2005年12月15日星期四

12-15(thurs) 三個A CUP的女人

咁多日示威以來, 今日d世貿示威者就最醒喇…搞個“三步一叩”遊行, 呢一招做得好…得到同情又達到效果…仲可以表現得好團結! 好似佢o地自己話齋, 唱o下歌跳o下舞…以和平方式表達自己o既不滿…唔好太盲目, 隊長叫你跳海你就跳海, 叫你衝就衝…太易俾人mobilize唔得o架…咁樣吃力不討好!

其實好多人都明白佢o地o既慘況同埋不滿, 但你做任何激進行為去傷害自己/其他人只會惹人反感…你最想都係人o地聽到你o既聲音o者…溫和d, 可憐d反而會得到人同情…示威都要食腦o架嘛!

Sorry, 我知我唔應該笑, 但我睇到尋日段新聞真係覺得好好笑…首先係佢o地第二日已經有備而戰用保鮮紙蓋眼 (呢part已經幾好笑…sorry, 真係sorry!), 跟住好有聲勢+部署咁衝擊警方, 仲搶晒人o地d盾牌…香港d警察又係弱雞d o既…無法啦, 平時都無咩體力勞動, 係唔夠人打o架喇! 一邊打交, 一邊又有其他示威者o係後面打鑼打鼓, 真係好有做show feel! 但最好笑係d南韓農民後尾又還番晒d盾牌俾警方, 不過就貼上反世貿貼紙 (呢part又係好笑), 仲幫手清理現場添…都幾disciplined呀! 有d似大家玩完一個打交遊戲一齊執番d玩具, 還番俾你帶番屋企咁!

最搞笑係d記者反而帶晒眼罩, 荒死會俾胡椒噴霧噴中…咁又係o既, 殺錯無辜絕對唔出奇! 就算d示威者俾胡椒噴霧噴中, 又好似無咩事咁洗o下眼又再o黎過…跌倒又起番晒…其實幾“逆境自強”呀, 應該?o黎做教材! 如果我係d示威者, 就直頭準備番胡椒噴霧去反噴警方 (我講笑咋…唔好告我呀! 我好驚o架!)…或者再整d勁d o既…咩四川麻辣噴霧呀, 冬蔭功噴霧呀咁(似火鍋湯底多d呀呵?!)!

其實佢o地o既表現已經一日比一日進步, 前日就激動d, 尋日搶完盾牌再還番都已經有d進步, at least帶o左d歡樂俾大家…今日呢招做得最好…我要讚o下! 我諗我o地應該去睇o下遊行…因為“世貿在香港”真係好難得!

原來上個禮拜日“三個A CUP的女人”係最後一集…唔怪得知有張衛健訪問咁精彩! 咁精彩o既節目…點解咁快完o架?!

成集都好好笑, 好抵死…尤其dicky個訪問!

睇得出佢同江欣燕係有d尷尬, 但都尚算自然, 扮到好無o野, 好似聚舊咁! 不過好明顯佢係好俾面江欣燕, 態度都唔同晒…完全同佢上個禮拜o係“娛樂直播”接受amigo訪問係兩個人, 好臭寸! 不過就算唔係江欣燕, 佢都會俾面查小欣同毛舜筠! 今次呢個訪問, 佢好合作, d風趣幽默返番晒o黎!

最抵死係毛舜筠同查小欣仲要不停望住佢o地兩個o係度笑, 仲要話:“唔好阻住佢o地, 我o地咩都唔好講喇…”, 毛毛真係幾抵死o架喎! 發覺原來80年代d嬌俏花旦, 原來老o左真係會變得幾抵死…但以前完全唔發覺佢o地有d咁o既潛質! 第一個係曾華倩, 第二個係毛毛!

睇得出佢真係曾經好鍾意江欣燕, 同埋佢真係好識tum女仔! 佢話個個o既生日佢都唔記得, 唯獨江欣燕生日佢就記得,“因為我曾經好愛佢”咁都o翕得出…真係大膽! 江欣燕仲問佢依家仲有無唱“風繼續吹”俾張茜聽…張話: “無!”, 江問佢: “點解呀? 依家out喇嘛?”張:“呢隻歌係你o架嘛…點可以唱俾第2個聽!”嘩! 真係想激死張茜! 江欣燕仲話張衛健好識諗埋d橋俾d surprise佢, 問佢係咪以前tum女仔d橋對佢日後做編劇好有幫助?!

江欣燕仲話以前張衛健話覺得佢似黃造時, 佢其實有d嬲…但我諗當時o黎講, 話人似黃造時對係一個compliment…佢嬲咩呢?!

仲有, 前排睇“娛樂直播”訪問華娃, 個主持問佢對於佢個女黃宇詩o既新男友有咩睇法! 真係唔講都唔知, 講o左都無人知…原來黃宇詩個新男友係Phoebus Chan…即係o係海港城彈琴彈都出晒名o個個呢…但係佢兩個又好似全無拉間咁!

唔知點解愈睇愈覺得鄧詠芝個樣好似廿年前唱“絕戀”o既女歌手蔡立(兒)…哈哈哈!