2007年2月23日星期五

2-23(fri) 我們的世紀金曲演唱會

新年流流特別多演唱會睇, 無論係紅館現場睇o個d, 定係深宵o係電視重播o個d…大年初一同屋企人去o左睇溫拿33周年演唱會 (btw, 呢個問題我想問好耐, 有無人可以話俾我聽係“週年”定係“周年”?“週刊”定係“周刊”呢? 我以前一路以為係“週年”/ “週刊”…但後來睇唔知咩書話應該係“周”先o岩, 跟住去報攤睇o下d雜誌, 個封面又確係變o左“x周刊”…究竟係邊個先o岩呢? 係咪應該寫信去問王貽興? 但係佢應該掛住去買桃花…或者應該去搵細個時“閃電傳真機”個“認字特警”ben哥哥黃智賢問o下…), 返到屋企無線又有得睇eason, 克勤, 草蜢同埋“我們的世紀金曲”演唱會…真係目不暇給…芒姐最鍾意睇演唱會o架喇!

個“我們的世紀金曲”演唱會都幾精彩…上年本來都有諗過去睇, 最後無睇到, 點知原來有好多好歌, 仲好o岩我個年代…真係o徙晒! 早知去睇啦…又有我好buy o既林峰同鄭嘉穎, 仲有不太buy o既吳唱K…仲有hocc, 關淑怡, 許志安, 王傑…咁多我o地個年代o既歌手! 我仲以為係老餅演唱會o黎o架添…太可惜喇! 佢o地唱d歌仲要真係幾經典o下…又有“男人最痛”,“幾分傷心幾分痴”, “難得有情人”o個d…全部都好正呀!



不過林峰同吳唱K o個PART歌舞又真係幾令人失望…唱得好差亦都跳得唔多好!“扮”dancer出身o既吳唱k就一貫地差 (我依然唔明佢當年點解可以做tvb dancer?!), 連平時唱live同跳舞都好有水準o既林峰, 今次都有d跌watt…其實呢part“飛躍舞台+激光中+monica”, 佢o地o係唔同場合都表演過n次…點解都會搞成咁o架?!

另一個我喜歡的鄭嘉穎…哎…真係算吧啦…佢都係做番戲好過唱歌! 難怪佢做戲可以紅, 反而唱歌都無咩點紅過…

oh…仲有我最鍾意o既走音靚聲王伍小生添呀…


(坐"低~~~~~~~~~~")

至於克勤同草蜢o既演唱會, 更加唔洗講啦…精彩到爆! 真係o係屋企都要跟住一齊跳“忘情森巴舞”呀! 雖然上年睇過晒呢兩個演唱會, 但o係電視睇番依然咁好睇…點解可以咁好睇o架?!

草蜢演唱會o係呢度講o左n次, 唔再講喇…至於克勤個得心應手演唱會, 上年亦都寫過…如果無睇過o既朋友請自行入去睇番…克勤d歌實在太好聽, 亦都太o岩聽…相信我o地個年代o既朋友無咩邊個會唔鍾意聽…真係再次“回憶返埋o黎”囉…可惜電視只係播得半首!

“月半小夜曲”,“大會堂演奏廳”, “一生不變”, “深深深”呢d經典名曲, 真係聽一千次仍然係咁好聽…仲有“四大樂手”o個part, 都好精彩囉…無睇過o既朋友快d去買隻碟睇!

做完一jar演唱會, 尋晚12點3開始播“陀槍師姐”…呢個一定要睇啦! 上年播完“難兄難弟”, 本來又話上呢一套, 搞到人萬分期待, 點知最終又變o左“大鬧廣昌隆”…好失望! 今次終於都做喇, 仲要係做頭兩輯…其實我覺得第一輯最好睇, 之後o個d都麻麻! 好鍾意睇短頭髮硬朗型o既陳三元…後尾佢變o左長髮女子, 仲要有埋仔女, 個女仲一下子變到鬼死咁大個…真係好怪雞!

Oh btw, 前幾日o係地鐵見到幾個o靚仔無啦啦o係我前面道別, 又話唔知幾多年後先可以再見…聽到d o靚仔講d咁o野已經好怪o架喇, 點知抬頭望o下其中一個o靚仔, 發現佢拖住個女子正是“陀槍4”裡面做陳三元同程峰牛高馬大o既女o個個少女黃美棋…即係“刑偵”裡面做“車匙”家姐個女棠棠o個個得意小朋友呢…依家見到佢真人咁大個…感覺更怪!