2007年10月15日星期一

10-15(mon) aTV...可以咁睇?!

亞視10月8日大改革…“aTV可以咁睇”…即係點睇?!

睇o左一個禮拜新aTV, 本來幾有期望, 見佢係威係勢咁, 連個台徽都改埋! 改台徽呢part其實幾好, 雖然睇得有d唔慣, 但係感覺好似young o左, 無咁老套! 同埋好似真係好有determination去改革, 以為會掂過上幾次好多添!

見佢之前介紹節目幾吸引, 吸引到我去睇o下, 點知睇o左幾日完全無想像中咁好, 排陣一片混亂…半個鐘半個o既節目"散修修"咁…都唔知佢想點?! 呢種“散打”咪即係叫人去追隔離台一個鐘一個鐘o既劇集囉…錯晒!

本來以為"行行任篤笑"會幾好睇, 但睇o左幾集又係不外如是…最難頂係d罐頭笑聲…真係太誇張, 每講完一句就有, 仲要依家真係唔興罐頭笑聲好耐o架喇…可能全個節目最好笑o既位就係呢度! 最白痴係排"行行任篤笑"打"奸人堅", 仲要係打後半部, 係咪傻o架?!

仲要無啦啦有個"篤女郎"...係咪"謎女郎"個friend?! 其實我一向都好怕劉綽琪, 佢o係無綫o既時候已經係無料扮有料o既表表者…次次見佢玩遊戲節目, 一係就懶醒, 輸o左就永遠賴地硬…其實輸咪輸囉, 何必賴三賴四…最怕輸唔起的人! 你唔好話我知佢係扮o野搞氣氛…一次就話o者, 睇得多佢o既behaviour, 大約都知佢係咩人! 所以我係好怕睇佢有份做o既節目!

至於“斑馬在線”, 擺明係翻版o既“犀牛俱樂部”…好在係無o左劉綽琪囉! 不過金庸小說我真係唔多識, 興趣不大…但係對於金庸迷同埋比較年紀d o既觀眾, 相信會吸引過“味分高下”o既!

o個個什麼“五個半a餐”, 直頭係可以不提…無一個餐係吸引o既! 之前係威係勢咁又話挖邊個過亞視, 又蔡少芬, 宣萱, 羅嘉良…都唔係o既! 雖然其實一個半個過o左去都唔會有咩幫助…之前都試過好多次高薪挖角, 最終d本來o係無綫幾紅o既藝人過到去, 都係dup晒! 依家話挖o左戚黛黛, 樊亦敏, 小雪o個d, 就更加唔會提升亞視o既吸引力…哎! 我都諗唔到有咩辦法可以幫亞視一把喇! 或者好似當年“殭屍”呀, 宮雪花呀, 港男呀咁…做一d大台唔會做o既創新o野, 可能都可以起到一陣o既…at least贏到d口碑都好呀!

今個禮拜9點仲上o個套什麼“激流青春”…真係唔知咩o黎?! 睇o左第一集, 真係好難受, 唔係為o左睇o下邵仲衡, 睇都唔會睇! 個名已經老套, 劇情更加娘到不能再娘, 想學“四葉草”/ “Y2K”…但o個d劇感覺都young d, d演員都吸引d, 個包裝都好d…呢套真係唔知想點? d演員係咩人o黎o架?

無綫o個兩線新劇, 本來無咩期望, 點知睇o左幾集, 兩套都幾好睇喎! 反而之前懶勁o既大劇… 出o黎o既效果又麻麻! “奸人堅”當然無“棟篤神探”或者“男親女愛”咁精彩, 但都不過不失…始終有黃子華都係得o既! Ending放d NG片段呢個idea次次都幾work, 仲有隻新版“黃飛鴻”主題曲都幾好笑…係d女角弱d! 仲有o個個做子華徒弟o既男仔勉強都ok, 但係好多位都over o左, 好突兀, 一d都唔好笑! 達明俾亞視擺佢同黃子華對撼, 真係明玩佢…今個禮拜套“激流”就更加如同自殺!

套“通天幹探”亦都出奇地幾好睇…係警匪定懸疑定點?! 唔理係咩總之都幾好睇! 陳豪都做得幾好…黎姿又真係可以整得幾醜喎, 佢今次都做得唔錯! 兩套劇都用假牙, 葉童又係咁, 佢又係咁…無綫成日都overlap d橋o既! 不過佢又好似唔係整哨牙, 咁佢點整到咁醜o既呢? 同埋, 點解又有阿法拉呀? 真係要力谷佢幫佢台慶做勢?! 仲有, 元彪今點解成日都拍邵美琪, 變o左近年螢幕情侶?!?!?!