2006年10月25日星期三

10-25(wed) 倫住o黎試

尋日睇新聞, 又有港台dj俾人拉o左…真係好核突! 今次係梁奕倫...其實一d都唔感到出奇, 因為一路以o黎都覺得佢個感覺幾cheap o下 (所有roland或者double r o既fans真係sorry晒, 請大家可以考慮o係呢度開始唔好睇落去!), 同埋o個ja什麼kawaii, shirley, 拿拿淋…個個“一擔擔”! 港台d dj真係想倫住o黎試…老廉d咖啡!

梁奕倫呢d咁o既成日巴巴閉閉但又無咩料o既人士, 實係得罪人多稱呼人少…都唔知係咪佢個反o左目o既好拍檔范振鋒舉報佢o既?!

“涉搵親友扮撰稿人呃公帑
DJ梁奕倫被捕廉署搜港台

政府銳意「整頓」的香港電台,再次爆出當紅唱片騎師及前節目主任涉嫌詐騙及貪污醜聞。廉政公署日前採取行動,拘捕包括著名DJ梁奕倫及其胞姊在內四名人士,疑有人在主持節目期間,一直報稱由自由撰稿人協助其撰稿及搜集資料,再利用親友假扮成「自由撰稿人」,向港台申領開支,最終中飽私囊,涉及款項數萬元,廉署已要求港台提供六十至八十張單據作進一步調查,不排除有更多人被捕。

被捕四人包括梁奕倫、其胞姊、一名前節目主任及一名前助理節目主任。消息透露,廉署早前接獲貪污舉報,翻舊帳指控數名港台職員多年來懷疑以親友名義,騙取港台的撰稿費及資料搜集工作等開支,於是展開調查。案件交由今年六月拘捕港台高級節目主任何重恩、DJ「拿拿淋」,以及前DJ「Kawaii」等人的廉署執行處B組跟進,並由該組首席調查主任何志豪統籌。

前節目主任疑知情不報

直到上周五(二十日),廉署分別邀請多名港台現任及前職員返執行處協助調查,當中包括現時在港台二台主持節目《萬王之王》的梁奕倫及其女拍檔曾淑儀,結果梁奕倫、其胞姊及兩名港台前職員在助查期間被捕。經過扣查後,各人已獲准保釋,稍後再返廉署報到。廉署人員同日並前往港台搜集證據,並要求港台提供及核實六十至八十張懷疑與案件有關的單據,調查單據上的簽名及批核情況。

消息續稱,廉署初步調查顯示,梁奕倫涉嫌於○一至○二年期間,在主持節目《倫住o黎試》時,報稱有自由撰稿人協助他撰稿及搜集資料,其後再以其胞姊的名義,向港台申報開支,涉及金額高達數萬元。而同案其中一名被捕的前節目主任,涉嫌曾經處理過梁奕倫的申報,並知悉內情。至於另一名涉案者,則懷疑在九六年至○二年期間,以同類手法騙取港台開支,金額亦達數萬元。

廉署發言人表示,不會評論個別案件。港台機構傳訊組總監陳敏娟則回應稱,現階段不便評論,只透露梁奕倫正在休假中,未知何時復工,曾淑儀則如常工作。本報昨日曾致電梁奕倫,他在電話中說:「我依家唔方便講,轉頭覆你!」但其後他隨即關掉手提電話。而曾淑儀亦拒絕就事件作出任何回應,更躲避傳媒追訪。至於目前頂替梁奕倫主持節目的羅啟新,則聲稱上周才接獲港台通知,要暫時頂替梁的崗位,惟他對事件毫不知情。”



其實呢…有一段時間我都曾經幾鍾意聽“倫住o黎試”, 幾乎係日日聽咁滯…不過係十年前仲讀緊中學o既階段! 但係佢之後愈o黎愈走火入魔, 自以為是, 走埋d肉麻當有趣路線, 成日以為自己係萬人迷, 真係好難頂囉!

記得大約96/97年, 佢個節目無聊得o黎有時都ok好笑, 成日請d年青歌手上o黎玩, 出晒名鍾意玩埋d騎呢核突o野…咁先可以搏到見報, o岩晒佢性格嘛!

我記得有一期個節目係玩叫d明星上o黎講英文, 每次兩個…仲有o個個扮鬼仔但其實聽真d佢d英文都唔多好o既李志剛化身“住o係山頂o既dr. alexander”教英文…最記得有一輯請o左好勝gigi上o黎 (當時佢仲未係好勝gigi, 只係o岩o岩去完台灣o既“短髮”“愛自己”清純少女歌手…我o個時仍然幾喜歡佢 [真係唔好笑我…雖然我都引以為恥!]!) 鬥何家淑女何超儀!

人o地何超儀雖然讀書唔成, 但講英文絕對好聽過佢! 佢就自以為名校 (因應佢d師妹要求, 叫我手下留情, 提到唔好提佢o地間學校名, 所以已經即時delete左喇!) 出身d英文好掂 (須知道名校都有一大jar英文唔多好o既人, 我都認識唔少)…企圖o係度拋英文! 最記得o個part係人o地只係玩講o下d casual o既英語, 無聊o既詞彙…佢就無啦啦講埋d咩“on behalf of my school”咁o既o野…真係聽到我眼都突埋!

雖然我o個時仲幾鍾意佢, 但我都覺得好核突囉! 人o地casual chat, 你就o係度懶formal, 點知拋o左幾句就拋唔到…o個集好似係測o下d關於去髮型屋整頭髮o既詞彙, 佢連perm都唔識…真係失禮晒成間學校! 咁都唔緊要, 你英文唔好真係唔係問題, 娛樂圈一定大把人差過你, 最大問題係你鍾意拋嘛! 點知俾人test多兩test你現晒形, 仲要輸到離行離列!

其實呢d遊戲根本就唔係話真係要測你英文好唔好, 純粹係搞o下笑o者…即係佢o地通常用d中文直譯做英文, 例如火雞叫fire chicken咁囉…純粹係搞笑…點知你就玩認真, 以為拋o下英文好威…咁都唔緊要, 最慘又唔係真係勁喎, 咪核突晒囉!

其實當年聽完呢個節目, 我都為o左我當時個“偶像”o既行為感到有d 難受, 戥佢[火羅]…不過其實自呢次之後, 我已經大約知道佢係咩人…佢“好勝”, 並唔係一朝一夕…只係到“奪面雙琪”事件, 先將之發揚光大, 全世界都知!



睇o左兩集“15/16電視迷大挑戰”…都幾好睇! 其實d問題都頗無聊白痴, 但係因為d嘉賓搞笑, 所以都幾吸引…阿葛真係笑死我!

所以話, 其實有時節目內容都唔係最重要, 係d主持同埋嘉賓先最緊要! 雖然森美小儀有時都頗多爛gag, 但偶然都ok好笑o既, 至少好過已經“走火入魔”以為自己好funny其實得罪人多稱呼人笑o既林曉峰! 佢真係應該向佢家姐阿哥再偷多幾年師先出o黎做首席主持lead住成個team囉!

佢o地成班“玩遊戲, 無難度”o既遊戲天王, 只係一片混亂, 同埋完全唔見得大場面! 林曉峰作為team leader, 轉數係ok快, 但好多時都over左…須知道“寸”其實係一門好高深o既學問, 要做到寸完人又好笑對方又唔會感到offended, 係好難o既一回事…佢仲未夠班, 同佢師傅獎門人仲差好多皮!

o岩o岩睇完今集勁歌金曲之“李克勤情訂演奏廳”…今次就無咩唱佢d經典歌, 但我想講o既係: 點解集集都要主持崔建邦唱番一兩首歌o既呢?! 話佢唱得唔好, 作為一個業餘o既人, 佢都算唱得唔錯…但既然佢都唔係歌星, 可唔可以唔好咩都叫佢唱一餐?! 阿陳總經理係咪想佢個契仔都要好似佢咁瓣瓣都要撈番餐…無論幕前幕後唱歌做主持拍戲都要見到佢兩位呢?!

仲有, 點解唱“告別校園時”o既時候, 字幕話首歌o既原唱係陳百強?! 係打錯o左定係呢首歌係克勤翻唱danny仔o既呢?!

*******************************************

(咁o岩居然俾我見到好勝gigi幅校園相…貼一日咁多啦! 經佢d師妹要求話費事眼冤, 貼完一日亦都刪除埋喇!)


(仲有佢個“情敵”蒙嘉慧…嘩! 佢以前個樣真係嚇死你啊!)