10-26(thurs)“藍月亮”結局篇

雖然都播完o左一段時間…但點都要講埋佢!

上個weekend終於都睇完晒期待o左好多年, 一連十六集o既“藍月亮”! 十六集 (仲要每集得半個鐘) 都幾好呀…可以快手d睇完, 通常d青春劇都係十集貨仔…短短o地幾清新咪好囉!

youtube o個位羅頌華fans真係好, 又upload左一段“藍月亮”片段…大家今次除o左可以睇到羅頌華哥哥之外, 仲有我認為做得好好, 好配合佢劇中個花名“低b”, 仲好癡情+好瘋癲o既容錦昌哥哥…佢做得咁好, 係咪佢“癲的先兆”呢?



仲有, o個個好咀jell jell o既小妹妹…真係做得好好, 好自然, 好逼真…真係好似d好克人憎o既細妹, 好搗蛋, 但又好精靈…咁多個人之中, 我覺得佢演技真係最好! 點解佢之後無繼續o係呢行發展呀? 係…其實唔應該叫人o地做小妹妹, 睇番佢應該仲大我一兩歲, 應該叫咀jell jell姐姐至o岩! 究竟呢個姐姐叫咩名呢?

至於羅頌華係做得幾好o既, 抵佢有得做男主角…但係略嫌佢唸對白真係太似朗誦, 唔夠自然…我諗佢其實係適合做主持多d! 同埋佢d粉+烟脂未免太厚…唔好忘記佢仲要係男人o黎o既!

其實睇睇o下, 佢除o左似何家勁/孫耀威…其實仲有d似無線九十年代中後期一個兒童節目小演員張裕東囉…大家知唔知邊個呢? 有一期佢都好紅o架, 電視又有佢 (“閃電傳真機”幾乎day day都有), 電台又有佢 (梁奕倫個“倫住o黎試”節目有個叫“東東大師”o既環節係佢主持), even電影都有佢 (印象中佢o係“風雲”應該係做聶風或者步驚雲是但一個o既童年)…係o個期最紅o既童星! 佢係就係好醒, 不過實在過份老積, 失去o左小朋友o既童真…同埋通常呢d眼大大得意仔, 大個一定唔多掂…聽聞佢後來o係學界仲要係懶型但又壞到唔恨o個隻! (人o地仲係讀港華o架喎!)

講番呢套劇o既兩個女主角先…本來一開始話睇完個片頭覺得潔儀姐姐好似得d, 但係睇埋落去,我真係寧願揀萬二蚊囉…起碼活潑d可愛d! 潔儀姐姐個感覺超呆滯, 表情超生硬…當然, 女仔咁睇o者, 男仔應該又唔係咁睇! 有集話佢特別悉心打扮去約阿羅頌華哥哥…嘩! 佢個紅衣+濃妝打扮…正如佢劇中個老豆攝石人攝攝巴b攝攝攝 (佢當年同李紫昕姐姐好似合唱o左隻咁可愛o既歌曲) 蕭亮講, 真係“驚為天人”囉…嚇到我呀! 我以為佢打算自殺添呀…真係唔慌唔“驚為天人”喇!

潔儀姐姐就清純d, 但係萬二蚊就可愛d…你會點揀呢?! 真係好似當年“紫青雙劍”咁, 大家總要take side支持一個…我o個時係揀紫色楊寶玲o架…你呢?

萬二蚊初出道時真係好嬌嗲, 講o野把聲係嗲到唔恨o個隻, 唔怪得知佢唔算好靚, 但係都電暈晒d人…但係唔知點解佢後來把聲會沉o左咁多o既呢? 定係佢刻意壓低把聲…隨住年紀轉變想轉型, 唔再走可愛路線呢?! 你睇o下佢o係“殭屍”幾咁型呀?! 哈哈…其實我鍾意型o既佢多d囉…因為我不嬲都好怕d嬌嗲人!

諗番好似潔儀姐姐都有做“殭屍”o架, 係第一輯第一個單元, o係日本做o個隻女鬼初春…亞視真係套套戲都有同一班人做, 仲要一做就做足十年, 要幾線劇集都係佢o地…所以如果睇熟o左, 真係會好有親切感! 亞視作為二奶台…係唯有sell“溫情”o架喇!

同埋究竟羅頌華依家真係去o左邊呢? 我都好有興趣知…記憶所及最後o係電視見到佢係做“睇真D”o既主持…之後就唔見o左喇!

基本上我覺得呢套劇同“淘氣雙子星”有d似, 劇種似, 感覺亦幾似…但係最似係兩套劇都係俾d女角拖垮o左…兩套都係d男主角做得好好, 但個女主角就做得超生硬 (潔儀姐姐vs余倩文), 同埋都唔係劇情形容到咁“驚為天人”o既…有d要“噓”佢o既感覺! 仲有呢d青春劇o既ending通常男女主角都唔會o係埋一齊, 尤其八十年代移民潮之下一定係講男女主角是但一個去外國讀書, 各奔前程…呢段荳芽夢永遠都唔會結果, 此情只待成追憶o個隻…!

呵呵…睇多幾集發現原來萬二蚊個女同學仔就係另一個當年“500飛虎隊”o既台柱吳秀芳姐姐 (咁當然就無“430”o既譚玉瑛姐姐咁經典o既)…佢都做得幾好o架, 至少係字正腔圓o個隻! 不過佢呢個長鬈髮look真係差d唔認得佢, 因為以前睇“飛虎隊”佢長期都係短頭髮o架嘛! 如果唔係睇字幕見到佢個名, 都唔會估到呢個長髮姐姐就係佢!

有一集仲有羅頌華+萬綺雯著住校服遊銅鑼灣…睇到好多舊景色, 仲有o個條剛剛拆o左o既銅鑼灣天橋! 仲有, 有一幕見到羅頌華同袁潔儀o係exchange square出面一條對住海o既橋行緊…嘩! 我真係唔知原來o個度以前有條橋…我諗係等於依家o既ifc o個度! 最尾o個集又影住佢o地o係會展出面, o係海邊有個好大o既open area, 又有五支旗桿…依家已經面目全非, 我諗係等於依家會展新翼o個度! 仲有已經拆o左o既啟德舊機場同埋由機場富豪酒店通往機場o個條行人天橋+行李輸送帶…唔睇番都唔記得o左o個度! 睇番呢d地方同埋香港十七年前後ｏ既改變, 真係好有趣! D舊日情懷真係好令人懷念!

仲有, d畫外音…都真係幾正啊!

Hoho…終於都聽到播“藍月亮”喇…呢套劇最得年青人歡心o既就係播好多歌, 真係成個點唱節目咁…平均每集 (得半個鐘) 都至少有一隻…有我最鍾意o既“月半小夜曲”(仲播o左兩次同埋播晒成首添), 仲有傾心, 還有, 夢中見, 迷惘, 想你, 半夢半醒, 夕陽醉了, 難得有情人, 由零開始…etc. 多到數都數唔晒! 全部都係當年大hit o既歌…仲要有好多隻都係克勤o既…o個個年代的確係你最紅!

最後, 送番首主題曲過大家聽o下:



李克勤: 一生不變

曲:彭永松/范俊益 詞:向雪懷 編:盧東尼

一幽風飛散髮 披肩
眼裡散發一絲 恨怨
像要告訴我 你此生不變
眉宇間刺痛匆匆暗閃

憂憂戚戚循環 不斷
冷冷暖暖一片 茫然
視線碰上你 怎不心軟
唯有狠心再多講 講一遍

* 蒼天不解恨怨 痴心愛侶仍難如願
分開須不可改變 但更珍惜一刻目前
可知分開越遠 心中對你更覺掛牽
可否知痴心一片 就算分開一生不變 *

反反覆覆多次 失戀
進進退退想到 從前
讓我再吻你 吻多一遍
別了不知那一天相見
Repeat *

反反覆覆多次 失戀
進進退退想到 從前
讓我再吻你 吻多一遍
別了不知那一天再相見