4-20(sat) 翠如bb+富黛戀玩完+小聰子無限復活+大迷信2013

“走過浮華大地”係我近期唯一追睇o既節目, 就算miss咗十點半o個場, 我都會等到1:45去高清台追番…真係少有我會like o既旅遊節目! 除咗因為係講我最鍾意o既英國, 仲因為成個感覺幾新鮮, 同一般tbb o既旅遊節目好唔同…阿叻嗰d咩”蠔油”杜拜, 其實佢去台灣同杜拜都無分別, 都係求其搵間金碧輝煌o既酒樓/酒店食餐勁, 再搵d“靚”女著吓三點式撥吓水花咁! 我覺得阿叻哥佢其實都真係做番佢比較擅長的事情…專注去下志偉佢哋嗰啲賀壽party算吧啦!

d朋友話今次翠如bb呢個旅遊節目好有線…其實我無咩睇過有線的旅遊節目, 頂多睇過娛樂新聞台, 仲要係n年前的事…所以覺得幾唔同, 同埋佢哋o既感覺真係似朋友去旅行, 仲有每晚個ending都好正! 余詠珊終於做番d有建樹o既事情!

睇完呢個節目, 我開始明白點解翠如bb三十幾歲人仲可以被高登仔奉為bb...我真心覺得佢幾討好囉! 我睇完個節目都幾like佢, 覺得佢比起甚麼千語bb, 嘉欣bb更有資格成為”bb”…佢個感覺幾自然幾真 (如果佢係扮出o黎, 咁扮到都抵佢!), 同埋佢個妝唔係依家typical的“o靚模假面假眼假眼睫毛”妝…反撲歸真反而感覺幾特別…佢又真係超級童顏, keep得好好, 個樣後生過d廿幾歲o靚妹, 個笑容仲幾天真無邪…抵佢成為bb!

同埋唔知點解我睇睇吓呢個節目覺得佢好似一d人, 首先個樣係有d似楊寶玲同朱潔儀…而講嘢個tone仲居然有d似…松松姐姐!!! 哈哈!

其實翠如bb都係應該keep住做呢d旅遊節目…呢樣佢做得最好, 拍劇就…真係一般啦! 至於佢起家的娛樂新聞台主播角色, 其實都唔係特別好…正如大家所講, 佢講嘢唔算字正腔圓, 仲有d懶音 (但我唔認同係好勁的懶音)…但做呢類旅遊節目個效果就出奇地自然同討好! 睇完呢個節目我都封咗佢做bb!



至於洪永城…感覺都幾funny, 睇好多報導話佢係媾女王, 同埋n年前喺有線已經對翠如bb嗒晒糖…難怪佢哋成個特輯的感覺都咁sweet! 好睇!

下個禮拜換咗湯洛雯…落差太大, 相信迴響也會不少!

Oh yeah…仲有, 我覺得第一集最好睇! 去名店試衫嗰part幾搞笑…洪永城試嗰套西裝真係超讚! 呢個世界真係一分錢一分貨…估唔到可以咁大分別!



嘩! 剛剛過去o既一個星期, 真係好多關於生離死別o既娛樂新聞!

首先係陳僖儀死於非命! 26歲…真的太年輕了吧! 只能夠再次講句: 人生實在太無常, 要珍惜眼前人, 做自己想做的事…那怕是很傻的事, 只要唔係傷天害理就得喇!

不過真係不得不提呢個“大迷信大迷信大迷信1993”…好耐之前講過, 當年我睇過篇報導, 話逢3字尾的年份都死得人多…尤其娛樂圈! 又真係邪o架喎! 93年一開始就有蘭桂坊元旦踩死人事件, 跟住03 o既sars真係唔駛多提…巨星方面73有李小龍, 83有傅聲, 93有家駒, danny仔, 余綺霞, 仲有前入境處長個女/當年華納打算力捧o既新人梁思瀚 (劉錫明"moshi moshi"mv女主角)...本雜誌仲話93年幾位都係華納人同埋paco-related! 03就又係唔駛講啦...巨星中o既巨星哥哥同梅姐! 我唔係想導人迷信, 只係想講一句: 好cher~~~!!

跟住就到郭富城同熊黛林的七年情玩完新聞喇! 查實呢…我覺得佢哋甩拖大家一d都唔surprise…娛樂新聞傳得出o黎, 仲要傳足幾日的, 九成都係真! 而又其實有無苟姑娘佢哋都注定會散...因為城城根本係一隻無腳o既雀仔! 你要佢同你結婚, 咪即係逼佢同你分! 其實城城deliver o既msg一路都好明確, 七年都無承認過你的地位, 你係咁單方面宣示主權咪仲搞到自己肉酸咗! 成日都話, 人最緊要輸人唔輸陣, 女人就更加唔可以輸尊嚴! 而城城做得最錯o既係近幾個月俾咗false hope人…我諗熊小姐初時都無諗住可以入宮, 係搞咁咁耐開始以為有d希望…跟住年頭佢又去人哋老豆喪禮仲成個女婿咁款, 俾false hope人呢樣嘢最衰!

咁熊小姐都係早走早著, 輸少當贏, 執番身彩為妙! 而且我哋成日講…小美人才是正印嘛! 男人最緊要係咩呀? 一定係事業…幫到佢事業的…你贏晒! 最終城城要娶o既可能會係…小~美~人人人人人人~~~!!!

更估唔到o既係何家淑女超雲同陳山聰o既分完又合! 真係估唔到小聰子有頑強o既生命力…無限復活…踩極都唔死…真心佩服佢! 超雲醒咗都會再次被迷魂番…事情咁峰迴路轉, 好嘢!