笑o既對象”…何必呢?!

o個三位阿姐個什麼“阿姐廚房”…其實擺明都係玩o者, 又何須太認真呢?! 係, 佢o地係核突, 煮[食送] 係為o左晒珠寶…但你都要明白人o地有sponsor, 呢個只係遊戲規則…同埋佢o地核突, 都係佢o地o既事…你又何必咁多聲氣, 搞到依家個focus去o左你度, 變o左你核突呢?!

係人都知o個三位阿姐唔多識煮[食送], 都係搞o下gimmick o者…好似倫伯呢d咁o既世界仔, 阿姐o個d鮑魚煮都硬掘掘都俾十分, 家燕姐無咁惡死就俾低d分…係咁o架啦, 呢個世界邊有公平? 你都明知呢d只係一場遊戲, 梗係睇地位做事o架啦!

同埋台慶呢家o野, 人人開心咪算囉…你以為自己好醒懶“正義”咁玩踢爆, 試食o個時已經彈三彈四又話人o地請鎗但仲要詞不達意講到口窒窒…o個時阿姐同do姐已經好不滿咁同你爭辯…你係咪蠢成咁呀? 連女人都得罪? 仲要係幾個咁巴之閉o既女人…做人都係識時務d好! 即使你仲係以前咁威水, 你咁講都已經係無聊加唔識do, 仲要你依家已經唔係萬人景仰o既笑匠, 真係識do d啦…你如果唔係唔掂, 都唔洗咁老先走番出o黎撈…但係你o係tvb撈居然得罪pizza姐…你係咪未死過呀?

佢仲要彈完一次都唔夠喉, 死唔斷氣地出o黎唔知抽台慶密碼時, 佢又無啦啦拿番呢樣o野出o黎講, 話希望下年台慶d人唔好再請鎗, 均真d…你窒人都要appropriate d呀…窒完一次咪算囉, 無啦啦開台慶密碼你又拿番出o黎講多次, 搞到阿姐同do姐幾咁“慶”, bilibala同佢閙過, 要去廣告cut左佢o地把聲…哎! 真係唔知佢想點?! 做o野都要睇場口呀…係人都知呢個環節係得啖笑, 唔洗懶認真o既…一個咁唔識做, 仲要係咁唔大體o既嘉賓…六叔下年都可以black list佢!



呢個“阿姐廚房”環節, 仲有鄭嘉穎, 郭晉安, 黃宗澤, 吳卓羲四小生飾演“鮑、參、翅、肚”…睇o左佢o地o既表現, 又再一次印證到“小生唔易做”呢個道理…你係最佳男主角又點呀? 除o左要俾人噴俾人玩, 仲要o係度做d阿姐o既“阿四”…好似隻狗咁俾佢o地點… “鄭嘉穎, 你同我切o左佢…”…哎! 台慶真係一個出賣尊嚴o既show…所以d發明星夢o既小朋友, 真係要諗清楚先好發夢…!

反而阿叻同d藝員跳千手舞, 同埋志偉同d男藝員反串扮女人跳舞兩part都ok好睇…尤其係志偉o個隻反串歌舞好好笑, 睇得我全家好開心! 公道d, 呢part我又唔覺得點樣“有侮辱男、女性之嫌,教壞細路”喎?! 反串都係搞o下笑o者! 同埋估唔到某d男藝員反串都幾靚女!



最吸引o既反而係輕輕鬆鬆鄧梓峰囉…佢個樣同d表情真係好搞笑, 一出o黎已經引到我係咁笑…佢果然係無改錯朵, 做每一個task都輕輕鬆鬆…見到佢o既人都開心d! 上次o係電視城見到佢真人都係咁歡容…呢d人先討人歡心o架嘛!

反而蔣志光雖然都表演得幾好, 但睇得出佢有d不屑做呢d表演, 所以到最尾介紹番自己o既時候, 佢要強調佢係“專業演員”蔣志光, 好明顯要話俾人聽佢係唔想做呢樣o野, 但因為佢專業, 所以唯有做!

幾個月前post過佢篇專訪, 佢都係表現出勁不屑但又身不由己…哎! 既然要做, 就做得歡容d啦…朋友!



今年無o左利孝和夫人以佢把獨有沙聲揭曉台慶密碼, 講o下“3+6x9-7”…真係失色晒! 佢淨係出o黎開信封同切蛋糕…咁就唔夠精彩啦! 都係以前d台慶好睇…希望下年可以結合番表演項目同頒獎禮啦!

所以都係睇番以前d精彩片段好d! 哈哈…終於俾我o係youtube搵到1994年阿姐同廿八“俊男”表演“熱咖啡”o既片段! 我自己當年都有錄起, 但係餅帶花晒, 依家睇唔到! 好彩有人upload番, 真係好! 依家想睇咩經典節目, 都有機會搵得番…都話對youtube係又愛又恨o架啦!


(要等d人唱完歌先到呢一part)

嘩! 真係好精彩呀…當時真係超震撼, 第二日返到學校人人談論, o個年d咩表演呀tq呀, 人人都玩熱咖啡+迷人pink lady…係o個期最潮o既歌曲!

我記得當年錄o左仲睇o左n次添…阿姐真係好fit好潮型到爆!

o個廿個“舞男”, 都有唔少係當紅男歌手…咁多人一齊跳舞好人材濟濟, 仲要好眾志成城囉! o個期最紅o個個應該係[火羅]安, 你睇成日都影住佢o既! 咁佢o個時又真係幾咁型, 同埋跳得最好囉! 仲有李克勤, 古巨基, 鄭嘉穎, 鄭伊健, 古天樂, 梁炳, 譚耀文, 張崇基+德etc…好好睇啊!