2006年5月20日星期六

5-20(sat) 師奶強人

唔知點解一到世界盃, 所有"四年一度"o既o野又好似走番晒出o黎咁...除o左"出前一丁"game, 仲有shine (好夾硬呀嘛...我知呀!), 跟住依家下午兩點居然又開始重播番"師奶強人"!

記得當年首播時, 就係98年世界盃之前, 亦係我o地o岩o岩考完a-level之後! 因為克勤o個期有劇出+有得做世界盃主持, 人氣勁番少少 (須知道我不嬲都幾支持克勤)...呢套劇佢仲要拍滕麗明(一個我當時都幾喜歡o既女藝員...但只限於"真情"阿雪年代直至"尋秦記"都ok...佢都係適合短髮爽朗形象多d...依家個長髮女人味+太整齊牙齒形象, 唔多o岩佢囉!), 同埋佢個好拍檔賤男梁榮忠...都幾好睇o架! 好記得佢個名叫“李小心”, 亦都好鍾意佢首主題曲"男人一支花咪當我老花...", 到依家仲好深刻!

呢d"輕輕鬆鬆鄧梓峰"式劇集, 最o岩o係初夏睇, 好有仲sunshine的感覺! 同埋見到克勤同梅小惠, 唔知點解不其然會諗起查星宇同學+李西西同學(@"淘氣雙子星")...又係我o地呢個年紀o既小朋友的集體童年回憶! 一諗起"淘氣雙子星", 就會令人諗起懶洋洋的暑假啊! 套師奶強人仲好似有"賤man"謝天華...呢套戲佢應該都係做個賤人...謝天華d演技, 其實真係幾ok喎!



跟住原來朝早又重播“騙中傳奇”…呢套雖然睇o左好多次, 但其實都幾好睇o下…99年無線俾亞視套“環珠格格”打到落花流水, 變極陣都搞唔掂, 最終係要用呢套劇o黎打亞視先無輸得咁慘…可見呢套雖然唔係大製作, 不過都幾受歡迎! 哈! 仲有未做上市公司主席o既張玉珊做女配角添…依家應該唔會再有機會睇到 (雖然佢都有o係自己公司個修身節目度“粉墨登場”飾演番…自己!!!)!



之前睇報紙, 唔知點解有一版係介紹d類似名媛/名人…有兩日分別介紹o左兩個前藝人…雖然佢兩個都係唔多出名o個隻 (咁當然我係識佢o地啦), 但睇番佢o地o既轉變, 又幾有趣o下!

第一個係蔡安蕎…約10年前出道, 應該係同鄭伊健一間唱片公司, 因為好記得第一次見佢係o係伊面一個音樂特輯度做女主角! 其實我一向都覺得佢唔多靚 (至少唔係佢o地形容到咁靚), 唱歌亦唔多好…完全唔明點解唱片公司會揀佢o黎力捧?! 點知跟住佢真係紅唔起, 好快仲要o係唔記得咩電影做d auntie角色…情況同馮曉文一樣…其實不嬲都覺得佢個樣有d似馮曉文添 (不過佢好樣少少)!

點知話佢依家走o左去做金融投資o個d o野, 仲撈得好掂! 咁都好o既…搵到佢擅長o既o野, 又搵到錢, 又搵到滿足感…總好過做個半紅不黑o既歌星仔!



另一個係91年亞姐葉靖怡…相信大家都未必識佢! 但係如果90年代有睇過亞視劇集o既朋友, 又應該對佢唔會太陌生…因為只要睇亞視一套劇集, 就會識晒佢全台藝員…事關每套戲都係o個幾個演員, 好有親切感!

我最深刻佢有份做o既一套戲, 就係呢套1995年o既“愛者有其屋”…但唔知點解網上search到叫“現代愛情故事”? 可能係大陸版或者海外版啦! 呢套劇好似無o係黃金時間播過, 但就撞o岩考試期間o係下午播, 所以就日日都可以趕得切返屋企睇! 睇落又幾好睇喎…個劇係由四個單元組成 (每個單元五集), 佢同未發福o既蔡濟文 (o個時都ok靚仔…依家又係變o左個波) o個段最好睇, o個時都有同幾個同學仔一齊追添!

仲有一個單元係王書麒配第一次見o既黃璦瑤…當時佢係新人, 一轉眼已經係十幾年o既老行尊喇! 套劇仲有劉玉婷, 胡渭康, 邵傳勇, 寶珮如, 杜汶澤etc. 仲有, 隻主題曲係出奇的好聽 (其實蔡濟文d歌好多首都幾好聽o架…真係唔知點解, 可能佢執到好籌啦?! 好似佢初出道改篇自日文歌o個首“say yes”, 我當年好鍾意聽!)…唔知仲有無人睇過呢套劇呢?! (有我真係要俾個五你…因為機會好渺茫!) 同埋點解亞視一日到晚都重播d劇, 唯獨係無見佢重播過呢套?

睇報紙話佢無做藝員之後, 走o左去教o左8年幼稚園 (其實幾o岩佢個look), 跟住近年機緣巧合有朋友搵佢去做PR o個類工作…依家就成為成功o既公關啦喎! 都幾有趣!