2009年10月21日星期三

10-21(wed) 宮心計+富貴門

今個禮拜開始上兩線台慶劇, 禮拜一搞首播好似好勁咁喎, 又n個地方現場直播第一集, 又搞42周年亮燈儀式…好多朋友都問我係咪要追兩線劇追到好忙, 又問我對劇情點睇…事實係, 我一集都未睇, 頂多係尋晚經過larp o左兩larp…真係你估我唔到呢?!

如果兩套重頭劇要我揀, 我一定係buy“富貴門”多d…事關眾所周知我麻麻地古裝劇, 仲要係宮廷鬧爭劇我最怕…完全唔係我杯茶! 即使當年全世界都熱捧o既“金枝慾孽”我都無睇…人人都話我out, 但我又真係從來都唔會理人點睇我…我唔鍾意睇無理由因為要懶in而夾硬逼自己睇o架?!

今次呢套“宮心計”應該好少少…因為我一向都支持楊怡o既, 所以都會因為捧佢場而睇o下…但係今日蘋果篇“宮心、富貴出閘脫腳”話d網友意見係:

“不少網民認為楊怡火喉欠奉未能「奸到出汁」,令他們大失所望,反而皇太后謝雪心甫出場即有壓場之效,不過也有人批評劇集路數不離勾心鬥角欠缺新意。”
…我未睇唔知啦…不過都係o個, 未播之前講得太勁, 又話楊怡會憑呢個奸角上位攞視后, 個風吹到咁勁, 大家自然會有太大期望…咁反而會害o左佢!

“《富》劇恩怨情仇陸續上演,不過角色設定難令人信服,如薛家燕與戚美珍的婆媳關係,驟眼看兩人的造型,年齡似乎相若。”
…三嫂再現電視螢幕係老o左好多…但咁樣形容又未免誇張o左少少呀嘛…!

“另外,結尾呂良偉收到保險箱一幕,那道具箱輕飄飄、裏面的表面發黃舊照(圖),相底全都白雪雪,令人失笑。”
…呢d又太過為鬧而鬧呀嘛…老細!

其實“富貴門”我係想睇卡士多過睇劇情…因為好多個主角都係好耐無睇過佢o地拍劇…羅嘉良做長劇一向吸引 (上年套“當狗愛上貓”就真係大材小用), 郭可盈都好耐o係tbb劇見到佢, 家燕媽媽我又真係無咩睇過佢拍長劇, 印象永遠停留o係d處境喜劇度…而對袁詠儀o既印象又係停留o係近廿年前o既“我愛玫瑰園”年代 (sorry, 我知佢舊年同三哥拍過一套tbb劇, 但我幾乎一集都無睇過…)…但最吸引我o既係呂良偉同戚美珍囉…對上一次睇佢o地拍電視劇, 真係o岩o岩入小學o既年代…久遠到差d唔記得o左…所以係有d期待o架!

除o左兩線台慶劇, 夜晚12點幾重播完“律政1”又重播“律政2”…呢期官恩娜hit呀…點都要重溫o下啦~~~