2006年1月23日星期一

1-23(mon) 崔建邦

呢期睇“娛樂直播”d訪問, 真係再進一步明白點解個崔建邦會被受力捧, 事關o係新一代主持之中, 佢的確係表現最出色! 本來都無咁覺o架…係有比較就特別覺喇! 自從李思捷唔知幾時離開o左呢個節目, 得番佢一個力撐, 後尾再加入o左個敖嘉年…一到訪問時, 真係立見高下! 李思捷係ok o架喎, 但佢唔見o左! 新上任o既敖嘉年係就係字正腔圓, 但就係咁多! 佢每次訪問都超yim悶, 仲有佢個“師傅”洪朝豐o既?型格!

o個日有人問我:“你覺得amigo做得好d定係o個個??o地o既做得好d?”咁一比較之下, 當然係amigo啦…起碼無咁悶嘛! 不過就嚴重口甜舌滑囉!

所以次次有親d比較重要o既嘉賓, 都係由amigo訪問…而o個d無無聊聊o既焦媛呀, 伍詠薇呀, 鄭文雅呀, 李彩嬅呀 (即係o個d擺度明係用o黎戥夠每日都有訪問o既嘉賓), 就俾敖嘉年訪問…不過佢做o左咁多年, 終於有得坐正做主播, 都已經算好好彩o架喇!

一比較之下, 發現崔建邦訪問係有趣d o既, 同埋都係o個句, 佢真係好識tum人! 尤其係訪問容祖兒o個集, 真係核突到呀…過份口甜舌滑! 佢成個訪問都讚到容小姐天上有地下無, 連佢樣靚佢都o翕得出…容祖兒話自己女fans多過男fans, 佢就話其實你唔知o乍, 有好多男仔都好鍾意你, 尤其d成熟d o既男士, 覺得你質素好好…嘩! 真係笑到我呀! 次次都講埋d其他人講唔出o既說話去tum d嘉賓…終於明白, 佢紅, 係有佢o既原因o既!

前幾日睇佢訪問寶珠姐, 我忍唔住大哎o左一聲:“擦鞋仔…”! 佢又話佢阿媽知道佢訪問寶珠姐開心o左好耐, 因為佢都係o個d“陳寶珠o黎喇…”影迷 (下刪200字讚美說話)…咁寶珠姐呢d auntie當然受晒啦…臨尾仲話:“你都記住同你媽咪講…你個仔好叻!”amigo臨尾都唔執輸補多句:“我都會記住同經經講你媽咪好好呀!”oh, 真係擦得好好呀!

無論係妹妹仔如twins, 大少少o既joey, 再大d o既sammi, 媽咪級如寶珠姐…佢都係一貫o既擦擦擦…係就係好核突, 不過又確係tum得d嘉賓好開心 (有邊個唔鍾意聽d讚美o既說話呀…即使明知係一d恭維o既說話! 而且佢擦鞋o既功力都唔算太差…睇得出係擦o左好多年!)…同埋都睇得我好“開心”o既, 因為整集都係恥笑佢落鞋油落得幾咁足!

上個禮拜有一集訪問阿慕榕李詩韻…睇落佢又真係幾大方得體! 同埋真係幾多才多藝, 又識跳舞, 又識彈古箏, 仲識作曲…佢即席彈o左佢自己作o個隻歌, 幾掂喎, 佢唔講我以為係流行曲添! 同埋話佢屋企好傳奇, 由本來大有錢女變成依家要養幾頭家…果然係有潛質!

睇“東張西望”有段片見到張可頤, 我差d以為係盧苑茵, 睇真d先知係張可頤…點解佢真係腫成咁?

仲有, 本來一路都覺得側田ok樣, 但係上個禮拜俾個friend講完話佢個樣有d智障之後 (so sorry!!!), 真係愈睇愈覺得佢似…sorry晒!

今年華裔小姐, 我o地o個位香港代表“靚女”葉翠翠小姐一如大家所料輸到離行離列…賽果十分合理! 香港代表都無面俾…已經唔係初初舉辦時香港年年得, 近年o黎香港成日都唔得, 由葉翠翠小姐代表我o地就更加唔得啦! 唯一唔明係點解張玉珊小姐咁快已經變o左張玉珊博士? 好威囉…十年前, 佢只係一個o岩o岩中學畢業, 發住明星夢o既青春玉女歌手…“十年人事幾翻新”系列之中, 最威都係佢!

經某朋友“推介”, 我再次嘗試去睇o下“窈窕熟女”…果然同我上次焗住睇o左少少一樣無聊…但朋友講得o岩, 無聊得來其實幾好笑…尤其o個四大美人d態度好抵死…!