11-15(thurs) 電視風雲五十年

最後一個禮拜o既“再會歡樂今宵”終於從善如流, 真係cut晒d新人經典再重演環節, 淨係播舊片段, 抵讚!

近期忽然多o左好多回顧節目, 無綫40周年玩集體回憶, 點知亞視又同佢一齊玩埋一份, 搞o左個回顧50年電視史o既節目…“電視風雲50年”!!!

喂! 唔錯喎! 睇o左兩集, 雖然都唔係由節目一開始就睇, 因為根本唔知有個咁o既節目, 又無咩點宣傳, 只係撞彩o係禮拜日晚10點幾返到屋企, 睇到一半!

大家都知我一向鍾意睇回顧節目, 今次呢個節目仲要唔止係講atv, 仲講埋tvb, 係成個電視圈o既50年回顧…所以幾吸引! 上個禮拜第一集仲有一part係介紹d"老友記", 令人當年諗起K100的"唐樓"環節! 不過第二集又好似唔見有…定係我miss o左?!

第二個禮拜講男藝人o個集真係幾好睇喎…我居然好全神貫注睇晒成個節目…無睇睇o下走o左去上網或者搞呢樣搞o個樣! 呢d訪問節目其實好睇請d嘉賓請得好唔好, 即係適唔適合同埋佢o地肯唔肯講o野! 今集o個四位 = 盧海鵬, 梁思浩, 尹天照同埋詹秉熙, 除o左詹生, 其他三個講o野都幾大膽又幾抵死! 所以要讚一讚今集嘉賓真係請得好!

不過揀詹秉熙同阿照一齊訪問又係揀得o岩o既, 因為佢o地差唔多同期一個o係tvb, 一個就o係atv參加訓練班, 再第一套就擔正做男主角, 但之後際遇好唔同…所以諗到搵佢兩個一齊訪問又係絕!

知道今集訪問男藝員, 我已經o係度諗會唔會有我前偶像況天佑…點知真係有! 你見芒姐的profile都有quote佢, 就知道我真係曾經幾欣賞佢! 大家都聽過我當年幾咁迷“殭屍1”: 當時有一日居然 (其實唔係太“居然”o既…佢o係條街行有幾出奇呀? 都無人會理佢o架啦!) 俾我o係銅鑼灣見到尹天照…直頭想搵佢簽名, 不過最後都係無咁做到…之後仲不停咁俾人笑我偶像係尹天照添! 99年亞視個台慶頒獎禮見到殭屍全劇演員大獲全勝…真係開心o左好耐o架!

雖然近年佢形象麻麻, 但無可否認佢講o野真係幾好笑, 幾抵死…“殭屍”年代成日錄佢d訪問, 佢其實幾識講o野幾識搞氣氛, 萬綺雯都唔錯…所以希望下集可以請佢上o黎! 今集都係阿照講得最有趣, 無論係內容定說話個節奏 (哈哈…我都唔知幾時開始睇人做節目仲要要求埋呢d?)…無咩冷場同埋可以捉到人o地o既注意力…呢樣好重要! 可惜無論youtube定土豆都無人upload呢個節目, 無得同大家分享番, 只係搵到某d片段! 睇到佢同詹秉熙的大不同, 令人諗起a-level oral時的小組討論…有d組員有好多o野講, 有d就只係負責講o下: “I agree with you…”, 你想“giu”佢把口都“giu”唔開!

阿照o個隻就係比較簡而精, 即係可以剪出o黎做promo o個d…當年台慶佢o個句: “可以嘗試欣賞亞視o既誠意”就好精警, 亞視第二日即刻剪o左呢段o黎大肆宣傳…同埋係佢講呢句先特別有說服力, 因為佢o係亞視出身, 仲做o左好多年先拿到o個個男主角獎!

至於同佢o黎一個大contrast, 成個訪問夾埋都唔知知有無講過10句說話, 直頭好似無出現過咁o既詹秉熙, 又係一個經典…兩年前睇“刑偵”重播我曾經咁寫過佢:

最頂癮係有詹秉熙…佢呢廿年o黎都係唔知幾時出返o黎, 又唔知幾時消失o左…呢個cycle o係廿年o黎keep住發生! 最騎呢o既係佢居然係當年夥拍張曼玉做“劃出彩虹”o既男主角…但更騎呢o既係點解佢拍完呢套劇就無o左呢? 無線cast得佢做男主角, 一定覺得佢係得o架…點解呢套劇之後又忽然唔力捧佢呢? 睇到佢同拍檔張曼玉o係星途上o既重大差別…我都唔知佢當年拍o左套咁出名o既戲…係佢o既幸運定係不幸呢?!

其實我覺得當時捧佢做男主角又唔係特別出奇o既…無綫成日都係忽然間捧一個人o架啦, 一出就俾佢做男主角佢唔係第一個, 亦唔係唯一一個, 係唔明點解一做完會dup成咁 (定係都紅過一陣? 我都好似唔見佢八十年代仲有咩戲…到九十年代再見番佢做電視就已經變o左茄喱啡喇!), 阿照o係亞視有同樣經歷就話唔出奇o者, 因為亞視從來都係無完善制度, 一片混亂o架啦! 依家睇番當然覺得佢一出道就拍國際級巨星張曼玉係匪夷所思, 但其實張曼玉當時咪又係第一次拍劇o既新人, 大家咁高咁大, 只係之後際遇太唔同o者! 其實我又唔覺得佢o係o個套戲做得特別差, 亦唔見得張曼玉當時做得特別好...點解際遇會咁大差別呢? 其實佢當時都算ok靚仔…點解一d都紅唔起?! 但係套劇好紅o架喎!

不過可能睇佢同阿照呢part訪問都可以explain到少少…就係睇得出佢完全無爭勝心, 樣樣o野都是但啦, 既來之則安之…可能呢樣係o係娛樂圈最蝕底o既! 所以我一向我都鍾意睇訪問, 因為從好短o既訪問已經可以睇到一個人o既性格!

可能o係娛樂圈大起大跌係一個定律, 無得控制, 入得呢個圈就要有心理準備…所以d嘉賓大部份都話, 有得重頭揀過一定唔會入呢行, 正好等d發明星夢o既小朋友反思o下!

鵬哥話亞視d演員個個去到無綫都會大紅, 話好似佢o係“點解阿sir係隻鬼”裡面全部d學生轉投無綫後都紅o左…其實又好似唔係, 只係得陳錦鴻叫做紅到 (但係陳錦鴻本身就算o係亞視時都已經有人識, 同埋係主角中的主角, 即係男版關詠荷咁), 其他好似莫家堯, 駱達華肯定無紅到啦…o係亞視都叫做做主角, 去到無綫咁多年都係做大配角, 只係可能係多o左人識囉!

至於佢o地講無綫同亞視最大分別係“人情味”, 亞視溫情d, 無記就有系統d, 有制度d…其實呢個“無記亞記特色大比拼”已經講過好多次, 費事悶親大家, 未睇過的朋友可以睇番呢d有關兩台台慶節目的回顧就會知道我o既觀點…

atv: “歷年亞視台慶回顧”
tvb: “歷年無綫台慶回顧”


(電視風雲五十年…鵬哥+思浩)

最勁都係梁思浩的爆料…佢話當年試過俾一個成日同佢扮演兩兄弟的藝人一本“香港電視”飛埋塊面度, 再配以不堪入耳的語言一大堆…事緣當時香港電視本來搵佢個兄弟拍o左個封面, 點知過兩日就叫佢去拍, 咁佢唔知咩事又照拍啦, 點知最終登o左佢個封面出o黎…所以o個位兄弟就o係化妝間發lan jar!

好明顯係講緊溫兆倫啦…我之前又真係未聽過呢單新聞喎…真“背”! 上網搵o下, 居然搵到段咁o既新聞…哎呀! 齊浩男…你咁做又未免太無品, 令人太失望喇…枉我咁欣賞你o既“我本善良”! 不過當年的“陳梅馨事件”, 其實大家都知佢係咩人…難怪佢重返電視圈都無人肯撐佢, 撈極都撈唔起…同郭羨妮拍拖, 亦被視為女方人生一大污點, 成日俾人問佢點解會愛上溫兆倫 (雖然依家更多污點)…所以話, d明星你都係欣賞佢做戲算喇, 人品呢d o野, 好多時都係唔知好過知…

search到呢段: “第一套為人認識的電視劇是《城市故事》，當年因不滿梁思浩有機會拍《香港電視》封面，在化妝間拿書擲向「洗米華」。”

仲有梁思浩o係3周刊呢篇訪問都有提過…不過詳情就好似今次上“電視風雲”講得清楚d…3周刊呢篇訪問都值得睇o下o既, 因為以前都睇過洗米華o既訪問, 佢一生又係幾坎坷…同埋佢經歷o既, 真係比一般人多…睇完佢o既經歷, 應該都會覺得自己其實幾幸福!

********************************************


怪談 梁思浩

鬼神之說，古今中外，流傳已久！也許你我都不想撞鬼，但好奇之心人皆有之，不欲親眼見鬼，卻又忍不住探索鬼域奧秘。當上靈異節目主持的梁思浩，曾夜探台灣猛鬼地，拍下一團鬼影飄過，又在錄影廠布景板，遇過靈體現身背後。觀眾安坐家中，看他撞鬼，見他撞邪，不禁替他抹一把汗，又大呼過癮。

跟梁思浩做專訪，預了鬼話連篇，要他講恐怖經歷，他想也不想就說︰「恐怖過鬼！」有甚麼恐怖得過鬼？原來是醜惡的人性。

今天梁思浩不講鬼，大講人性醜惡一面，他口中的人，比鬼更猙獰。從小時候被雙親遺棄，寄養婆婆欲趕出家門，到娛樂圈的跟紅頂白，被朋輩藝人兜口兜面掟雜誌，甚至被無解除合約時，致電高層查問死因，對方回答︰「無原因！」，他都認為人比鬼更恐怖！

恨過父母，嬲過養母，怨過朋友，罵過樂易玲、陳志雲，他知道有怨有恨，一世也不會快樂，今天他選擇放低仇恨，還說︰「以前我驚人、唔驚鬼，家我人鬼都唔再驚。」「心善則到處天堂」，唔止劉德華咁講，梁思浩亦如此說。

靈異之事，無奇不有，還冥冥中有主宰。小時候的梁思浩，一天經過廟街，遇上一位高人，對方說︰「你冇父母，上天派你落，要你做一樣。」那時梁思浩不明所以，直到今天他有點領會，從他述說的經歷中，參透一切。

父母遺棄

梁思浩的父母，十來歲就結婚生子，由於二人年紀尚輕，當誕下思浩後，發現彼此性格不合，繼而斷絕夫妻關係。那時兩位年輕父母，不欲兒子阻礙前途，把他帶到寄養家庭，然後說︰「我有事，好快湊你走！」說完這句話，爸爸從此一去不返。之後梁媽媽從加拿大回港，要思浩跟新歡改姓，再把他帶回加拿大，怎料思浩一口拒絕，惹來媽媽狠心地拋棄，「我明明姓梁，點解要改姓，我死都唔肯，後來媽媽真係一去不返，丟低我畀無血緣婆婆照顧。」

父母沒有留下贍養費，令寄養婆婆十分生氣，「我好憎爸爸媽媽，點解佢唔負責任？一聲唔出一走了之，留低個包袱畀婆婆，時婆婆見我無錢，成日想趕我走，話我白食白住，好憎我。不過我無家可歸，如果佢趕我走，我一定要街。唔想做乞兒，我咪求佢囉，我話︰『我爭住你先啦！我唔會白食白住，第日我搵到錢，我會還畀你。』」

險做乞兒

十來歲，經歷過被父母遺棄，思浩見盡人性醜惡，但他還相信人間有情，相信父母不是狠心人。十五歲那年，有模特兒公司找他拍廣告，最後他決定當廣告明星，一來可以賺取生活費，二來又給父母贖罪空間，「我成日諗佢係咪唔認得我，所以佢搵唔番我呢？我諗我出鏡，佢就會認得我。我希望係我誤會佢，其實佢好想認番我。可惜到今時今日，佢都無出認我。」
思浩一直解不開這個結，甚至當他加入無後，有玄學家建議他改名，把梁思浩改成梁恩浩，就可以大紅大紫，但他寧願不紅，也不肯改名字，因為怕父母不認得他。

自幼讀天主教學校的思浩，仍然相信人間有情。80年代他正式加入無，在《城市故事》飾演洗米華，展開了銀色旅途，那時年紀尚輕的他，不懂世途險惡，縱使他懷有單純的心，也給別人誤作有機心，甚至給當紅藝人排斥，「娛樂圈係一個戰場，你一心當人係朋友，但當大家身處同一戰場，就會成為競爭對手，當大家有競爭性，你唔當人係敵人，人都視你為敵人。」

兄弟反目

要思浩找一個活生生的例子，他嘆了一口氣說︰「當年我有一個好朋友，大家感情好好，佢冇錢，我借佢，有錢兩分使，你話幾咁好。不過有次我分別去《TVB週刊》影相，後佢用我做封面，我重記得係第1036期，你知嗎？當年做到封面好犀利，代表你有一定位置，有得做封面喎，梗係好開心啦。點知我都未開心完，我朋友就衝入化妝間，將本《TVB週刊》掟落我塊面，然後好嬲咁話︰『你好！你使橫手呀，做封面啦！我唔信我唔夠你呢個口靚仔鬥。』嘩！冇利益衝突就係朋友，有利益衝突就係敵人，你話人性幾咁恐怖。」

翻查當年的娛樂版新聞，他與溫兆倫是難兄難弟，後來盛傳為了爭上位，導致兩人面和心不和，兄弟變仇人。追問梁思浩是否真有其事？是否他所說的兄弟變仇人？他卻不肯正面回應，只說︰「總之我視佢係好朋友！一直以來都無變過啦。」

無故被炒

遇上父母離棄、兄弟反目，還未見盡人性醜惡的一面。01年，傳出思浩得罪有勢力人士，需要被警方廿四小時保護，那段時間他居無定所，失去人身自由，甚至精神崩潰，除了行唔安食唔落，又失去了排尿功能，還差點中尿毒，需要插喉放尿。在極度恐慌之下，思浩找朋友傾訴，但人性可怕一面，又再令他膽怯，「段時間想搵朋友傾訴，咁咪打電話約朋友飲，點知對方一聽就話︰『嘩！你唔係靠害呀，你重叫我出，係咪想我死呀。』原來大難臨頭時，我約人飲，都叫做害人。」

03年，他走出可怖經歷的陰影後，隨即收到無的解僱信件，那時梁思浩有如晴天霹靂，「我無咁多年，一直都盡心盡力，佢要我做乜，我從來無推過。公司嫌我人工貴，我咪收少，共度時艱囉！咁多年，我自問無功都有勞，點解佢咁無情先？」

當年思浩對被炒摸不頭腦，為了解開心結，決定找出原因，「我唔想死得不明不白，咁咪打電話問陳志雲、樂易玲囉，只要佢畀一個原因我，我就走得甘心。當時我直接打電話畀樂易玲，但佢點都唔肯講炒我原因，於是我咪問︰『你係咪好憎我呀，如果你話好憎我，呢個都係一個原因。我只需要一個原因！』但佢只肯答我︰『冇原因！』」

無怨無恨

人比鬼更恐佈，思浩體會深刻。然而這幾年間，回頭再看往事，思浩有所領會，早就消清怨氣，放低仇恨。是甚麼點化思浩？他說得很玄妙，「重記得我講神算經歷嘛？佢話︰『你無父母，上天派你落，要你做一樣。』初頭我唔明，睇番以前經歷，漸漸有領會。父母遺棄我，令我同寄養婆婆生活，婆婆無兒無女，以前佢養大我，後來我養佢終老，佢臨終時曾經講︰『你係上天派天使！』呢句說話，即刻開竅，原來上天要我做孤兒，係要我照顧婆婆。另外，諗番成日逃亡段時間，如果我有父母，肯定嚇死佢，上天揀我去經歷，因為我經歷得起。又例如被無解約，佢唔迫我走，我唔會出去闖，家我得到，比無更多，講真！我真係要多謝樂易玲、陳志雲，我係真心咁講，唔係晦氣說話。」

以往他恨父母，怨沙煲兄弟，不滿樂易玲、陳志雲，現在他不對任何人心存憤恨，他希望做到天不怕地不怕，不怕人、不怕鬼。他說︰「上天有巧妙安排，唔到最後，唔知好壞。劉德華個手機廣告都有講啦，『心善則到處天堂』。」身處天堂，當然天不怕地不怕。

當思浩碰上志雲

我受過辦公室政治迫害，曾被八婆講是非中傷，對於害過我的人，我恨之入骨。思浩自稱已放低仇恨，原諒了他恨過的人，起初我不相信，因為我做不到。

訪問那天，思浩收到一個電話，然後躲在一旁密斟，其間隱約聽到《志雲上素》四字（陳志雲主持的訪談節目，請來有過節的藝人煮齋菜，以「上素」暗喻「上訴」！）問他是否被邀出席節目？他大方承認︰「佢係有搵過我！」記者一連串假設性問題，「你到時會唔會寸爆佢、質問佢？你咪可以趁機發洩怒氣囉？」怎料他心平氣和地說︰「如果我赴會，一定有火花，但唔係怒火，無晒仇恨啦。」心善則到處天堂，就算遇上恨過的人，同樣可以無怨無恨。