2-14(thurs) 戀愛季節 + big 4新年悶親你演唱會

"老表, 你好嘢"終於做完…呢套係近期所有朋友都會話出完街要返屋企上網睇番的電視劇…真係幾唔錯! D細節位都做得好好…我都推介咗好多朋友睇! 最尾黃光亮cross over番多年前佢o係“監獄風雲”個角色傻驃又係抵死! 仲有萬二蚊同郭晉安結婚o個段對白都寫得好好!

接住o個套“戀愛季節”…我曾經好like的toby…依家真係有d頂佢唔順! 糖妹亦都…睇吓之後幾parts會唔會好d?!

反而下午第n套倉底貨“戀愛星求人”幾好睇…又係d無無聊聊輕鬆小品…原來徐遇安係監製…唔怪得知個班底咁“真情”! 又劉丹又苑瓊丹! 仲有啱啱做完的“法網狙擊”o既謝天華+楊怡!好睇過黃金時段o既“初五啟市錄”好多! 做完呢套仲有”鳳舞香羅”添…我想睇!



新年睇咗tvb群星o既 “我愛香港”賀歲片系列…睇咗4年, 始終都係第一年嘅"72家租客＂最好睇! 同埋點解卿卿個樣會變成咁？雖然我一向ok like佢, 但真係忽然變咗一個阿婆…點解會咁? 應該唔關生咗仔事…其他生過的女星都無一下子老成咁?! 可能真係唔應該出番o黎…等大家留下一個美好印象咪好囉!



歲月留聲台真係愈o黎愈好嘢…新年不停咁播番89蛇年的賀歲節目…初二播煙花, 初三播初三遊戲節目, 連初四都有…真的令我以為時光倒流…回到24年前的蛇年! 真心like! 仲有十分嫩口的卿卿同朱慧珊! 卿姐塊面嗰時有啲肉地靚好多啊!

仲有“今夜不設防”特別版…有當時剛當選的五位89年亞姐佳麗…潔儀姐姐好搞笑…好似個小朋友咁…好驚青! 翁虹又的而且確幾有大將之風…同埋睇得出伍姑娘同萬二蚊年紀輕輕已經好世界女!



新年仲睇咗big 4第二次演唱會…上次2010年係萬眾期待+撲唔到飛...今次, 雖然係無咩期待, 但諗住都唔會太差...畢竟佢哋三個 (梁/許/蘇) 都有好多好歌, 而健仔講嘢又好funny…點知…十個睇咗有十個都話…同上次個落差實在太大, 慘不忍睹! 揀o既歌大部份都唔多hit…其實佢哋仲有好多hit歌未唱! 而我明白佢哋唔想重覆番上次, 想有突破…但…每個人都做自己最唔擅長的, 實在吃力不討好! 而最重要係…真係幾悶! 我好少見成個演唱會枕住有咁多人行來行去去廁所, 我本人都睇咗好多次電話…上次我係望一眼電話的冷場時間都無…真心可惜! 又一次證明, 所有事情真的也應該…見好就收!