2009年2月12日星期四

2-12(thurs) 新秀同學會@星星同學會...

嘩…上個禮拜星星同學會o個集“新秀同學會”真係笑死我! 依家好少有節目可以吸引到我上網上到一半都停o左落o黎, 咩都唔做全神貫注咁望實個電視…本來以為第二集曾華倩+商天娥o個集係最好笑, 點知呢集更加得, 笑足一整個鐘...我仲要癲到錄o左再睇多次!

之前有一集訪問森美, 佢話做節目訪問d八/九十年代歌手好似許志安同梁漢文就最好, 因為你唔洗點問, 佢o地自己已經好多o野講, 依家o個d歌星就悶到爆咁話! 咁又係…今次呢集真係印證o左呢樣o野, 姑勿論你buy唔buy佢o地幾個, 但無可否認佢o地係講o野係幾好笑, 好識自己搵話題, 又識自嘲同埋互相取笑, 最緊要係轉數快, 仲有捉到講笑話o既節奏…呢樣好重要! 呢集極度推介呀…下一集就好似不大吸引喇!

上個星期唔覺意睇o左一集“令日vip” (“娛樂直播”的換湯唔換藥之作…其實除o左cut o左重播前一晚“東張西望”內容o個part, 我睇唔到兩者有咩分別…個分別係咪減o左幾個主持呀?!)…有一集訪問久違了的劉錫明…wow, 真係好耐無見, 見佢出番o黎真係好! 當年“烏金血劍”我都幾鍾意佢…仲有最經典的“是緣是債是場夢”呢…wow!

雖然佢一日都被問番倪震/周慧敏/毒瘤明事件都真係幾悶, 同埋俾人覺得佢博宣傳…但娛樂圈生存之道係咁o架啦, 你唔講番呢d o野又邊有人訪問你呀, 等o左十幾年, 終於都有機會出番o黎…我都戥佢好高興…希望佢o係香港可以再殺出一條新血路啦!

“豬肝補氣”終於做到結局篇…其實真係拖o左好耐, 我亦都無咩點睇好耐, 即係唔係完全無o既, 飛快咁30分鐘睇完5集囉…因為d劇情我真係好麻麻! 本來三姊妹我比較可以接受大妹o個段, 但自從俾高長勝揭發o左佢o地夾埋呃佢之後, 連呢條line都好唔得…所以套劇終於做完我都好高興!

不過咁, 有好多朋友叫我開個topic討論o下呢套劇o既結局篇, 亦有更多朋友叫我開個topic討論o下呢期城中熱話“魔術鹹豬手”+“觀音娜開口夾著脷”事件…哈哈…大家如果有興趣都可以討論o下…至於我o既“見解”…下回分解…:p