2007年1月26日星期五

1-26(fri) 問題娛樂圈

接住肥姐“友緣相聚”o個個新節目“問題娛樂圈”, 不經不覺都好似做o左成個月, 但一路都未有機會寫o下佢! 其實個節目本身個idea係好好, 不過捉到鹿唔識脫角…d環節全部設計得勁悶! 其實如果設計得精彩d, 趣怪d, 呢種以“娛樂圈”做主題o既遊戲節目, 應該會幾好睇!

首先係兩個主持都揀得怪…江欣燕其實幾有急才, 上年佢同毛毛+查小欣o係亞視主持o既“三個A cup的女人”, 都係超級抵死! 但係呢個節目佢都無咩得發揮…而且佢同胡諾言真係無咩火花! 唔係話阿胡仔唔好, 基本上我係ok buy佢…睇得出佢一路都好努力, 做主持亦都自然o左好多, 不過佢搞gag又真係差d, 講o野真係唔多好笑...或者佢都係應該去做番戲, 同埋佢唱歌都唔錯o架!

不過最難受都係一開始d嘉賓同佢o地o個d什麼“娛樂跟班”一齊叫口號, 仲要做埋d好可怕o既動作…真係可唔可以唔好咁核突呀? 尤其係d白癡v字+yeah手勢…cut o左呢part啦…好難頂!

D遊戲本身都好唔得…最好玩o個part可能已經係一開始o既十題“堅料/流料”…不過問d問題太濕碎…個明星o係平安夜定聖誕節結婚, 有咩significance呀? 可唔可以問d“有聊”d o既問題?! 跟住o個個圈出兩幅相有咩唔同o既環節就更加悶, 仲要三個嘉賓每人輪流講一次…真係好repetitive…悶爆!

呢期仲有新環節玩小學填充題添…真係勁無聊! 諗番起差不多十年前, 又係江欣燕有份主持o既同類型節目“電視大贏家”…真係好睇好多囉!

講開娛樂新聞, 前幾日睇到一單幾有趣o既“料”…最好笑係佢有埋幅圖, 仲要係講徐子淇o係度玩緊隻金龜…笑爆嘴! 同埋, 不得不提多次…佢阿媽的確係好醒!

“關 仁 隱 事 : 黐 月利 淇 母 教 女 有 一 手

「 黐 月利 淇 」 奉 子 成 婚 嫁 入 豪 門 , 佢 宜 家 就 印 印 腳 等 生 金 豬 仔 , 佢 阿 媽 見 愛 女 呢 次 出 擊 成 功 , 於 是 開 始 培 訓 黐月利 淇 個 妹 , 希 望 兩 個 女 都 吊 到 金 龜 婿 。 黐 月利 淇 個 妹 係 冇 佢 家 姐 咁 省 鏡 , 不 過 見 家 姐 生 活 優 哉 游 哉 , 都 希 望 接 受 阿 媽 既 改 造 , 又 可 以 執 黐 月利 淇 的 名 牌 舊 衫 同 舊 袋 黎 用 , 一 舉 兩 得 。 關 仁 覺 得 黐 月利 淇 個 阿 媽 好 適 合 做 金 牌 經 理 人 , 除 左 識 包 裝 兩 個 女 之 外 , 佢 回 應 記 者 都 有 絕 招 , 當 電 話 接 通 又 唔 想 聽 , 佢 最 叻 係 扮 接 收 得 唔 好 , 喂 完 一 大 輪 就 收 線 , 呢 招 比 cut 線 禮 貌 好 多 。”


前兩日又睇到“娛樂直播”訪問李婉華, 嘩! 咁多年無見佢居然係完全無變, 仲幾靚同埋幾fit…最睇死係講o野原來幾funny囉!

仲有, 禮拜四唔覺意睇o左個11點幾講日本東北祭o既節目, 個節目本身無咩特別, 最特別係個主持囉…相信一般人都唔會知佢係邊個, 但對於我呢d由細到大咩音樂節目都睇一餐 (尤其係中學年代), 大小歌星都會記得o既電視精, 一睇就認得呢個曾經o係十年前做過歌星o既王翠玲...佢應該係95,96年o既新人, 同楊千嬅o個期, 仲有另外個新人叫蔣卓樂呢! 但係佢好似出o左道無耐就唔見o左, 究竟去o左邊呢?! 同埋最奇係點解十年後會飄番出o黎, 仲要主持個咁九唔搭八o既節目呢?! 更奇怪係無線點解會搵佢主持?! 佢自己大把二/三/四/五線o既靚女藝員可以用啦?! 我記得王翠玲有隻歌好似叫“簡簡單單”, 當年去k都成日唱o架…仲好似同唔知黃秋生定邊個傳過緋聞, 同埋好似入行之前係便利o個d什麼校花 (90年代便利好興選什麼大專校花, 都好勁o架…我最記得係施念慈!), 好似係城大o架…唔知道除o左我, 仲有無人對佢有印象呢?! 歡迎提供資料!

仲有仲有, 上兩個禮拜睇“勁歌”見到李逸朗同蔣雅文個什麼“don & mandy”組合 (其實係咪一個組合?)上去唱新歌…點知其實又係舊歌?! 今次佢o地翻唱o既係孫耀威12年前集“愛的故事(上集)”…其實佢o地依家係咪走“懷舊組合”路線?

之但係你翻唱人o地隻舊歌都唔緊要, 如果你係唱得好過原本個version的話…但係呢個合唱version都幾唔好聽! 其實平心而論佢兩個o既歌藝又唔算差o架喎…阿don唔錯, mandy都比我預期中好好多, 至少好過佢個3T friend yumiko好多倍…但係呢隻歌個key係男仔key, 夾硬整到合唱, mandy每次唱都好吃力! 呢首歌本身真係幾好聽o架嘛…當年都大hit過, 我到十幾年後o既依家都仲聽緊! 孫耀威雖然無大紅過, 但佢o個期d歌真係隻隻都好好聽…“我知道你在等我”, “愛的故事(上集)”, “愛的故事(下集)-但願他珍惜你”都好好好好聽囉…點解佢紅唔起, 依家仲要搞成咁呢?